OFFICER POLITICS THIAMTE LEH POLITICIAN

Mi nazawng kawm phak loh Officer lian hi kan nei nual tawh niin a lang. Hetiang Officer Politics thiamte hi Election zawha Ministry-a inthlak apiang hian Ministry thara Party hotu ṭhenkhat leh thil tithei anga in ngai chin chuan, hetiang Officer felfal leh Politics thiam te hi, “Hengho hian kan Sorkar hi an duh duhin an sawp kual ang che u tih kan hlau viau a nia. An corrupt ropui si; Minister ho hi an ‘Control’ mai ang tih kan hlau a ni” an ti ve ziah a. 

Minister fel tak takte chuan, “Kan en ang chu, hengho hian Politics thlenga min beih dan kan hai miah lo” an ti ve ziah bawk a. Heng Officer ho hian, thil kaldan hre vek niawm tak hian, an kimki thiam khawp a. Party hruaitu, Block, Group leh Unit hruaituten an lenchilh ṭumte hian thingpui special tak a lo hlui a, “Heng hi kan hotute an nih hi” tiin an staff te an han hmelhriattir. Khua a lo rei deuh a, Party a hotu lian hnenah hlei hlei khan ṭan an lo la thiam chho zel a. Block, Group leh Unit tih lam te kha chu ngaihpawimawh chu sawi loh, phone pawhin biak hleih theih an ni tawh lo reng reng. 

An thil ngaihpawimawh pakhatnaah chuan Minister te kha an va be pawp nghal mai hauh lo. An laina hnai rethei ve tak takte kha an it tawk te te contract ilo an han sawi hmuh a. Hethiang hi hralh a tla phian mai a, nidanga hriat pawh an hriat lem loh te kha, ‘Lo leng ve teh khai! Hei pawisa remchang awm thei dawnin ka hre tlat mai’ tih aṭangin an han ṭan a. An target ho chuan, ‘Hepa hi mi fel tak a lo ni’ an ti ṭan ta a. 

Minister zin hawng lo hmuah leh thlah lam hi an themthiamna ber pakhat a ni leh a. Minister lam ngawi reng mahse; ‘Kapu, i zin hlanin ka pi te lo veivahna, gas ilo vel lo lakna tur motor ka rawn dah dawn em ni? an han tih hi chuan, an thangkam chu a per leh ta tih hriain, “Kapu, a tih dan a awm mai ang” an ti hmak a. An hawn hnu chuan an hnuaia Officer rual hnenah khan, “Kan Minister zin tur hian motor-a mamawh tlat si a. I motor hi hman tir ta mai che,” an ti ve leh tawh si a. Anni hna pawimawh a zin turte chuan an ṭhulh phah rem rum a, pi ber hnenah motor an dah ta ṭhin a ni. 

A chinchhuaka hre ve lo tan chuan, Minister te chu an dem lek lek bawk ṭhin a. Chutia a mamawh em emtuten an ban phaka motor hman tur an neih loh lai chuan, anni chuan a hmanna tur an hriat mai loh, motor pathum ngawt an kawl ang reng lawi si a. 

Minister zin leh hunah hi chuan, hengho sawi hmuh hi a ngai tawh miah lo. Minister khan, “Zing dar 6:00 ah lo thleng ngei rawh se, in driver te pawh hi ka awm loh hlan hian an lo ngeng deuh ṭhin a ni ang; lo in hrilh hlawm teh u. Tun chinah chuan Gypsy pakhat chu englai pawhin kan Bungalow lamah dah reng tawh ula a ṭha ang. Oil thun te hi harsatna lo siam an awm leh ṭhin tih ka hria” tiin pi ber leh an fate zualkona tih hriat fahranin an lo sawi tawh daih zel a ni. 

Kan Minister-te engmah ni lova an tei mai mai laiin, officer lian, a ruk taka an ngaihsan em emten, ninawm khawpa Minister an lenchilh tawh hnu hi chuan an inpawh dawn khawp mai tih hi ring ringawt mai ila, a sual lo hle zel a nia. 

Inthlahrung leh inkiltawih thiam taka Unit hruaitute thlenga dipdal leh hlau der taka a awm thiam danah, a tlangnel hnua an zia tur chu a lang reng mai. Kimki taka Minister koh nghaka an awm lai leh, a han koh pawh a “ Awle ka pu” an tih vat ni leh, ram leh Deptt. hmalakna pawimawh chauh an sawi nite a liam ta a. Tunah chuan mut pindan lama inkoh luh ni a thleng ta a ni. Block, Group, Unit hruaitute an ṭi tawlh tawlh a, an ni an ngampa tial tial a. TIchuan, party mi leh hotu ṭhenkhatten an sawisel ni te hian, Minister ka aṭang chuan “Kan lo hre chiang lo em a ni” tih hi chhanna an dawn theih chu a ni ta si - an lo fel khawp hi an lo ni reng mai a. 

