KAN DINHMUN EN CHUNG ZELIN AW NI ANG

COVID 19 hri leng hi 2020 kum tir lam aṭangin khawvelin kan hmel hriat ṭan. Ram tin maiah kan buaipui em em vek a. March thla-ah India a buai ve ṭan a, Mizoram pawhin Lockdown a kalpui ṭan a. Thla 2 chuang lockdown kalpui a nih hnuin partial lockdown kalpui a ni leh a. Unlock kalpui ṭan a ni leh a, hri kai kan awm ta nual mai... 

Hruaitute lu a hai a, Lockdown chu a changin kan thlah dul a, a changin lockdown leh ṭhin a ni. Mizorama hri kaite hi an dam chak a, Lalpa min humhim a ni. 

Hun harsa kan han tawn chiah hian Mizo nih a nuamin, mi harsa leh chhawmdawl ngaite mi awmthei leh mi thil phalten an ṭanpui thawm hriat tur a awm reng mai. Hun a kal zel a, in ṭanpui reng sen a ni lo tih a lang. 

Phai lam atangin bungrua duh khawp hun dang angin a thleng ta lo. A chhan pawh industry leh company lamin hnathawktu an mamawh ang leh materials an hmuh thei bik lo a, kan la harsa tawlh tawlh maithei. Ei leh bar zawn kawngah leh supply hmuh ṭhat loh lamah demand a san chuan thil a to chho zel si a. Hun harsa kan hma lamah a awm thei tlat niin a lang. 

Chuvangin, ei bar zawn kawngah kan thawh theih hram hram a va pawimawh em! Harsatna a lo awma kristian dik tak an lan rualin mahni hlawkna um luat vanga thil to uchuak taka zuar an kat nuk bawk. Mi rethei tan nun a va har sawt ve aw. 

Kan hun tawn mil zela ro rel thiam a ngai ta. Hri kai enkawl mekte an ṭha chhuak zel a, a symtom pawh an nei mang hlawm lo a nih hmel. Hri kai nih a zahthlak lo tial tial a. Kan harsatnain hna thawk lo thei lovin min siam ṭan a, Mizo nunah nupui fanauten an nghei ai chuan eng tin emaw ei tur a ngaihtuah a ngai tho si. 

Kan tunlai hun tawngah hri kan hlauh avangin a veng anga lockdown kalpui a ni fo a. Khawtlang mite hna thawk thei lovin kan awm ṭhiap ṭhuap mai le. Hna thawh duh viau mah ila khawtlang ṭhatna tura roreltute ro rel a zahawm si. 

Khawtlang tana an inpekna kan hmu a, hna thawka chhuah luih ṭalh a inthlahrunawm bawk. Kan khawtlangah eng emaw lo thleng thei reng a ni ta hlawm. A lo thleng a nih chuan, zau taka lockdown kalpui lo zawnga ro rel thiam zel a va ṭul tawh tak em. 

COVID 19 hri kai hi kan cho lo, fimkhur tak chunga kan ni tin ei bar kan dap a ngai ta bawk si a. Ni tin ei bar dap chawpte leh a neinungte pawhin hna an thawh theih tho a ngai. A neinungte zarah nei lo zawkten inhlawhna kan nei ṭhin tlat. 

Veng tin hruaituten hna thawk theia min siam hian ṭanpui ngai bik lovin kan awm hram hram thei zawk dawn niin a lang ta ber mai.