Much ado about nothing

Sapho hian ṭawngkam pakhat an neih chu 'Much Ado about Nothing' tih niin, chu mi awmzia chu thil holam tak nasa taka buaipui tihna a ni. Kan thil buaipui tam tak hi thil ho tak a ni ṭhin si a, Mizo Youtuber tam tak te buaipui hi a ho hle a ni, Mizo politician buaipui pawh hi thil ho tak a ni, Mizo pumpui hian thil ho hi kan buaipui nasa a ni.

Tunlai chu an sawi hrang hrang hi ka lo follow ve ṭhin a, Mizo hian mi châw ei lai mai mai hi kan lo en nasa hle tih lanna chu, Mizo pa Mukbang pawh a lo tam ta a ni. Mizo music video ṭhenkhat chu an zai thiam vang ni loin an zai thiam loh vangin an lar a ni. Zaithiam ṭhenkhat chu an zai thiam loh leh lutuk avangin miin Youtube lamah tho reaction video an siam a, vawi leh khatah an lar a, he thil hi Mizo ṭhalaite hian an en nasa hle tih a ni a, kan buaipui a hoh em avang hian IAS hi kan la nei lawk lo ang!

Politics lam ni se, kan buaipui a ho lulai bawka Mizoram pawha hnam dang pasal nei pakhat politics zirna lama thiamna pawh nei lo leh, politics lam experience nei lo chuan a thu dawn ang ang chu a rawn puang ṭhin a. Youtube kal tlangin, a tirah party ṭan lam a neih te chuan hahipin an fak a, he Youtuber hian a ṭan lam a thlak thut a, a lehlam zawkin hahipin an fak ve leh a, pakhatin an sawisel ve leh thung a. Mizo zinga politics thlir thiam political analyst ang maiin kan 100% pawm hmiah hmiah a, kan party a ṭan chhung chuan. He kan buaipui hi hnam ang chuan thil holam buaipui kan ni.

Kan thil buaipui ho lutuk ka ngaihtuah hian kan ramri chungchanga kan inkah hma leh kan inkah hnu hian, kan ramri nia Assam-in an rawn nawr chin chu gate ngai reng a la ni tih te hi kan buaipui leh si lo. Kan buaipui a ho si, kan buaipui loh hi a serious bawk si avang hian eng ang hnam nge kan nih chiah le?

- Mamuantea Chhangte