“Mipuiin KS-a sawi nge, ka sawi an âwi zâwk ang tih a ni mai,” (Nuai 25 laa inpuhna kha! A la fiah miah lo!)

Kan hnam tana zalênna sual laia hnam sipai huaisen Col Lalrawnliana chuan, Nikir thla (June) ni 10, 2023 (Inrinni) khan a lehkhabu thar ‘Ramhnuai Mi’ tih tlangzarh a ni a, hetah hian a mi sawm zingah MPCC President a nih hnua a thu sawi leh ram kaihhruai a tum dan avânga lar thar chho mek Pu Lalsawta pawh a kal a, zalenna sualtute hmel kan hmu nual a, a dumpawl leh pawl lo thlengin, a hlimawm viau.

Dawrpui Multipurpose bathlarah chuan, Pu Lalsawta chu kan bulah a rawn ṭhu a. Ram kaihhruai a tum dân leh eirukna lama mi fihlim nia hriat lar a nih vangte pawh a ni mahna, thla an lakpui deuh nual a, party dang mite pawhin an lakpui hial! A ṭha riau.

Kan inchibai deuh nuai nuai karah hian, hun tâwitê chuhin, Pu Sawta chu nuai 25 lâk chungchang ka zawt ta zauh a, chuta min chhannaah chuan, “Mipuiin KS-a sawi nge, ka sawi an âwi zâwk ang tih a ni mai,” a ti a. Chutah, rawn be buai leh chibai an awm a, ka nghâk hret a, min chhanna chu ka duh tâwk chiah loh avângin, “Ka pu, chuti chauh chu maw i sawi theih?” ka ti a, “Thu dang sawi ṭul ka ti lem lo, mipuiin KS-a sawi nge ka sawi an âwi zâwk tih hi a ni mai,” a ti leh a, ‘Awle’ ka ti a, thu dang sawipui an awm avâng leh sawi leh tur a neih chuan loh avângin a zo chu a ni ta der mai a, fiah lo ruaiin kan zo a ni ber mai! He thu hi June ni 10, 2023 zan ZONET chanchintharah pawh kan puang nghal a ni.

Nikir thla (June) ni 9, 2023 khan, Minister hlui Pu KS Thanga chuan, MPCC aṭanga banna a thehluhna lehkhaah Pu Sawta chungchang hi sawiin, chutah chuan, “I remtihna thlapin ka sawisak che a ni. Pawisa pawh hi ka hnenah an rawn dah a, Luangmual ka in aṭangin sorkar motor-in i PSO leh Driver rawn hruaiin nangmah ngeiin i rawn la thlap a, i hawn ta a ni. I inah pawisa kha i hriat lohin tumahin an lo dah lo. A hnuah ngaihthat lohna i nei ta nge, hlauh i nei ta nge kei chuan ka hre lo va, i pe kir leh niin i sawi a..” tiin a lo ziak tawh a ni. Hemi chungchang hi sawi zui a tam hle a, Pu KS Thanga’n an chenna ina nuai 25 latua Pu Sawta a puh hnuah hian, Pu Sawta hian engmah a sawi lo a, chu chu hun remchang chuhin, lehkhabu tlangzarh zawh rik nuai nuai karah ka inrawlh lut ta zauh a. Mahse, a sawi duh chin chu khiti zawng khi a nih khi.

He inpuhna hi a tak ngel ngawl hlein ka hria. Pu Sawta leh Pu KS Thanga hi, an sorkar lai pawh khan ngaihdan inan lohna lian tak nei tawh an ni a, chu chu kum 2017 NECS chhiah nuai 126 awl chungchangah khan a ni. Khatih lai khan finance minister Pu Lalsawta kha a fim hlein ka hria. Aizawl FC, I league a an boruak lian tak karah khan, sorkar sum vawngtu a nihna kha a hre chiang a, chhiah kha awl loh hrâm a duh a, NECS chhiah awl hi phalsak ni ta se, contractor tam takin an dil ve a hlauh thute chu notesheet-ah a ziak ṭhin a, a theih tawka a dodalna karah, khatih laia Parliamentary Secy (Taxation) KS Thanga chuan Taxation Minister hnenah ziakin, 'may be approved as proposed plz" tiin a ziak thung a. Hemi kal zelah hian, Chief Minister Lal Thanhawla chuan March ni 15, 2017 (Nilaini) khan, 'appproved' tiin a lo pawmpui ta a, NECS hnenah hian Rs 12,663,418 an awl tir ta a ni. (RTI chhanna) He thu aṭang pawh hian, anni pahnih hi an ngaihdan a lo inang lo tih kan hre thei ang.

Mizoramah hian, sorkar administration chelhtute, politician te, NGO hruaitute thleng hian, eng emaw avanga rik luai luaina a lo thlen lai tak hian, tu nge ka nih, tute nge kan nih? Eng nge kan sum dinhmun? Hemi kan tih hian eng nge a nghawng tur? Kan tlin ve em? tihte thleng hian, thûk zâwk leh fim zâwka thil ngaihtuah thiam leh peih kan mamawh hle reng a. He chhiah awl pawh hi kan inzirna tur darthlalang ṭha tak a ni ang.

Hetiangte hi rilrua a lan mek lai te, mi ṭhenkhatin, Mr Clean-a, ti a, eirukna lama mi hming ṭha tia an aupui mek si lai te, eiruknain ram a tichhhiat nasatzia hria a, heti lama pa hming ṭha nia kan fak ve mek lai leh Congress thar din tum a, mi hausa ringawt ai a, mi taima, ti tak takte an mamawh zawk dân tur a aupui mekte ṭha kan lo tih mek lai a, Minister hlui, Pu KS Thanga’n an chenna Ina nuai 25 zu latu a nih thu (A hnua a pek let chu thuhran ni se) a rawn sawi chhuak ta leh, amah Pu Sawta ngeiin, “Mipuiin Ksa sawi nge, ka sawi an âwi zâwk ang tih a ni mai,” ti chauha hemi chungchang a sawi duh si hian, rilru a kap ta riau mai a! Kan lo rin ang êm êm a lo ni chiah lo nge? Pu KSa sawi hi rintlak a lo ni lo tihte thlengin min ngaihtuah tir mek a ni.

Minister ten contractor laka pawisa an lâk nia sawi awm ṭhin lakah a minister laiin a fihlim em tiin Pu Sawta hi ka lo zawt tawh a, (ZONET – Zoram Kalsiam Programme) chuta min chhannaah chuan, “Ka fihlim a, fihlim lo tura min rawn zartu hi, a mak khawp mai, an awm lo. Min hria a ni, min zar lo khawp mai” a lo ti tawh a, he thu hian min lo tilawm hle a, a chungah pawh rinna ka nghah phah hman hle.

Heng thil awm tawh dan leh awm mekte thlir kual hian, MPCC President Pu Lalsawta’n, “Mipuiin Ksa sawi nge, ka sawi an âwi zâwk ang tih a ni mai,” tia nuai 25 lâk chungchang a sawi hi, a hnuah a pe kir leh a nih chuan a kut chu a la faiah pawh ngai ta ila, Pu Ks Thanga sawi ang a, nuai 25 zet zu la tura an chenna ina a zu kal hi, a tak tak a nih chuan, heti maia chhang lo hian, hei aia fiah leh chiang hi a awm thei em tih hi mipui zawhna leh mipui rilru tichiaitu a ni ta mek mai. Nuai 25 laa inpuhna kha! A la fiah miah lo a nih chu.

- Lalnunṭawma Fanai