Mizoram Politics a tho suau
Tunlai chu keini Politics lama chhum hmin ve lem loh pawhin Politics bak kan sawi mang loh chhan chu, Social Media vang leh ZPM vang niin ka hria. ZPM hi chu awm lo se MNF hi term hnih lal ngei ngei tur, chumi zawha Congress lal leh ngei ngei tura ngaihna a awm avangin kan sawi ṭha peih dawn lo a, ZPM hi sorkar ve thei mai tura thawm nei an nih avang hian Mizoramah Politics hi rikin a ri chur chur kan ti thei awm e.
Chu Politics chu kan hmuh fuh thiam loh chuan, MNF sawi chhiatna leh anchhe lawhna emaw ti Facebook ah ka hmu ṭeuh mai. Congress diriam tum hrim hrim pawh ka hmu ṭeuh mai. ZPM phei chu "Thluaka ZPM Lut" tih tur chi an tam a, thawh hlim aṭanga zan mut dawn thlenga ZPM bei ngar ngar patling ṭhankin pawh an awm thluah a, heng mite hian hna an thawk ngai lo a nih hmel a, nileng lenga ZPM bei an awm a, nileng zankhuaa ZPM fak an awm bawk. Kan zavai hian Politics hi kan tuichilh thar hluai lam aiin, a sawi chhuahna Social Media a awm tak avang hian min beng harh a ni.
Tun ang hun kum nga hnu maia ZPM-in MNF sorkar phet thlu thei tura inrinna an neih chhan hi, MNF hian ngaihtuah chiang se chu mi pali panga bak hi dem tur an awmin a lang lo a, chutih laiin insiam ṭhatna khua a tlai tawh hmel si. MNF chhungah mi rinawm leh taima, mahni bial tana inpe MLA ṭha leh viak ṭha an tam nen, chu mite pawh fak hman loin mi pahnih pathum pawisa atchilhna hi MNF hian a tuar a ni. Hetiang sawi hian rilruah Minister tu tu emaw a lo lut nghal zut zut ang a, chutih laiin kan chan loh khanah hian Minister hausa tawntaw hi an insiam ve nual a, an department chana Officer hian an hai si lo va, an sawi chhuak leh a, "Off record" an tih hi inthlan a hnaih meuh chuan Off Record a ni thei ngai si lo a, sorkarna an chan hnua Minister hausa tawntaw mi panga vel awm hian mipui mit an timim a ni.
Congress Come Back tum dan boruak pawh a sangin an fing a, he Politics kan tih tak hi anni aia man hi an awm chuang lo ang. City Worker Meet tih hming phuahin Aizawl mi an kokhawm dawna a lan laiin, Lunglei lam daih daihte an han ko phei a, thingtlang aṭangin an kalkhawm nual bawk a, Congress chuan tam hmel Politics hi an la thiam tluang zel a, an mihring lawm luh pawh a ram pum hmelhriat pahnih vel awm zarah, a bak zawng pawh langsar tak chhuaha an chhuah thiam hi an finna a ni.
ZPM hi intifing taka mi dang aia hmaa Bial Viltu tia Candidate puang hmasa an ni a, an fin tawk lohzia chu Pu PL Liandinga meuh pawh inthlan hma thla 5 velah a hrisel lohna chhuanlamin an chawlhtir leh ta a, zai pui a tawk tihte sawi awm mah se, hrisel chho leh turin hun a la neih laiin, Bial Viltu an tih avangin Bial dangah Bial viltu an tei suau suau a. Aizawl East I CM Biala ZPM Bial Viltu berin a bial a vil theih loh avangin an chawlhtir lo thei lo chu a ni a, chet hma hi a finthlak tia insiam remna hun an la neih rei chu, ṭul lem lovah a hun hmaa insiam rem an mamawh phah a, an fin hi a tluantling lo.
He Politics boboruak tho suaua thil lawmawm kan hmuh chu ṭhalai rualin Politics an sawi hi a ni a, 'Politics mai mai ka sawi peih lo' ti rualin tuipui taka Politics an sawi avang hian, Party pawh an fimkhur phah beisei ila a ṭha ang. Kum tawpa inthlang tur tuna kan Politics kûr dup hi Political Awareness neihna atan min kai harhtu ni se a ṭha khawp ang le.
- Zosangliana, Chhinga Veng