Iptepui banna leh mau chi supply

Mizorama hna inchuh nasat ber pahnih hi thlang dawn ta ila police constable hna leh sorkar sikul zirtirtu hna hi a nih mai hmel e. 

MNF sorkar tirha zirtirtu an lak dawna Iptepui banna tih khan ka chaw ei a la titui thei tlat lo. Chumi hnuah Dr Barathi pawlte ngei maiin kan ramah mau chi kui ṭiahna lo nei sa ang thlapa mau chi an supply leh dan hi sawi zui lova liamtir mai mai chi a ni lovang; heng thilte hi kan sawi kan sawi hian Mizoram hmalam hun zel atan thil ṭha kan ti a ni. 

Zirtirtu lakah khan kan ruling MLA te khan zirtirtu lak dawn khan note an ziak thliah thliah tih kan la hria ang a. A ṭhente phei kha chu, 'Kan Iptepui Banna,' tiin duhsak turin an han ziak lang nghal tawp hial a. Ṭhenkhat phei kha chu khaw dang hminga laka chumi hnuah anmahni khuaa attached tur khan an han ziak bawk a. Chiang takin a ziak kha a la awm a ni. 

Kha thila lang chiang ta chu merit in an la lova, duhsak zawng an la tihna a ni. Zirlai ni mek leh zir zo tawh hna zawng ṭhalai sing chuang awmna rama duhsak zawng la turin kan hotuten thil an la kalpui duh hi ram leh hnam hmangaih avangin ti tawp thei tawh se aw... 

Chanchinbu lama kan lo chhiar ve dan leh tuna internet lama chhiar theiha la awm chu Mizorama mau/ raw chi supply-tu tur tender chhángtu chu Growmore Biotech Ltd., Tamil Nadu a ni a, an director chu Dr N Barathi a ni tih leh he mite firm, Growmore Biotech Ltd. hian Mizoramah mau/ rua tihchanna hmun (second hardening nursery) an nei tih a ni. Hei hian ngaihtuah a tithui vang vang khawp mai. 

Mizoramah hmun nei angin an insawi a, mahse Mizorama an hnuhma lian tak state sorkar flagship policy atana supply tur meuh ni si hi an website-ah Mizorama an branch neih hi a chuang miah lo tiin Pu Hriata Chhangte khan a ziak. Chuti a nih si chuan Mizorama mau chi supply an chan theihna turin tute emaw nen inremsiamin Mizorama inbun tawh angin Dr Barathi pawl­te hi an inlan tir a ni lo maw tih hi zawhna awm thei tak a ni. 

Mizoram sorkar sum tam tak senna tur mau chi supply tu tur hi hre sa vekin Mizoram­ah an rawn chho tihna em ni, midang pawhin an chhan ve loh mau chi supply hna chang chat theitu an lo nih bik dan te hi ṭhangtharin an la zawt nawn dawn a ni. 

Growmore Biotech Ltd hian mau chi ṭha tak supply se Mizoram­ah hlawhtling se tih hi Mizo zawng zawng duhthusam a nih rualin anmahni chiahin an chhan tur tender kan lo chhuah kha ngaihtuahnaah hian a cham reng ṭhin tawh dawn a ni.