Mizo leh Infiamna
Tunlai hian Mizoram chhunga volleyball inelna lian ber Tata SK 712 Pro Volleyball League an khel mek a, mipuiin an ngaihluin a hmuna entu pawh an ṭhahnem thei hle – league round an khelh lai aṭang pawhin entu an tam thei hle a ni.
R. Dengṭhuama Indoor Stadium, Mualpuiah mipui tam tak an pungkhawm ṭhin a, Mizo ten volleyball kan ngainain kan hlut hle tih pawh a chiang a, hetiang inelna lian leh ropui buatsaih thei Mizoram Volleyball Association hruaitute an fakawm hle a ni.
Mizote hian volleyball hi kan ngaina a, khawpui chauh ni loin thingtlang kilkhawr thlengin an khel nasa, hei hi a chhan nia lang chu Mizoram chhungah volleyball kan hmelhriatna a rei tawh a, a senso a hautak loh bakah mi tam tak kalkhawm kher ngai loa khelh theih a nih avangin kan ngaina hi a mak lo.
Aizawl khawpui bik thlir ila, ṭhalaite hian tunhma lama volleyball an ngainat tak kha basketball hmangin an thlak mek niin a lang a, hei hi thil mak tak a ni hran lo. TV lama kan hmuh theih langsar leh hmuhnawm NBA ten nasa takin kan rilru a hneh tih a chiang bawk – dem tur kan awm hran lo e.
Thingtlang leh khawpui lo deuh zawkah chuan volleyball an la beng nasa a, tuna inelna lian PVL khelh laiah pawh hian Aizawl khawpui player aiin thingtlang lam an langsar zawk emaw ni chu, tih theih a ni bawk.
Eng infiamna pawh khelin ngaina ila, a pawina a awm lo, infiamna a nih miau avangin taksa leh rilru hrisel neih theihna a ni a, sum leh paia kan hlawkpui thur thur kher lo a nih pawhin hriselna kha kan infiamnain a rawn ken chhuah a nih chuan, kan hlawk em em vek tiin a sawi ngam.
Volleyball leh basketball hi Mizo ṭhalaite tan ei zawn nana hman chu a la harsa deuh mai thei, kan pianphung pawhin a tlin chiah lo deuh niin a lang, ṭhangthar tam tak erawhin an pianphung pawhin an cho phak chho mek bawk.
Infiamna leh hriselna a inzawm tlat a, eng infiamna hmang pawhin inkhelin sum leh pai sengso mah ila a pawi lo – Mizo ṭhalaite kan hrisel phahna a nih dawn phawt chuan a pawina a awm lo.
Kan ngaihtuah tel ngai erawh a awm, state pawn aṭanga infiammi chàwk luh aiin tualchhung mite hmun kan siamsak tam a pawimawh hle. PVL khelh laiah hian Thutak Nunpuitu Team (TNT) chauh chu state pawn aṭanga player lalut lo awm chhun an ni a, ropui takin final an la lut thei lehnghal –anni hian entawn tur ṭha leh ropui tak an hnutchhiah niah ka ngai.
Mi inphalten sum leh pai kan hman hi tualchhung player ten hlawkpui ber se, nakin zel atan a tloin a fuh a rinawm. Chutihrualin state pawn aṭanga player lakluhte hian inkhel an tihmunawm a, entu mipui an hip bawk avangin khap ngawt chi chu a ni hauh lo.
A pawimawh ber chu – Mizo ten infiamna kan ngai a, sum pawh kan hmang nasa zel dawn – a hlawk ber chu Mizote kan ni a, ni zel thei ila a duhawm hle. Mizo ṭhalaiten thlan chhuaka infiamna i ngaina zual deuh deuh ang u.
- Rema Ralte