LOCAL COUNCIL & VILLAGE COUNCIL INTHLAN THLIR LETNA

Democracy ramah chuan Local Council & Village Council inthlan hi a hniam ber leh te ber angin lang mah se la, a bul ber a nih avangin a pawimawh ber a ni. Mipite’n ni tina an hmuh theih leh an roreltu an hmuh theihte an ni. Chuvangin, thlangtu mipuite an pawimawh ber a, chu tak chu Democracy rama sawrkar chu mipuite hi an ni ber kan tih ṭhin chu a ni. Chuvangin, mipui tana vote thlak remchan dan tur leh thil felhlel a awm loh nan han sawi ila:

1.    Tun hma aṭanga vawiin ni thleng hian Polling Booth hmunah Voter-te’n an chhutna hmun a êng tawk lo fo mai. Thlantirtute - 1st table, 2nd table leh a dangte chuan êng ṭha tawk an chang ṭhin. Stamp chhutna hmun dawhkan chu lehkha khawngin kan han kaihkul hnan a, a lo thim sawt a, a tira tukverh kiang a nih loh phei chuan duh ber berte hming chhiar a har tawh hle ṭhin a. Chhiar tur a tam si a, kum 50 chin chung lam tan chuan thil har tak a tling nghal a ni.

    Chuvangin, tukverh kiangah emaw a chunga Electric eng ṭha tawk hnuaiah ni tawh ngei se. R.O leh a ho thawktute’n mit fiah lo deuh leh upa lam mit ngaihtuaha polling siam niin, anmahni hruai hial se a ṭha ang. Tukverha mi hmuh an hlauh chuan, puan var pan tak zar mai ni rawh se.

2.    Tun inthlanah hian Vote thi a tam lutuk, khaw ṭhenkhatah chuan Vote thi 200 chuang vel lai a awm a. Hmun dang dangah pawh kum danga inthlan ai chuan Vote thi a tam lawr lak a ni. A chhan chu:

1)    In zirtir lawkna a awm ṭha lo a ni ang.

2)    Candidates hming ziak a te a, a column a inhnaih lutuk bawk.

3)    Voters tan an duh ber ber vote turin Candidate-te chhiar tur a tam a, ni dang aiin hun a duh rei si a, mi an hmanhmawh a, tichuan an chhu sual ṭhin a ni ngei ang.

3.    Polling Booth pakhatah Vote Stamp arrow mark chhutna Table hi pakhat chauh dah a nih chuan, voters 800 chuang an awmnaah chuan voters ho an hmanhmawh ṭhin. Stamp chhutna hmun hi pathum, pali lai dah se, voters te nawr hmanhmawh loin duh an thlang ang a, an chhu sual lo ang.

4.    Result puan lai hian Postal Ballot vote chhiar leh sawi a awm lo a. Inthlan duty khaw danga kal an awm nual a, an vote awmnaah vote an thlak lo nge, R.O-te’n an puan lai reng mipuiin hria kan awm em?

5.    Stamp arrow mark Rubber (Seal) hi a tla thei a, R.O-in a khát tawka a check a ngai, rubber seal hi a lo tlak/thlawn chuan vote thi a siam thei. Stamp Rubber a lehlam a lo tlaka chhut chuan vote thi a ni mai awm si a.

Rawtna:

1.    Tun ṭum inthlan Local Council leh Village Council-a Ballot paper pakhata Candidates hming ziak tlar hi ṭha ka ti a. Mahse, hei aia hming ziak hi fiahin a column lian deuh se a ṭha lehzual ang. Tun hmaa Candidate zat zel Ballot paper pawhthlak a, inpek kha chu - Vote thlak zo lova an vote akchhuak a, vote hralh an awm ṭhin a, chu chu a tibo thei ta a ni.

2.    Voter tamna deuhah Booth tih tam a ṭha ang. A nih loh pawhin a chhutna hmun table hi pakhat chauh ni lovin pathum, li laia tam ni se. Vote thlak a kal chak thei ang.

3.    Polling Booth awmnaa a êng lai ber leh hmun ṭha lai ber chu Voters-hote’n chang se, inthlanna duty-te table chu eng lo lai deuh pawh chang se, a pawi dan a nep zawk ang.

4.    Postal Ballot paper chhiartute’n mipui hriata an puan loh pawhin Counting Agent te’n chiang tawkin hre ṭhin rawh se.

5.    Inthlanna Polling Booth hi pakhat aia tam khaw khatah a awm a nih pawhin Building hran zelah awm se, hrilen lai phei chuan a ṭha lehzual ang.

6.    Kan hmaah inthlang leh mai tur an awm dawn a, inthlanna hotuten a chunga point-te khi hre reng thei se la, fimkhur leh ṭha zawka inthlanna kan neih theih nan hei hi kan hriat atan ka han sawi chhuak ve a ni e.