Hnam Thawnthu: Tap (Ka Pu titi)
He ram hian kawng dik a zawh em? kum 20 dang lo awm leh turah hian Kan ram hi eng dinhmunah nge a din dawn? Zawlnei nih hranpa ngai lova hrilhlawk theihna thlarauin a pawl mai theihna tur che, Thawnthu, a khuh hawnna atana hlachham ril aṭanga bul ṭan, Ka pu titi hian Kum 2040 January Ni 17 zan aṭangin a hruai ṭan che ang a, i chhiar zawh meuh chuan in veng pa rawnkai i ni ngei ngei ang.
"Tunhnaia Lehkhabu chhuak thar, Hnam Thawnthu: Tap (Ka Pu titi), B. Lalrinhlua ziah hi lo chhiar ve teh" han ti teh tawp che ila, tunlai chhana lehkhabu chhiar peih lo i nih chuan 'Vawk hmaa tuikeplung paih' ang maiin ka chil per pawh ka ui.
Thawnthu ngaihnawm hmanga kan Zoram dinhmun saihlum chhiar aia changkang zawka bihchetna sapṭawnga (Statistics) an tih ang hi rintlak leh belhchian dawl taka hriatna, titi nikhua leh thusawi rintlak thal chhuahna tuikhur thar a ni e.
Bu chhah chiam a ni lo va, chhiar chhuah huphurhawm lo takin a chhung thurem a felfai a, i inrin loh lai takin i chhiar zo thut mai ang.
A chhung thuah Economics leh statistics, Zopa tapchhak zawl titi, tu tan pawha hriatthiam loh theih loh turin a zep a, thu har leh Number chhinchhiah chi ngaihtuah hauh lovin i chhiar ang a, i chhiar zawh meuh chuan i rilruah a cham veng veng mai ang.
Eng hnathawk leh eng mi pawh ni la, he lehkhabu hi a ṭangkai:
Zirlai tan : I chhiar loh chuan hmalam hun hna zawn kawngah harsatna i neih pawhin he lehkhabu hi i chhiar loh vang a ni pakhat ang.
Politician leh kan ram veitute tan: He lehkhabu chhiar lo hian uar takin thu sawi duh suh, belhchian i dawl chuang lo ang.
Thuhril leh evangelist tan: Bible behchhan leh he lehkhabu behchhana thuhril i nih ngat chuan, rawngbawltu tunlai leh hriatna zau, kohhran chawm nungtu nih theihna.
Thu leh hlaa tuite tan: Pûr chàwkna tling, thu hla ril puak chhuah theihna, inspiration bawm.
A dang pawh a la tam mai, Thu lakna lehkhabu leh a behbawm 45 zet leh, ama tawnhriat aṭanga he lehkhabu hi khawrpum a ni a, a kawm (cover) tel lovin lehkha phek 179-ah awlsam te tea thu tawi tek tawk leh, thu sei deuh remkhawmna a ni a, i chhiar ve loh atan hian ka ui ngawih ngawih.
- C. Lalsangzuala