Kawngpui chunga khâmte enfiah a ṭul
Ramhlun South main road leh a hnuaia kawngpui (Ramhlun YMA Hall) lirtheia inkalpawhna kawng chhuk-chho turu lutukah chetsualna a thleng nual tawh a, video pawh social media lamah hmuh tur a awm zauh zauh tawh. Chetsualna a thlen ṭhin vang a ni ngei ang a, Ramhlun South khawtlang hruaitute chuan tunah chuan chhuk leh chho zawnga lirthei tlan an khap ta a; a lawmawm ngawt mai.
Ramhlun South khawtlang hruaitute'n khap an rel lai vela mi tu emaw sawi dan tur ka'n suangtuah vel a: "Kan hriat angin chetsualna a thleng ta zauh zauh a, thihna êm thleng lo mah se, hliam leh lirtheiin a chhiat phah an awm nual tawh. Lirthei tlân theihin hawng reng ila, chetsualna a la thleng zauh zauh zel emaw a ni ang a, tuna kan hriat tawh aia nasa leh rapthlak, thihna hial pawh la thleng thei a ni. Thihna a thlen hma hian, tuna kan tawn tawh chin aṭang hian i harh ang u. Thihna thlengin min nawrh harh hun nghah thlen kher a ṭul lo," tia sawite pawh an awm mahna!
Fûr a lo ni leh ta. Tlang rama cheng kan ni a, mi ṭhenkhat chu hmun âwih tak taka in neia khawsate pawh an ni a, kan kawngpuite pawh khâm hnuaia awmte a ni nawk hlawm. Fûr lai hian Aizawl khawpui chhunga kawngpui chung lam khâm aṭanga lung tla kum tin a awm ziah a, chuvangin, mipui leh sorkar thuneitute kan fimkhur tlân a ngai leh ta hle.
State sorkar, district administration leh AMC lam hian kawngpui chung khàm aṭanga chhiatna thleng palh thei leh, hlauhthawnawm bik a awm leh awm loh lung an enfiah tawh em ka hre lo a. An la enfiah lo a nih chuan Aizawl khawpuia khâm ṭhenkhat–Bawngkawn-Durtlang Leitan leh Chanmari-Chaltlang kawng chung lam khâm te, Ngaizel khâmahte hian mihring tana hlauhawm khawp lung tla mai thei a awm leh awm loh enfiah thei se, mipui himna atan a va ṭha dawn em! Kan sawi lan loh, hmun dang, enfiah ngai bikte pawh a awm àwm e.
Chhiatna thleng theite hi vên theih a ni vek lo a, ṭhenkhat erawh chu vên theihte pawh a ni ang. Se bo hnua se kawng khâr ang mai kan nih loh nan, chhiatna eng emaw thlengin min ben harh hun nghâk kher loin, chhiatna thlen hmaa hmalak a ṭha khawp ang le.
- Kezo