Pu Hawla damlaia hnawl sawhkhawk
Pu Lal Thanhawla tluka hruaitu ropui hi Mizoramah hian an piang zen zen tawh dâwn lo. He hruaitu ropui hi a din leh a tih ropui ngei Congress Party hian lal an duh luatah 'Ṭha thei loa Congress leh Mizoram enkawltu' tiin an hnawla Pu Hawla la damlai ngeiin amah thlaktu Pu Lalsawta chuan lehkhabu a ziah hmasak ber chu 'Ṭhat loh theih lohna bawm' tih a ni a, Pu Hawla a chhuak chiaha Congress thar din a tum khum ta hmiah mai le.
Pu Lalsawta tih dik loh chu Pu Hawla dam lai hi chuan Pu Hawla hi a chawimawi thiam poh leh amah hi a sang dawn a, chu chu a hre thiam phak lo a nih loh chuan, hre rengin Pu Hawla hi a hnawl lui a nih hmel a, hei hi Congress kal fuh loh ṭanna a ni ta a lo ni. Pu Hawla chawimawi chung hian Congress hi insiam ṭhat tum ta zawk se; Pu Sawta pawh a hmingṭha sawt ang a, Pu Hawla monu Pi Rosie unaupa Pu Zodintluanga pawh a titau lo ang. Pu Hawla chawlh tawh hnu hian Congress chu ṭha sawt tur, Pu Hawla hun lai kha chuan ṭha thei reng reng loin an insawi ta a, a pawi ta a ni.
Pu Hawla kal dana kal ngawr ngawr lo hian amah Pu Sawta hian thil thar tih chhuah tumin Congress chuan Sem Policy an kalsan tur thu a puang a, Congress chu Sem Policy hmang thiam em em leh chu vanga tling an nih a hre lo a nih loh chuan, Pu Hawla tih dan hrim hrim hnawl a tum vang a nih a rinawm. Sem Policy tel lo chuan Congress tan tlin a harsa tih an hriat fiah hnuah a hma aia uarin a hming a thlak a, Ṭang Puihna a ti ta a, Rs 200000 a dah a, tu chin nge ṭanga tu chin nge ṭang lo hriat a harsa dawn a ni. Inthlan dawna Congress Party tana ṭang em em campaigner te hian Ṭang Puihna a nih chuan an lak hmasak tur hi a chiang reng a, mahse chu mi thlentir tur chuan Sorkarna siam a ngai a, Sorkarna siam tur chuan Pu Hawla blessing an mamawh a, chu Pu Hawla chu an ṭhat theih loh chhanah an puh bawk si avangin Congress hian an au hla thlak se a dik ang.
Congress hian opposition lama Kum 5 dang awm hnial loin lo nghak hret se chu tun ang hian an keh lo tur. Pu Zodintluanga khan Dictator President hnuaia Treasurer nih duh tawh lovin Congress kalphung loa mahni thu thua kal; President hnuaia Treasurer ni duh loin a inhnukdawk ta a, Pu Zodintluanga aia banna lehkha thui leh chipchiar ziakin Pu KS Thanga a bang leh ta a ni. Pu John Rotluangliana leh Pu Robiaka pawh an lung a awi lo a, hetih lai hian Congress member thar leh naupang zawkten an President hi fuihin, Congress inthen thianghlimna a ni an lo ti a, Politics-ah chuan mi hmasa leh hruaitu hlun hi chu an lo ṭha lo deuh a nih pawhin pawh beh hram hram tur a ni ngai. Central Congress pawh an tlak chhiat chhan lian chu an hruaitu hlui bang leh titau nasa kha niin, Gandhi Family an la awm chung pawhin an tla chhe nasa hle a, Pu Hawla family lungawi lo chung chunga Ṭhat loh theih lohna zuar chunga Party mi awmsa hnawl a, pawn lam mi sawm luh chawp hmanga insiam ṭhat tumna hi Pu Sawta tih fuh loh a ni. Amah Pu Sawta hi pa ṭha leh dik duh a ni a, a thiam loh chu Pu Hawla family leh amah hnaihtu a dah hrang hma lutuk hi a ni a, kuahkhawm thiam se chu 2028 inthlanah tling tuma bei turin an la lian tawk a, tunah hi chuan an sawm luh thar te nen pawh 2023 inthlan hi chu tlinna tur bial an vàn viau ang. Pu Hawla dam lai ngeia an hnawl hi an la inchhir dawn a, Pu Hawla hi President nihtir se, Pu Sawta hi Senior Vice President ni chungin a thawktu ni se, an la lian hle dawn si a. Tunah chuan Pu Hawla ngaih theih lohna, Pu Hawla vanga bawlhhlawh leh mipui hnawl, Pu Hawla awm loh hnua intithianghlim nih an tum a, a chhungah Pu Hawla vanga contractor lian, Pu Hawla avanga Supplier lian, Pu Hawla avanga eizawnna nei thei, Pu Hawla leadership vang chauha mi pangngai nia Ex MLA, Ex Minister ni thei awmkhawmna Congress an ni tih an theihngilh ta si a, Congress tan 2023 inthlanah hi chuan Pu Zodintluanga bial leh chhim lam bial pahnih khat bak chu beisei tur a vang ta a ni.
- Vanlalmawia