ZPM HI AN "ÂT HUAI" EM NI?

Kumin kum tawp lamah MLA inthlan kan nei leh dawn a, thla ruk vel a la awm laiin ZPM party chuan an Candidate tur an puang zo deuh der tawh mai a, bial hnih velah chauh an la puang lo a ni. Hetih lai hian dangdai ang reng takin MNF leh Congress te chuan bial hnihah ve ve chauh an Candidate turte an lo puang tawh thung a, a bak chu an la puang lo a ni. Tun hma lamah kha chuan Pol.Party tinte hian Candidate puan dawn aṭang hian an inkhel ṭan kha a ni deuh ber ṭhin a, chumi chu chumi biala a din chuan chumi chuan khing se a hneh thei ang, ti ang deuh kha an kal dan a ni fo ṭhin a ni. ZPM-in Candidate (bial viltu an ti) puang hmasa bera an ṭang hi an at huai nge; eng vang nge tih hi keini ang tan chuan hriatthiam a har mang e!

Lunglei Municipal Council(LMC)inthlan zawh takah khan Candidate puang hmasa ber kha ZPM bawk hi niin ka hria a, seat awm zawng zawng an lak fai vek avang khan kha strategy bawk kha MLA election atan an hmang nawn leh em ni ang le? Party naupang ber leh tharlam tak an ni chunga tu mah han khelh leh ngaihchan pawh awm lo va, mi dang rawn khelh tura an inpho chhuak ngam hi an at huai nge 'Kalphungthar' an hmang ṭan zawk le? Kawng lehlamah chuan an elpui tur party lian pahnihte hi party ngialnghet an nih avang hian ZPM Candidate hian ṭan lak nan hun tam zawk an mamawh vang a ni thei bawk awm e. LMC leh Zemabawk LC leh Durtlang Leitan LC bye-election-ah an chet ṭhat em avang khan an phur hle a, kar tin deuhthaw mi thar lawmluhin a zui deuh reng bawk avang khan an phurzual a, Candidate puan vata hma lak nghal ṭul an ti a ni thei bawk ang. Hetih laia Party lian pahnihten Candidate pahnih ve ve chauh an puang a, a bak an la ngawi vung vung si hi hriatthiam har lai tak a ni a, an puang chhangkhat hle a ni. Thuthang leng vel, MNF leh Congress party chhungah hian Candidate siam mai harsatna lian tak an nei ve ve an tih hi a chhan a ni thei mai ang em le? Congress party hi party ruhrel lian an ni chung hian, an party chhungah harsatna lian tak an tawk mek niin a lang a, hei bakah hian mi thar lawmluh turte aṭanga candidate siam an tum tih thawm a awm bawk.

Rin loh takin MNF chuan an Minister lar tak leh, Phullem phah chak tak Pu Robert Romawia Royte chu a bial chhuahsanin Hachhek biala a din tur thu; CM-in a hmun ngeiah a zu puang a, mi dang erawh a puang chhunzawm lo thung. Hei hi a chhan hre ve loten an inrinsiak a, a bialah hian a tlin zawh a inring tawh lo va, a insawn tih te, hun rei tak aṭang khan a lo zu vil tawh a, Phullem pawh khaw inhnaih tak takah a zu phah a, hmun dang zawng aia a zin fo chhan kha niin an sawi bawk a. Mi ṭhenkhat erawh chuan MLA a tlin hlima a thutiam leh mipui nghahhlelh tak, Armed veng lei che ṭhin dawlna tur (Check dam) siam kha engmah hmalakna a awm lo va, ding nawn ngam tur a ni lo an ti bawk.Hetih lai hian mi ṭhenkhat chuan tun dinhmunah hian rorel lai party tan Aizawl khaw chhungah tlinna chance a hniam hle a, Pu Robert Romawia chu pa fing leh boruak thlir thiam an lo ti ve mek thung a ni. Hei mai bakah hian MNF hian Zemabawk LC by election result avang khan an President leh CM ni mek chu bial hniha dintir an tum a, an MLA ding lai zingah hian seat pek tum tawh loh an nei tihte leh bial inchuh vanga la tihfel harsa deuhte chu candidate tihfel harsat chhan ni a sawi a awm bawk.

ZPM hian LMC inthlanah khan Candidate an thlang uluk hle niin an sawi. Mi ṭha leh rintlak, Politics la luhchilh ngai lo, khawtlang tana mi ṭangkai, party-a membership fee pek chawp ngai thlengin an sawmkhawm niin an sawi. An candidate ṭhenkhatte phei kha chu Minister rualten lenchilha an sawmna pawh lo hnar fithlatute an nih thu thlenga sawi a ni. Mi thar leh khawtlang tana mi rintlak an zawngkhawm kha ZPM khan an tifuh hle mai a, candidate pawh kha an puang hmasa ber a, LMC seat awm zawng zawngah khan hnehna sang tak nen an tling (solid) a nih kha.

Tun ṭuma an MLA candidate tur an puan tawhte zingah pawh hian mi thar hming a lo lang leh ta nual mai. Politics la luhchilh ngai lo, mahni kalna lama mi hriat hlawh tak te, mi thiam kan tihte leh Kohhran pawl hrang hranga mi thlengin, an invuah kim viau niin a lang. Ram hruai hna thawk tur hian tawnhriat lo nei tam tawhte chu an ṭha zawk tura ngaih a nih laiin, a pawimawh lai ber chu an lo thawh tawh dan kha a ni. Ram hmasawnna tur hriat belh zel lam aia hausak belh zel ram hruaitu kan nei ṭhin a nih chuan, chutiang mi chu rorelna hmuna ṭhu ve reng tlak an ni lo va, mi thar ṭha zawkin kan thlak vat tur a ni.

Kan hruaitu ṭhenkhatte hi chu duh aiin an hausa chak mah mah tih hi mipui titi a ni mek a, lo inenfiah hlawm teh se. Ram hmasawnna tur pawisa lo hausakpui an awm chuan mipui min rawk tihna a ni a, ram hmelma an niin thlak vat tur an ni mai.

Kan thupui khi han um zui leh ila, ZPM hian an MLA candidate an puang hmasa leh ber hian, zawngchhang chhan an nei turah ngai ila, an "At huai" ni lo turah ngaihsak phawt mai ang aw!

- Benpuia-pu