Chanvo inchhuhsak
Ram rorelna a kal fuh loh laklawh chuan kawng hrang hrangah thil dik lo leh fel lo hmuh tur a awm ṭhin. Kan state sawrkarah pawh hian hman lai aṭanga vawiin thlengin rethei leh harsa zawkte chhawmdawl aiah, an chanvo laksak chungchang hriat tur a awm reng. Thil dik lo leh fel lo hmu chhuak tur hian research beih a ngai lo, kalna lam apiangah mi rethei leh harsa zawk, an chanvo chhuhsak an nih dan min hrilh nghal mawlh mawlh thei hmuh tur an awm. Pathianin retheite hnehchhiah leh an chanvo laksak a duh lohzia hmun hrang hrangah kan hmu. Joba 35:9-ah ‘Hnehchhiahna a tam avangin an rúm a, Mi chakte bân avangin chhan ngaiin an au,’ a ti a. Hnehchhiaha awm, an chanvo chhuhsaka awmte rûm thawm leh au aw, hi kan sawrkar hian bengkhawn se la, a lawmawm ngawt ang.
Mi thiltithei zawkten mi rethei leh chanhaite chanvo an chhuhsak dan kawng khat chauh han sawi ila. Sawrkar chuan duhsak takin, rualbanlo (disable)-te tan sawrkar hnaah quota an siam ṭhin a. He quota hi catagory hrang hrangah a chang tur dik tak ni loten an chuhpui ṭhin nia sawi a ni. A bikin Mitdelte quota-ah mitdel ni hauh lo, khaw hmuhnaa harsatna nei (Partial blind) pawh ni lo. Khawpui chhunga motor khalh vuk vuk theite pawh department pakhatah chuan lak a lo ni tawh niin sawi a awm. Hetiang thil hi a thleng zauh zauh nia hriat a ni. Hetiang mite lo pawmtu leh certificate lo siamsaktu Doctor-te pawhin dik takin thil ti se la, a lawmawm ngawt ang.
Sawrkarin rualbanlote hmangaiha chanvo an siamsakte hi a chang tur dik takten an chan theih nan, mipuite leh thuneitute i ṭang tlang teh ang u. Tun ṭum Combine Competitive exam-ah te pawh hian, hetiang thil hi a lo inphum ru reng lo maw? Mitdel inti si, hruaitu mamawh lo, ziaksaktu (scriptwriter) pawh mamawh lo, hawrawppuia ziak pawh ngai lo, mit ṭha pangngaite ang thlapa mahnia zawhna chhang thei, mitdel anga lut si an awm ve leh tlat ṭhin nia sawi a ni. Hnehchhiaha awm leh an chanvo chhuhsaka awmte au thawm leh rum thawm hi, kan sawrkar hruaitute hian beng chhut ngawnsan lul
suh se.
- Commisioner Lalkiamlova