MANGṬHA LE PRANABJI

Kum 2020 zet zawng, chhiat­pui kum a ni ber e, India leh khawvelin mi ropui leh van­tlang chunglam a chan hnem ta malh malh hle mai. 

August thla ni kâwla liam mek chuan India rohlu pakhat a her liampui leh ta. India President kalchhuak tawh Pranab Mukherjee-a chu kum 84 mi niin Thawhtanni, Aug 31 khan a thi. A thih thu hi a fapa Abhijit Mukherjee-an a puang a ni. Pranab Mukherjee-a hi August ni 10 khan a thluak lam harsatna avangin Army Hospital New Delhi-ah dah thluak lama harsatna avangin dah luh a ni a. Covid-19 a positive tih hmuh chhuah a ni bawk. Hospitala a luh hnuah hian a thluak zai a ni. Indian politician zinga hlun ber pakhat hi kum 2012-2017 chhûnga India President hna a chelh hma khan India sawrkar hnuaiah hna pawimawh tak tak a lo thawk tawh a. Kum 2009-2012 chhûng khan Finance Minister hna a chelh tawh a, kum 2004-2006 chhung khan Minister of Defence hna a chelh leh a, kum 2006-2009 chhûngin External Affairs mawhphurhna a chelh leh bawk. Politican thawm na tak ni lo mahse, mawhphurhna pawimawh chelhtu zinga langsar leh a hna te tlin taka thawk mi a ni.

Congress mi leh sa a ni chungin NDA sawrkar hnuaiah pawh India ram thatna turin theihtawp a chhuah thin a. Prime Minister Modi-a pawhin a hnen atanga sawrkar kaihhruaina kawngah thurawn leh kaihhruaina tam tak a dawn thu sawiin a uizia a sawi. Pranab Mukherjee hi India sawrkar tana a hnathawh that avangin kum 2008 khan India mite chawimawina sang Padma Vubhushan leh kum 2019 khan Bharat Ratna chawimawina tangkapui a lo dawng tawh a ni. 

Indian politician-te zingah chuan tawn hriat nei tha ber pâwl a ni. 

India ram hruaitu pawi­mawh ten an uizia sawiin Defence Minister Rajna Singh-a pawhin, "A thihna hian min thawng hle mai. India mipuiten an zah em em a ni a. A thihna hi mimal tak pawhin ka tân chânna a ni. India ram chanchin a hriatna a zauin a tha êm êm a, ram kaihhruaina leh venhimna kawngah te hriatna chhenfakawm tak nei mi a ni" a ti. Prime Minister Modi-a pawhin "President a nihna angin Rashtrapati Bhavan hi amah vangin minaran te an tlangnel phah a. President chenna in chu zirna hmunpuiah siamin, hnam nunphung leh zia, science leh thu leh hla thlenga zirna hmunah a siam a. Ram hruaina kawng a ngaihdan fing tak min hnutchhiahte chu ka theihnghilh tawh ngai lo vang," a ti.

A hun tha zawng zawng India ram tân a hmang ral a, a that laia a tih theih zawng zawng a tih zawh hnuin a hmangaih India ram chu a lo mangtha ve ta. India pawhin amah hmangaihtu hi a uiin a sun takzet a. India rama a thil hnutchhiahte chu thang leh thar zelte la rawn zir turin a hnutchhiah ta a ni. Pranab Mukherjee-an India ram tana a hnathawh leh a hnutchhiahte hi sawisen a ni lovang. 

Mi retheite chawisanna ngai pawimawh a ni a, "Riltama mite siam tluka mihring inhmuhsitna a awm tawh chuang lo" tiin a sawi thin a. Politician rilru nghet, a pa tet ang aia a ngaihtuahna lian, India tâna hnuhma lian tak tak hnutchhiaihtu, economist ropui leh a politic zingkawnga chiai ve mai mai lo, nghet tak leh dam dapa kal thin chuan mual a lo liam ve ta. Mangtha le Pu Pranab Mukherjee....

Keini hian kan thih hnuah kan thlanlunga ziah tlak eng thil tha nge hnutchiah kan neih ve ang le?