VC THAR NEIH LEH RAM ṬHEH TUR REL A IN NANGCHIAH

Kan hripui leng mek hian a va daih rei ta em! Mi thiam tam takin he hripui hi ṭamin zui ngei turah an ngai. A chhan sawi tam a ngai lo, kan India ram ngeiah pawh mi hausa farm-a thawktu tam tak hna thawk thei lovin mahni in lamah an haw a. Mill leh Factory tam takin hna thawktu an tlachham. Agiculture thar chhuah nasa taka tla hniam tura chhut a ni. 

Engtiang takin min nghawng ve dawn kan sawi thei lo. Thing bul lam a chet chuan a ler chu nasa lehzualin a nghing ṭhin. Bak hawlfung pawh a bul kan sawi chet hlek chuan a ler lam chu a lo firfiak thuai thuai tawh ṭhin. Kan chaw bel pui berte an ṭam chuan keini, an zar zotuho tan chuan thil huphurhawm tak a ni. 

Thingtlang khaw tinah Village Council thar kan neih leh Lo tur atana ram ṭheh rel hun a in nangchiah. Khaw tam tak, Mizo lo neih dan pangngaia neite chuan September thla chhungin ram ṭheh tur an rel fel ang. Khawtlang roreltu tharte hian ṭam mai thei dinhmuna ding kan ni tih inhriaa ram ṭheh tur rel a pawimawh ang. 

Tuna kan dinhmun­ah chuan Thingtlang khaw tam takah thlawh­hma a hlat deuh chuan eizawnna dang nei lo pawhin a hla em mai ka nei peih lo tih mai mai kan ching. Chu chu hriain khaw­tlanga lo neih bak eizawnna dang nei lo zawng zawngten Lo an neih ve theih dan ngaihtuah a pawimawh ang. 

Lam hnai ram ṭha a awm lo a nih pawhin feh kawng motor kal theiha siam tura ṭan lak a ngai a, sawrkar pawh a theih ang anga ṭan a lak ve a ngai a ni. 

Ram awm lo ni si lo va, eizawnna dang nei si lovin thlawhhma kan la lo ringawt mai ṭhin hi thil dik a ni lo tih hria ila. Thawk mawh deuh chhung pawh Mizo takin khawtlangin kan khai chhuak ṭhin a, chutichuan an kum chanve ei tal an lo thar ve ṭhin a nih kha. Kumin chu chhung tinin ṭan in la teh ang u. 

Ration buhfai khulna tur dap chawpa nung hram hram kan nih lohna turin kan ven theih tawk thlawhhma, ṭin khat hmun emaw tal la i la ang u. Thawk lova sawrkar ṭanpuina nghah ngawt mai hi ram mipuite tih dan phung tur a ni lo.

Tlang ram lo neitute hi Mizorama eizawnna kawng hrang hrang zawhtute zinga rilru ṭha ber an ni ka ti ṭhin. A chhan chu sawrkar puihna lovin kan chaw pui ber buh an thar bakah, thlai tam tak an tharin khawpui chawmtu an ni a. An thlawhhma neih ṭan­puina tura sawrkar puihna phutin nawrh an huaihawt ngai lova, vuivaina thu an thlen ngai hek lo. 

Anmahni tawkin an feh kawng laihna tur an ngaihtuah chhuak a, a chhia an siam a, sawrkar an phut ve ngai lo. 

Eizawnna kawng zawhtu group dangte hi chu sawrkar ṭanpuina beisei, sawrkar puihna lova tih tum reng reng lo te pawh kan ang ka ti ṭhin, leilet neitute thleng hian. Mahni tuilakna pipe chhia pawh repair tum lo, mahni feh kawng chhia pawh siam tum eih lo te kan tam ta mai. 

Tui zem, tui pipe, kawng siamna, a chi tur, a ṭiak phun tur, vawk te no, sangha chi tih vel besei deuh vek kan ni ta mai. 

Sawrkar pawh hian ṭanpuina a pek tam tawhzia ngaihtuaha an beisei ang hlawhtlinna an hmuh lohzia chhuta system dang ngaihtuah a hun ta hlein ka hria.