INKHUNG HRIH TUR I NI E

Covid-19 kan buaipui dan a dang hret hret zel a. Ramchhungah Hrikai (positive) pakhat kan hmuh khan kan vai hlauh a. Phaia lo haw tur an awm avangin AMC Area kan lockdown tawh nite a lo awm tawh a. Hri darh hlauh vanga thla 3 dawr khartirte pawh an awm a nih kha.

Kan boruak a lo dang ta hret hret zel a. Sawrkar laipui (Central Sawrkar)-in a thu lo chuan ram inkharkhip (State Lockdown) puan a phal ta lo a. Total Lockdown hi kan puang leh mai tawh lo mai thei a, kan boruak tawn ang zel phei chu a ni thei ang a.

Tunah chuan a vanduai duai tlâkah tih a ni ta a, chumi office/dawrah chuan hrikai (positive) a kal, heng hmuna kalte hi inkhung vek tur (Home Quarantine) tih thu kan hre ta thut thut zel mai a. Thuawih vang leh mi dang him nan kan inkhung ṭul ve pawh lo ni se, kei chu ka kai ka ring lo, ka fimkhur em mai ti thei zel turin awm ila.

 

Mi test result-ah hun rei tak kan innghah a ngai a. Test lah hi a hrikaite bul hnaia an awm aṭanga ni 5 emaw tal nghahte hi an duh ṭhin a ni. 

Mi test nghak 

ṭheuh ṭheuhah thlamuang deuh leh thlamuang lo a awm theih viau a. Mu ṭha lo, chaw ei tui lo a awm theih viau a nia.

Tin, hrikai hnaihtu emaw hrikaite hming puanzar hi a ṭha khawp mai tih ngaihdan a piang nasa a, a dikna chen pawh a awm âwm e. Amaherawhchu, Sawkar leh LLTF-te chuan mi tin lakah fimkhur tur te, hlam khat bawr vel tal dana awm hram hram tur te, hmai tuam uluk turtein min chah hram hram a, min chah ang hian awm ta ila, hri vei hi an lo pun hunah puan sên an nih loh pawhin kan lo him dawn zu nia.

Mi tu pawh hi hri kai thei an ni tih hria ila, (hmel hriatte leh chhungte an nih avanga ngaihzam bik a rem lo) keimah ngei pawh mi kai darh theitu ka lo ni reng tih hi vawng reng ang u.

LLTF ziaktu pakhatin a sawi hian ngaihtuahna a tithui hle bawk a, "Inlen pawh loh tur, chhuah tlem tur ti na na na a, a bawhchhe ṭhin hi a dawih dawih leh hlauthawngah an ṭang leh ṭhin si a, min be reng mai ṭhin hlawm si a, a manganthlak thei em mai," a ti a, a dik thui fu mai thei. Mi awmkhawmnaah ṭul feah lo chuan tel ve zel tum lo ila, kan awm ve loh theih lohnaah pawh hlam khat dan tal, hmai tuamte ngai pawimawh ila kan him zel nan a va pawimawh em.

Mitthite pawh kan la nei zel ang, Sawrkar dan a awm avangin zawm hram tum zel a ṭha, YMA lam pawhin mi 50 ṭhutna bak an rem ta meuh lo tih hria ang u.

(Positive aiin Hrikaite laka fimkhur hi a fuh zawk mahin ka hre pek a, Social Distancing an tih ai hian mi bul hnaia awm loh hi a him zawk mahten ka hria a. Home Quarantine hi a peihawm loh hmel si a, mahni ina tawm hi a ṭha leh maiin ka hre bawk a)

LO FIMKHUR LA, LO HIM RAWH.