Hetih hunah hi chuan, “A fanu man ka ei ve asin tih te, ka unaupa leh ṭhianpa ve ber a ni asin; ti na zawngte kha chu Minister gate an pelh aṭangin an phun nasa hle ṭhin. Engtizia a hetiang thil hi awm leh tlat ṭhin? Laichin, chipui tih te, politics lama party tih ang chi hi chu, Lal Isuan, “Heng mi rethei te hi chu, in hnena awm reng tur an ni a,” a tih ang deuh khan an awm reng dawn a, ngaihtuah vek sen an ni dawn chuang lo a. Hengho hi chu Officer rual lah hian anmahni kalkana an pen hmawra thil ziah luih tir tuah an ngai a, an phurpui vak lo bawk nen. 

Minister leh Officer liante in hmuhthiamna lo pianna bulpui ber chu patling leh patling inkarah, sum hlawm lian han veivak phawt mai se in hriatthiamna te, fel sawta in hmuhna te, remruat thiam riauva in hriatna te hi a lo piang vat mai zawk a ni. Hetih hunah hi chuan, Mizoramah hian tute pawh hi sorkarin party leh party han inkalh fe ṭhin mahse, hmul ngah pui pui, hlui khat daih zet hi eng Ministry pawh a thlaphang ve hauh lo an awm reng dawn a ni tih hriat a ngai. Heng Officer-te hian tihlawm theih loh an hmu mang lo a nia! 

Minister piangthar, biakina hun an pek ve zauh ṭhin te mamawh pawh an hre vek a, an nupui fanaute chawhmeh duhzawng leh an bun tawk lamin an hre hneh lutuk. 

Heng officer fel zetho hian khawvel an hmuh dan hi an ngaihah chuan an chiang khawp mai a. Sum hmanga tan an han lak hi chuan, Krista lam tang ber nihna dinhmunah te hian an ding ve leh tlat lawi a. Mihring leh thildang an hmuh danah hian engkim mai hi lei theih niin an hre fai vek tawh mai a. An faten humsual pawh dai se, man an ni chhin ngai eih lo, hmeichhia pawh hi an thuneihna leh pawisa hmanga han tihnuih theih loh leh thinur tur hi an hmu mang lo a ni. 

Hetiang ang mi zuah liantu mipui nge thiam lo, anmahni hi tih pawh hriatthiam a har. An hlawh let sawm vel hi an chhungkaw mamawh leina a ni a, chuti chung chuan zahna an nei lem lo.

Heti taka Officer fel ta mai chu sorkar hian, “Nang zawng in fel em mai a, in in lamah lo va chawl hahdam ula, thla tin inhlawh hi chu sorkarin an pe zat zat ang che u!" han ti thut mai sela chuan, zan khat thila an signature-in awmzia a nei tawh lo mai tur an han ngaihtuah ang a, ‘â’ thut ang tih hlauhawm tak a ni.

An tan chuan thawk lova hlawh lak ai chuan, thawha an hlawh let chawi pawh an thlang fe zawk awm asin? Delhi lama an zin tumte hian a ni an ropuina a lan chianna chu! Tribal ve tho kha Airport-ah vai palian pui pui ten DLH leh WBC tih ang reng Car-in an lo hmuak a. An suit case an lo chhawk ṭhin hi chuan heng vaiho rilruah eng tak awm ang maw? Order an ziakna kut dinglam kha an tina palh ang tih an hlau hle ta ve ang. 

Five Star hotel-ah zahawm takin an chiauau a, chutah chuan ‘German nge, Japanese nge, Korean nula? tih kha an duh thlanna tur chu a ni tawh mai. Mizote rulru natna em em chu, anmahni tel lova an nupuite zin ṭumte pawh hian, hetiang vai palian pui pui bawk hian an lo hmuak a ni a, Luka te Paula te ziak an chhiar hrep ang tih kan ring ngam hauh si lo. Ngaihtuah awm ve tak chu an ni! Pa ber remruat a ni miau si a, vantlang chunglam zela thawhlawm thawh chi an ni a, kohhran leh Y.M.A te pawh hian an malmak thei lo chu a ni ber e. 

Office hna an thiam viau chung hian an Deptt. enkawl lai chuan hma a sawm ngai hauh thung lo. An pawisa khur ber chu:

1) Financial Year tawp 2) Revised Estimate 3) Sorkar tana ram lak (Land Acquisition) 4) Office leh Quarters lei (purchase) te hi an ni deuh ber. Office stationary tih bawr velah hming a ti chhe duh reng reng lo. Chung chu an hnuaia officer leh clerk ho tan an hlui ve mai ṭhin; Officer fel nih hi an hlawh daih lehnghal. 

“Mizoram hi heti ringawt hian awmin kal ta zel se, Nagaland leh Manipur aia hluar hian eirukna leh nun uluk lohna lamah kan mualpho mai dawn em? Hetia mipui chanai eirua mahni leh fate mipui chunga vawrh san vak tuma mipui ber mangnghilh si hian mipui thinrimna lo thleng tur chu a rapthlak hle lovang maw? Mirethei beidawng rual zinga thawhchhuah mil lova hausak fal bik hlauhawmzia hi hriat a hun e."