Pu Zodintluanga bàn chhan kha
Tahrik June 5, 2023 Vanglaini chanchinbua kan lo hmuh K Lalmuanpuia (MP Khawlhring) "Pu Zodintluanga bàn chhan kha" tih thu ziak kha rawn thual nawn leh ṭulna a awm a, kha ṭhu ziak kha 100% chu thlawp vek lo mah ila, a dik thui hle tih ka hmu thiam phak a. A thu ziak zinga mi, "Pu Zodintluanga banna lehkha en mai hi chuan Congress hi lian takin a phel a ni," tih erawh hi chu ka pawm lo thung a. Congress hi lian takin a phel lo, Congress hi nghet takin a la ding reng, lungawi lo an awm chauh zawk a, Pu Zodintluanga hi lungawi lo zinga langsar ber a ni mai zawk a, Congress phel anga ziah kha chu ṭhu a uar lu deuh a ni.
Ni e, zèp thu a cheng lo va, Pu Lal Thanhawla chawlh hnu hian Congress-in ngai a awh thei tawh lo tih hi tlang hriat a ni. Pu Laldenga thih hnu pawhin MNF khan tlak hniam lai an nei a, an MLA ṭha lehkha thiam rual tuna Congress hotupa ber Pu Lalsawta te leh mi langsar, IAS leh IPS rual an chhuah hnu pawh khan MNF hi an la ding chhuak nawn thei a ni. Congress hi Pu Hawla a chawlh hnu hian ding chhuak thei lo tura ngaihna a lian ta hle a, hei hi chu thiam taka party dangin an neihna mai a ni. Congress hi 2023-ah hi chuan an la insiam rem hman lo hret a nih pawhin, 2028-ah chuan sorkar tumin an rawn bei leh ang; lo ngai reng rawh u.
Hetih lai hian Congress President thar hian insiam ṭhatna tur a mamawh hle tih chu kha thu ziakah khan a lang a, "Pu Zodintluanga bàn chhan kha a tawi thei ang ber hian dah tum ta ila, Party Leadership ah rinna a nghat lo tihna a ni. Pu Lalsawta kha Party dan kalha che ṭhin tiin a puh. Pu Lalsawta kha dan pawisa lo, ama duh dan dana Party hruai angin a puh. Pu Lalsawta kha a thawhpuite rawn lova decision siam ṭhin niin a puh," tih tak hi he thu ziak kan chhiar lai khan ring phal chiah lo mah ila, Pu KS Thanga banna lehkha han hmuh khan a dik hmel ta riau mai a. Pu Lalsawta hian lal tak leh inti thu taka Congress kalpui a tum chuan Pu Hawla leadership quality ang kha a neih tel a ngai. Pu Hawla an zah anga an zah tel si loh a, a inleng viau chuan Ex MLA Congress aṭanga ban tum an la awm nual tih pawh hi a rinawm rum rum a, hei erawh hi chu a thlen ka ring tawh lem lo keimah hi chuan.
- John Lalruatkima