RALKHEL DAR KAN VUAK DAN HI

Hripui leng hian min va tibuai tak em! A dawnsawn dan pawh thiam a har khawp mai, chiai avanga ṭul lem lo kawng zawh pawh kan nei tawh ngei ang.

MITE CHUAN: Pu Mahuma IFS, Ambassador to Slovakia chuan hetiang hian a sawi a, "He Covid-19 hrik kai apiang hi hri vei an ni lo! Kan media leh sorkar thupuanah te, mipuiin kan sawina reng rengah hian hri kai apiang hian natna khirh leh ṭihbaiawm ber an vei emaw kan ti vek hi ngaihtuah nawn teh ang u! A symptom engmah pawh nei lo hi chuan an 'vei' lo a nia.

A hrik kaite kan buaipui chiam chiam dan pawh hi ennawn a ṭul ka ti. A rang thei ang berin kan la hrang a, mak taka inthuamte lo kalin naupang te te pawh ni se an chhungte tel loin an phur bo nghal chuk chuk a! A ṭih-baiawm thei ang bera an che vel hian a hrik kaite leh an chhungte bakah mipui vantlang pawh a tiralkhel lutuk. Heti teh vak hi a ṭul em ni?

Kan awmna Slovakia-ah hian hrik kai mi 3536 an awm tawh a, 33-in an thih phah tawh a, 2192 an dam fel leh tawh. Active case 1311 a awm mek tihna a ni. Heti chung hian damdawiina awm chu mi 70 chauh an ni a, ICU-ah 7, lung ventilator hmang 3 an awm. A bak zawng 1241 chu mahni inah an inkhung hrang mai asin. A symptom nei pawh an nat vak loh chuan damdawiinah an awmtir kher lo tawp mai! 

Hrik kaite pawh hi an puangzar chiam lo a, veng pum lockdown tih lam an sawi ri lo..." He thu hi FB lama a thu post, WhatsApp lama kan lo hmuh a ni.

KEINI CHU: Kan ṭhenawm te hian, Aizawl khaw pawnah leipui an nei a, khaw ṭhenawmte'n lockdown an lo nei a, an chuktuah huan chu an khaw thlen hma daiha awm a ni, an ramriah duty insiamin, an feh tur chu an lo dang tlat mai a, an khaw thleng kal tur pawh an ni lo, mi hnathawk tur lo dan kha, a va han ṭul lo tak em.

Thingtlang hmun ṭhenkhatah lah, lockdown an tih chuan, tumah ram lama kal pawh an phal lo, ramhnuai leh lo lamah an va awm huai huai pawh a ni si lo, hna thawk thei lovin kan inkharkhip tlat maite hi thil tha ber a ni dawn em ni?

Aizawl veng ṭhenkhatah pawh, an veng mi leh +ve an thawkho tih mai vangin, veng pum lockdown an puang nghal hmiah hmiah mai bawk. +ve in a tlawh chhungkuate kha chhuahtir lo mai se a tawk mai lo em ni? 

Thil nuihzatthlak deuh mai chu, mitthi vuina Hall-ah, mi 50 bak luh phal lovin, a lut chhunte chu, inkar hlat tak takin kan ṭhuttir a, vui programme a zova, inkar hlat taka ṭhute kha, dar insi rialin mitthi thla kan lakpui leh tho si a, hei hi awmzia awmin kan hria em?

Covid-19 +ve te lah chu, a ralkhel thei ang berin hospital-ah kan phur lut a, chutih laiin natna lang chhuak awm lote chu, hospital lam chuan, anmahnia inenkawl tirin, damdawi an chhawpsak mai a, an zinga va kal sek kha a hautak mai mai a, chutiang baka enkawl dan vak a awm chuang lo. A ralkhel thei ang bera zan tairek thleng thlenga va phurh chhuah vel kha a ṭul lem em ni?

HLAUH DAN UCHUAK: He hripui hi tualchhungah a darh tawh, fimkhur chu a ngai khawp mai, he hri hi, hri inkaichhawn awl a nihna hi a hlauhawmna lai tak chu a ni mai. Hri vei apiang an thi tih chu ni se la, uchuak taka fimkhur pawh a awm khawp mai, mahse khawvel pumpuiah, hri vei 1% vel chauhvin an thihpui, thihpuitute chu, natna benvawn neisa leh, upa chak tawh lo lam an ni ber. Chutiang chu a ni tih hre reng mah ila, kan chiai buai em em ringawt mai hi a dik ber em? 

A VAK BO MAI DAWN LO: He hripui hi a danna emaw a damdawi tak emaw hmuhchhuah a nih hma chu, kan zing aṭangin a vak bo mai dawn lo. Chuvangin lo dawnsawn dan kan thiam loh chuan, ṭul lovah keimahni kan inhrem hrep thei zawk a ni.

Hlauh loh tur kan tihna chu a ni lo, fimkhur taka dawnsawn dan kan thiam a ngai, mikhual kan la hmelhriat chian loh hi, duh lo hle mah ila, kan zingah a lo cheng ve tawh miau si a, chenpui dan kan thiam loh chuan, rilru lama harsatna nei kan pung hluai thei zawk asin.

Hna thawk thei reng, thawk thei lova kan insiam fo phei chuan, a tuar tur chu keimahni bawk kan ni ang. Hei hi erawh hria ila, khawi aṭanga kai nge ka nih tih hriat lohna khawvelah kan lut mek a, tu pawh mai hi kai thei dinhmunah kan ding vek tawh. Fing tak leh huaisen taka hmachhawn a ngai tawh zawk a ni.