Sorkar hlima VC inthlan result

Mizoramah Village Council inthlanna chu zawh fel a lo ni ta a, rin lawk ang ngeiin MNF chuan seat an la hnem ber. MNF hian mipui beisei angin seat an la tam lova, hei hi Covid-19 dona kawnga an chet fuh loh vang te, sum a awm loh avang te, SEDP an la sem theih loh avang te, an insawi anga kawngpui an siam ṭhat theih loh avang te, MNF minister zingah CM in duhsak bik nei nia a lan avang te, party chhung inmil lo (ruling hri) a awm tak avang hi a ni thei mai thei a ni. 

Kum 2008-ah khan Congress chuan sorkarna an rawn siam a, kum 10 ro lo rel tawh MNF chu MLA inthlanah mualpho khawpin an tla ta a ni. 

MNF chu MLA inthlanah an tla zo chiah a, 2019-ah VC inthlan neih a ni leh a, Mizoram mipui zawng zawng hi Congress an ni ta emaw tih mai tur a ni. Congress chuan seat awm zawng zawng deuhthaw an la ta a, Local Council awm hran hma a ni a, seat 555 awmah Congress-in seat 444 an la a ni, 2009 khan. 

Kum 2009 VC inthlan seat an chan dan chu Congress-in VC 444 (80.00%) MNF-in VC 30 (5.41%) an la thei. ZNP leh HPC ten VC pakhat (0.18%) ve ve an la a, United Democratic Alliance-in VC pathum (0.54%) an la. Independent candidate-te chakna VC 18 (3.24%) leh party chak bik awm lohna VC 58 (10.45%) a awm bawk a ni. 

Hetah hi chuan MNF tan pawh thawh­lehna ni hmuh theih tawh loh tura ngaih khawpin dawl zawrin an zawr a ni. Party te zawk ZNP, MPC tihte tan phei chuan Mizoram politics ah hmun a awm tawh lo a tih theih a ni. 

Mahse thil hi a lo mak khawp mai, kum 2018 MLA inthlan a lo ni a, Congress hi MLA panga lek neiin an awm a, MNF an sorkar ve leh thung a. 2009-a VC pawh nei ve mang lo tan ZPM an tih tak (ZNP, MPC leh pawl dangte) hian MLA seat pariat an la a, Congress aiin MLA an ngah zawk a ni. 

2018 kum tawpah MLA kan thlang zova, 2020-ah VC thlan a ni ve leh ta a. MNF hian 2009-a Congress kha an phak loh pawhin an hnaih ve thuak anga 80% talah VC/LC an lak theih a rinawm tia miin an thlir laiin, VC/LC 374 chiah an la thei a, hei hi VC/LC inthlanna 609 aṭanga teha 61.4% chiah a ni. 

Congress sorkar hlima inthlang kha MNF hian VC/ LC ah hi chuan an phak ta lo hle a ni. Hei hi ZPM lo pian tak vang a ni thei a, ZPM hian seat 39 an la phak tlat a, hei hi 6.40% a ni. 

Chutihlaiin Congress hian VC/LC 100 lain 16% a la ni phak a, MLA panga lek nei Congress hi an la ṭang thei hle a ni.