Tunlai Zoram Politics Chírí

Tunlai chu Social Media hi kan beng ber a nih tawh avangin Mizoram Politics hi kan lo hre ve ṭhin a, kan hriat phak ang ang aṭang hi chuan a chírí hle tih hi kan hmuh dan a ni. Rorel lai MNF hian tlin nana inring lovin tlinga an rin ZPM an bei a, Congress hian an tlakchhiat hlen hlauvin ZPM bawk an bei a, ZPM hian anmahni ZPM bawk an inbei a, ZPM beih hi kan zavaia Politics a ni, a ram kalsiam lo lulai chu a ni.

Hnam Party inti ber hian Kamrul Laskar chu mi dang zawng aiin contract an pe tam hi a dik lo nasa tawh a, Kamrula hminga hna thawk, a phenah hian mi an tawm ru kúk a nih phei chuan a dik lo nasazual sawt a, Lengpui Airport sâ chim ṭhak khawpa hna chhia hi Contract thawk thei lo tura Black List tura kan lo hual kha Class I Contractor promotion a hmu nawlh a, mahni hnathawh sawi mawi tur hriat lem loh avangin party ṭhang chak ZPM beih chu an chaw tui ber a ni a, mi dang beiha sorkar nawn leh tum hi a sak ve ṭalh ang.

Congress hi Treasurer leh CLP President Pu Zodintluanga a báng rup mai a, Congress a nghawng na khawp mai, Pu Zodintluanga hi chu Treasurer satliah ni lovin Congress MLA hlun leh kum 10 Cabinet Minister ni tawh leh rei tak MLA ni thei a nih laiin, Congress President Pu Lalsawta chu Dictator ang maia rorel nia a hmuh avangin a bang tawl mai a ni awm a. Pu LS Thanga a nango leh a bân chhan sei tak ziakin Pu Lalsawta bawk a puh leh a, Pu Sawta hi intilal leh mahni dikzia puan duh vanga ṭhiante dik loa tlang thantir hreh loah a puh a, Congress lamah hian Pu John Rotluangliana leh GS rual hi an nghet lo hle tih a ni bawk a, mahse insiam ṭhat tuipui lovin ZPM beih bawk an thupui a, MNF zawk bei tura rin hian ZPM an beih nilen ṭhak dan en hian ZPM hi an hmù lian hle a ni.

ZPM hmu lian bertu chu anmahni ZPM an ni a, ZPM ticket hmu chu MLA tur thawthangah an ngai a, ticket chang lo an vir cheng a, ZPM chhungah lungawi lo neuh neuh awm ve rengin; ZPM hian Party dang pahnih ang hian ZPM beih hmanga sorkar an tum ve tho a ni lo maw?

- Malsawmtluanga Lungṭau