Abu Mazumdar kha kan la hre reng
Mizoram leh Assam ramri buai laia kum 2021 September 26 a Assam leh Mizoram Chief Minister te, Delhi-a an inhmuhnaah khan Smuggler Abu Mazumdar chu sorkar mi pawimawh official delegation inhmuh khawmnaah a lo tel tawh a, BJP Mizoram chuan a tel theih chhan Assam lam an zawt chianga Assam lam hruai ni loin Mizoram hruai ngei tih an tarlang. He smuggler tho hi Assam Police chuan kuhva tawlh ruk avangin an man a, bail-a chhuah lailawk a nih chhungin Kolasib lamah hmuh a ni. An hmuhna hmun hi hmun biru pawh ni loin Kolasib Fast Track Court sakna tur lung an phumnaah a tel. He Pa tho hi Supply Minister Pu Rintea in ni ngeia langah MNF hruaitute nen chaw an ei lai thlalak a awm bawk a, kha tih hun laia kan sawi duh loh kha tunah hian a sawi a hun ta, Abu Mazumdar-a pawisa hmanga inthlan campaign tum an awm em ni? Kha leh chen kuhva smuggling ualau taka a kal char char chhunga sum tuak kha an awm em ni? Heng zawhna hi chhang thei awm se, tumahin smuggling sum hi an hmang dawn lo a nih chuan a lawmawm a, kan lawm a kim theih loh chhan chu Assam sorkar in smuggling avanga an man ni si ualau taka Mizoram sorkar hun pawimawhah a lang ngam kha Mizo mipui zah lohna lian tak a ni tho tho.
ZPM in kha tih laia thu an chhuah khan "Kan ram min kaihruai mektu MNF ten kan ram an enkawlnaah hnamdang an duhsak dan te, dan pawisa lo leh dan zawm lo te an vulh len dan thlirin hnam party inti te ber hian kan hnam hi an hralh mek em?" an ti a, Pu TBC Lalvenchhunga khan "Abu Mazumdar hi Assam sorkarin wanted tia treatment a pek, a hnua tlanbo zui ta a ni a, March 11 khan Dholai PS-ah in surrender a ni. Anticipatory bail la mah se a case dang pahnih vangin man zui a ni ta tho. Tunah hian bail-a chhuak a ni a, bail condition hi kan chhuizui a, Assam chhuahsan thei a ni em tih leh Mizoram rawn lut tura ILP hi tunge sponsor tihte hriat kan duh," a ti hial a ni a ziakin a la awm a ni he thil hi.
Abu Mazumdar hi M/S Agro Fresh Training Corporation neitu supplier a ni a, dan loa sumdawnna (smuggling) a kalpui vangin Dholai PS-ah kuhva rah (Arecanut) case a neih bakah Rangirkhari PS ah pawh fertiliser case (smuggling tho) a nei bawk tih a ni lehzel a, Abu Mazumdar-a ṭhu rualpui tute hi chu inthlanah hian kan thurual pui zui zel a ṭul ber em ni?
- Romalsawma