Covid-19 Positive Thu Leh Hla

Ka hmelhriat hnai tak, ka ṭhianpa ni bawk hi vanduai­thlak takin Covid-19 positive a ni tih hmuh chhuah a ni.

Pa fimkhur tâwpa ngaih a ni a, amah pawhin a kai theihna tur âwm reng reng a hre lo. 

Random test neihah a tel ve a, a lo positive ve reng mai. Positive a lo ni ta chiah a, a thil tawn heti hian a ziak a, ama phalnain ka rawn dah ang: 

"Pialral ram kai nghal mai tur ang mai hian mipui hian kan buaipui a...

 Zing dar 2-ah ka positive thu min rawn hrilh a, khawvar aṭangin phone call- sorkar lam department pathum aṭangin mi 6/7 velin Police Dept tiamin, shock lai takin pawimawh inti ṭheuh siin ka kalna zawng zawng, bul hnaia awm zawng zawng, min kaitua rin zawng zawng ngaihtuahna mumal pawh nei thei lovin min rawn zawt a, nupa leh chhungkuaa engmah sawihona hman pawh awm lovin... 

Ambulance-ah siren ri ruai ruaiin an lo tlan a, veng chhung leh kan tlan pelhten phawk tawkin min lo thlir liam a... 

A hmun (ZMC) kan han thleng chu kan dam sawng sawng mai. Symptom engmah lang chhuak awm lo vek kha an lo nia... hospital zawng zawngah serious tlemna ber a ni hial awm e. 

Kan ti ti a, phone kan khawih char char mai... kan hmaa lutte pawhin symptom an nei si lova, general ward-ah nurse pawh duty tawh lovin anmahni an in-monitor a, an chhuah theih hun an nghak a ni ber mai. 

 A darh lohna tura theih­tawpa fimkhur tur chu a ni; mahse vanduai pawla a hri vei kan lo nih palh pawhin damlo pangngai kan ni, la dam thei enkawl tura lak phei mai kan ni tih hriat tur..." 

Khi khi a thu ziah chu a ni. Amah ngei kan inbia a, an thil tawn a sawi a, kan inbiakna aṭangin rawtna leh sawi belh duh  tlem ka nei: 

1. Zan rei/ zing lama mut tawh hnua result inhrilh lo hian, zing thawh hlima inhrilh theih ni se. A positive-te pawh khawiah mah an vak chhuak hman em lo ang a, zing dar 2:00 vela an phone harh hnu hi chuan a muthilh theih tawh loh thu a sawi. 

2. Ambulance-in an rawn lam a, traffic jam kara kal tlang pawh an nih hmain a jam lohna hmunah pawh siren a ri ruai ruai mai kha chu a positive tán awm a nuam lo ang a, ṭhenawm khawveng tán pawh rilru lamah na takin a nghawng lo thei lo. 

Ambulance-a positive an hruai leh dâwn a nih chuan, traffic jam-a tlan tlangna tur a nih lem loh chuan ri ruai ruai lo thei se - hun hman a rei phah lutuk chuang awm lo e.

3. ZMC lama an thleng phei an hahdam sawng sawng tih hi hriat a va nuam em! Damna tur hmun an pan a, rilru hnual sawt loa a thawveng sawt thei hi thil lawmawm a ni. 

Cancer hospital pawh hi an tia lawm - "Mahni khuaah chuan cancer 'cancer, cancer,' tiin miin hläu takin an sawi a, keimahni pawh thi tur ang deuhah kan inngai. Cancer damdawi-in kan thleng chiah chu keini aia nâ, keini aia cancer rei tawh an lo awm fur a, kan dam huai huai thei," tiin. 

4. He Covid-19 hi van­tlangah a darh tawh anga ngaih mai hi a finthlak tawh ang. Sorkarin emaw 'community spread a awm tawh' tih an puan kher nghak loin a inṭan tawha ngaia mahni ṭheuh fimkhur thiam a ṭha. Fimkhur avanga him vek theih a ni lo ang, vanduai vanga kai an awm mek, fimkhur loh avanga kai erawh a tam thei khawp ang.

5. Kan zir thiam tawh mask vuah, social distancing leh loh theih loh thilah lo chuan inkhung hram hram hi a takin zir leh ang u. Covid-19 hi chenpui thiam kan zir a hun tawh tih min hrilh ṭhin a; nimahsela ṭhenawm khawvengah, hmelhriatte leh ṭhiante ngei an positive sup sup chiah chuan chenpui loh dan hram zawna inven, a ṭul huna lockdown, a ṭul huna khauh zawka inkaihhruai hi a la thlanawm zel a nih hi. 

'Kan him seng tawh chuang lo ang' tia inhawn dar vek duhtute hian Covid-19 hi a takin tawng chhin se, ralmuanna hmuna indo zir ang deuh a nih an hre chhuak mai thei! 

Pathian zarah Mizoramah thihpui kan la awm lo. Kan dam chhuah zel theihna turin doctor-te thiamna a tawk lo ang, kan hmanraw neih pawhin a tlin kher lo ang, Pathian hnenah tihtakzetin i dil zel ang u.