KAN CM THUSAWI KHA...

VC/ LC inthlan result chhuah hnua kan CM-in August 29, 2020 zana Zonet news-a a thusawi kha ka lo ngaithla a. MNF an tlin thu a sawi a, an tling nasa reng mai a. CM chuan, mipuiten pawl danga rinna an nghah lohzia leh MNF-a rinna an nghahzia a sawi a, kan inthlan result, a pumpuia khaikhawmin a dik reng a ni. 

Khatianga an pawlte an chak ta kha lâwmawm a tih thu leh a thlangtu mipuite chungah a lâwmthu sawi zuiin, a tling tate hnenah khan, mipuiin an aiawha an thlante an nih phû zo ngeia rinawm taka ram leh mipui tan thawk turin a fuih zui turah ka lo ngaih laiin, chutiang zawnga kal ta lovin, a tling ta lo party-te diriam takin a sâwt zui taêrh zâwk a. 

Congress chu an bulpui lama an chim chhiat nasat thu leh Mizoramah pawh an mumal tawh loh thu lam a sawi hrep hnuin, ZPM chu an party awm dan an chiang kuang lo tia ama puhdan ang anga sawiin, mipuiten thlan tlakah an ruat lo, a ti êrh bawk a. Ka rilru tê têin, CM atan meuh hi chuan mi rilru puitling deuh, a ram awp chhung mipuite inpumkhat theihna lam hawi sawi thei mi ni se a va ṭha em ve aw, ka lo a. Inthlan result chhuah tawh hnu, a tling lote pawhin, an tlin loh an pawm em em hnua CM meuhvin zu rah hrual zui hrep tak mai chu a hun tawh lo hlein ka lo ngai a ni. 

Hmanni lawk khan Delhi UT an inthlang a, Arvind Kejriwal-a pawlte (AAP) leh BJP-te chu namên lovin an bei a nih kha. Mahse, AAP chu hneh taka tlingin, Kejriwal chu CM a ni leh ta a. Chuta a thusawi hmasaah chuan, inthlan a zawh tawh hnu hi chuan anmahni thlangtute leh thlang lotute chu an sawrkarah ang khat vek an nih thu leh tumah an en hran loh tur thu a sawi  a nih kha - ram pa ber nih a tling hle. 

Politics-ah hian party hrang hrangte awmin, inthlannaah seat an inchuh tlang ṭheuh ṭhin a. Thlan tlin takte chu ram hmangaihtu, politician dik tak an nih chuan, an ram leh mipui tan theih tawp chhuahin hna a thawk mai tur a ni a; inthlan zawh tawh hnu pawha ruling leh opposition thliar hrang rân mai an nih chuan, ram chu a him lo hle tihna a ni. 

Kan chhungte pawh ni se, kan pawl an nih loh chuan engah mah ka ngai lo, tih rilru ang kha chu ṭhan san a va hun tawh em! 

Kan ram rorelna, kum 10 têl eng emawzat chhung hian, ram roreltu ṭha, politician dik tak, ruling party mi leh opposition party mi pawh thliar hrang chuang lova, a ram chhung mipuite tan nu leh pa tak nihna rilru pu phak hi kan la neih loh avangin, ram mipuite hian chutiang mi chu awm thei turah pawh kan ngai lo hial awm e. 

Chuvangin, mipui sawrkar dik tak tih sawi rik lo awm ṭhin te pawh hi, a tak tak awm theiah pawh ngai lovin, kan rilru pawhin kan suangtuah thleng ngai lo pawh a ni hial awm e. Mahse, a tak a awm thei tlat si. Ram hmangaihtu dik CM nei fuh te chu an kâng zawt zawt thei a ni tih state ṭhenkhatah kan hmu a ni. Arvind Kejriwal-a’n Delhi mipui, Mizoram mipui lêt 15.3 zeta tam a enkawl ṭhatzia pawh a hriaten hah$pin an sawi ṭhin. Kan ramah pawh chutiang chu a ni ve thei ngei ang. 

Chuti lo zawngin, party inthliar r$n rênna lam kawng­ah kan kal zel rih si a. He kawng hi chu corruption kawng a nih avangin, kan ram pawh corruption-in min ei chhia a nih hi.