MNF party lian chhung ril
Party 3 fimkhurna tur tih June 12 Vanglaini Issue-a chhuak avang khan feedback ka dawng ve nak nak a, Part II angrenga subject dang daih ni siin ka rawn chhunzawm leh dawn a, ram hmangaihtu mi dang cho chhuahnaah chang se tih hi keia duhthusam chu a ni.
1. MNF leh Groupism:
'Party chhungah hian ṭang ṭang awm lohna hi a awm tak tak ngai lo' tih Political Science zir mite sawi hi a dikna chin a awm a, Mizoramah pawh party tinin he groupism hi an tawng ṭheuh kan ti thei ang. MNF chhunga boruak reh duk chung sia inṭhenna awm ru; tun hnaia Social Media hrang hranga lo lut leh mahni hriat aṭangin i han sawi dawn ang hmiang.
Pu Zoramthanga versus Dr R Lalthangliana hi a rik chhuah tawh ngai loh chhan chu MNF hruaitute hian 2019 khan an tih tur an tifel tawha Dr Thangtea hi leadership fight thei lo turin a til an laksak kan ti thei awm e. Chumi awmzia chu, MNF Vice President aṭangin an paih a, a reh ta vang vang a, Covid laia a hming a ṭhat dawnin Health Department chu Finance Department-in an Audit hmak duh. Mizo mipui hripui kan hlauh vanglai tak khan Pu Zorama enkawl chuan Dr Thangtea enkawl chu a sum hman dan an Audit a ni. Minister aṭanga an bântir zui tak Dr Beichhua Department pawh an Audit zui duh miah loh lai hian, hripui karah Health Department an audit chhan kha Dr Thangtea hming ṭha tur hliahkhuh tumna a nih thu hi politics chík mite chuan an ringhlel làwk tawh a ni. Mahse Department dang pawh a tahtawla Audit tur tih niin Audit hmasakah Health Department aṭangin an tih chu dàwt muhlum a ni tih a lang a, tun thleng hian Pu Zorama sorkar hian Department pakhat chiah an la Audit duh a, chu chu Covid len laiin Dr Thangtea enkawl Health Department an audit kha a ni.
Pu Zoramthanga chawlh huna leadership tur inhruipawh an ṭan tawh thu kha ka lo chhiar ve a, zirlai pawl aṭanga lut Pu Lalchhandamna Ralte, Pu Lalruatkima, Pu L Thangmawia, Pu TJ Lalnuntluanga, Pu Lalrinsanga Ralte leh an thawhpui ṭhin; General Secretary leh Secretary rual hian chaw an eikhawm fo tawh thin a, ṭhian ho châw eikhawm a tih theih rual hian Leadership atana intelkhawm an ni ang tih a rinawm. Pu Zorama chawlh hunah hian Dr Thangtea ni lo MNF President hi kan neih ngei a rinawm chhan chu; chhim lam MLA tel lohna group lian tak hi a awm a nih a rinawm. Pu Robert Romawia Royte hi Pu Zorama lama ṭang a ni tih hai rual a ni lo a, amah zuitu a neih Dr K Pachhunga, Er H Lalzirliana, Pu H Biakzauva, Pu Lawmawma Tochhawng ang hi intelkhawm tur chuan an la lian tham si lo. He boruak inmung ril tak ang hi Party chhungah hian a rit ṭhin a, Congress phel tàk chhan pawh he Groupism tho hi a ni.
2. Secretary rual revolt:
MNF Secretary leh General Secretary rual an lungawi loh tak tak kha chuan Exodus Day an hmang tur pawh Hnam Run an mawi tham mang lo va, an lo book tawhsa Vanapa Hall an hman khan chair an hawn belhte chu mipui hmuh hlau takin an thukru a, Hall-ah an thawl hle tih WhatsApp post ka hmuh kha indèuhna satliah emaw ka ti ngawt a, thil thleng tak tak a lo ni reng si.
MNF ruhkawl leh vangvat kai tam tak chu kum 10 an opposition hnua Sorkarna an chan hnuah hna la hmu ve lo an awm a, Kamrula hminga hna chhuak zo zai chu a changtu tak sawi ngam si loin an rin hriat ṭhup a, PMJVK hnuaia hna chu thiam taka Vai thawhtir a nih si avangin, pawisa hlawm lian hmu ve lo Hnam Run GS rual an phur loh avangin Exodus Day an hman hnu lawk khan an Exodus darh ṭep tih kan lo hria.
MNF hotute an harh chhuah meuh chuan inthlan a lo hnai tawh a, inthlan lam hawi a ngaia, Lunglei Municipal Council inthlan review pawh an inkawk na hle tih kan lo hre phak bawk a, dik tak maw? hriat chian a chakawm hle a ni. Mipuiin MNF an duh loh chhanah hna neitu leh semtu lam an kawk tih hi a rinawm tawlh tawlh a, SASCI sum an hmachhuan mek hi Mizoram mipui sum a nih bakah loan a ni a, rulh leh tur a ni a, tunah hi chuan GS rual Election Expenditure tuakna angin an hmang a, kum 4 chhung thlim an nih avanga thlem lungawi tumna kan ti thei a, an lungawi zawh loh chuan phur lo takin an campaign dawn a ni.
MNF ziaa thil ṭha ka tih chu an party hruaitute inphah hniam theihna hi a ni a, an zawr hnàp thei a, tihsual pawm chunga inchhir chu party hian an hrethiam leh ṭhin a, kum 4 tihsual thawi dam hna MNF hruaituten an thawk mek a, hna pawh an semzai nasa tawh a, an thei sem chur chur tih hi chu kan hre tlang a ni. Hei hi inthlanah chakpui tham a nih leh nih loh lam chu hunin a la hril ang.
- H Lalchhuanawma