Mud-guard awm lo bike/lirthei

Fûr a inṭan chho ta. Fûr a nih chhoh chuan kan kawngpuite a huh ang a, kawngpuia tuihâwk a luan dûl dûl cháng a awm ang a, kawngpui hmun ṭhenkhatah chuan tui nu leh bawlhhlawh tak tak a tling piau puau pawh a ni thei. Fûr laia khaw/khawpui chhunga lirthei khalhtute fimkhurna tur i'n sawi teh ang.

Ruahsur lai leh kawngpui tuihâwk leh tui tling a awm laia lirthei kan khalh chhuahin, kawngpui sir vela awmte leh kalte kan chìl per thei tih hriain fimkhur tlàn a ngai. Tui awmna lai kan thlen chuan a bul hnai, lirtheiin a chìl per phâkah mi an awm em, tih en ṭhin ila, an awm a nih chuan tlân muang ṭhin ila a ṭha hle ang. Mihring an awm chiah lo a nih pawhin, tui chîl per avanga mi tana thil pawi thei a awm leh awm lohte pawh ngaihtuaha en tel a ṭha viau.

Two wheeler, a bikin bike-hoah hian a hnung lam ke chunga mud-guard awm lo (thlawn daih) leh tê lutuk a tam hle. Chutiang bike hnunga ruahsur laiin tlân a hrehawm hle a, bike ke hnung lamin tui, tuihâwk nu tak a phiah perin a hnunga mite a per ṭhin. Intihthinrim ṭanna a ni thei.

Mudguard awm lo bike (lirthei dang pawh) ruahsur laia kan khalh chhuak a nih chuan fimkhur viau a ngai; mi tan harsatna kan siam thei a ni tih hriat a ṭha. An hnunga tlânte mai bakah, bike hnunga chuang (pillion rider)-te ngei pawh a phuh per pha ṭhin a, kan mi phurhte tan ngei pawh a ṭha lo thei a ni. Mudguard awm lo bike-te chu ruahsur lai chuan chak taka tlân loh a ṭha tihna a nih ber chu.

A hrim hrimah lirtheite hi a siamtu company-te'n a ṭha ber tur anga an siam lo tihdanglam ṭhin hi a ṭha lo thei a; lirthei kaihhnawih dân pawhin a phal lo niin an sawi. Chuti a nih chuan mudguard thlawn chu dan bawhchhiatna a ni ang. Mipui nawlpui ṭhatna leh him tlàn zawkna turin sorkar thuneitute lam hian mudguard thlawn phal loh a nih thu puangzar ta se, Traffic Police lam emaw hian hriattirnate han chhuah se, a va ṭha dawn em. Mudguard awm lo bike (lirthei dangte pawh)-te chu man hial se a ṭha lo'ng maw?

- Kezo