UI SA EI KHAPNA THUPEK – NAGALAND-AH GAUHATI HIGH COURT-IN A TIHTAWPSAK
Gauhati High Court, Kohima chuan tun hnai khan Nagaland sorkarin Chief Secretary, Nagaland Government notification dated July 4,2020 hmanga ui sa ei, hralh atan, state dang aṭanga lakluh te, ui sa ualau taka bazar hmuna zawrh te, restaurant-a ui sa siam KHAPNA thu pek a chhuah chu a hnawlsak a ni.
Nagaland Sorkar thupek hnawlna hi single judge bench, Justice Marli Vankung awmnain a ngaihtuah a, hetiang hi a ngaihdan a ni.
“...he court-in a ngaihdan chuan Chief Secretary hi he khapna thupek chhuah hi a thu neihna hian a huam chiah lo a, (not the appropriate authority to issue the impugned order dated 04.07.2020) section 30 of the FSS Act, 2006 hian Commissioner of Food Safety state-in a ruat ang a, chumi chuan he danin a sawi ang tak hian chaw atana him leh he dan vekin ṭul a tih apiangte a ngaihtuahin a enfiah ang.”
He thubuai ngaihtuah tura thlentute hnenah hian Kohima Municipal Council-in Import/Export permit dated June 3, 2020-ah a lo pe a, chumi ang chuan eizawnna atan Kohima khawpui chhunga ui lakluh leh ui sa zawrh phalsak a ni. Hetiang phalna pek a nih mek lai hian, Chief Secretary chuan notification dated July 4, 2020 chhuahin hmun dang aṭanga ui lakluh khap te, (banning the commercial import) ui hralh leh zawrh khap te, ui sa hralh leh chaw dawra zawrhte a khap a (trading of dogs and dog markets as well as commercial sale of dog meat in markets and dine in restaurants).
He thubuai High Court-a thlentu hian he khapna thupek - Article 226 of the Constitution of India a kalh bakah, Articles 14, 19 & 21 Constitution thu angin ui sa ei duhte chanvo – fundamental rights bawhchhiatna a nih mai bakah leilung dan kalh (violation of principles of natural justice) a ni, tiin he thupek - Chief Secretary order hi hnawl/sut turin a thlen ta a ni.
Thubuai thehluttu aiawha ding chuan Food Safety and Standard Authority of India-in August 06, 2014 khan thuchhuah a siam a, chumi Regulation 2.5 of the Food Safety and Standards Standards and Food Additives) Regulation, 2011 hian ramsa, ran thi ruang leh sa (animals carcass and meat) chungchang a sawi a, sub-regulation 2.5.1(a) ah hian ‘animal’ chungchang a sawi leh a, hetah hian ui leh ui cho lam thil hi sawi tel a ni lo a ti.
He thubuai thehluttu hian kum tam tak chhung ui leh a sa zawrh chu eizawnna atan a lo hman tawh thu court hi a hrilh a. Ui sa ei hi Naga hnam hian a hun chhui kir theih tawh loh khawpa rei, an pi leh pu aṭanga ui sa ei hi an lo chin tawh thu leh an nuna bet tel tlat a nih thu; court hi a hrilh bawk a.
Thubuai thehluttu leh Sorkar lamṭang ukil-te hian Dan chi hrang hrang an ṭanchhan a, an ṭan hmun sawh nghet tura an inhnialna leh an hnial khan hrang hrang te chu ngaihnawm hle mah se, sawi tel vek lo mai ang.
Nagaland state cabinet thu rel angin Chief Secretary hian Nagaland chhunga ui sa ei leh zawrh khapna thupek hi chhuah a ni a. Hemi chungchang hi State assembly in a rel a, passed a nih loh avangin Notification 04.07.2020 hmanga ui sa ei leh zawrh a lo khap chu Gauhati High Court, Kohima bench chuan a hnawl (set aside) ta a ni.
Case title : Neizevolie Kuotsu alias Tony Kuotsu and 2 Ors v The State of Nagaland and 6 Ors.
Corum : Justice Marli Vankung
HEI VE HI :
Mizoram chhungah Ui talh khap duhtu tun hnaiah an awm a, Gauhati High Court thutlukna en hian State Assembly-in a pass ngai niin a lang a, zawm hleih theih loh tur khapna siam ve hi ṭul kan ti em?
Source :
Live Law
June 6, 2023
- Huna Kawlvawm