Pu Zoramthanga hian mipui vote a duh chuan, a Instagram comment-na mipui tan 'on' rawh se
India rama public leader zinga mipui ngaihdan hre ngam lo awm chhun ka hriat chu, kan Chief Minister Zoramthanga hi a ni. Instagram lamah a indah ve a, mahse tu mahin an comment theih lohin a dah hmiah. Comment theih a nih lai khan Pu Zoramthanga thil tih hrim hrim hi negative comment a tam leh lutuk a, a off ta a ni ber a. A mipuite ngaihdan pawh dawngsawng duh lo Chief Minister kan nei hi a zahthlak hle a ni.
Chief Minister nih hi inthlana tlin ringawt pawh hi a ni lo. Inthlana tlin hnuah pawh hian tih tur tam tak a awm. Mipuiin an duhzawng sawi turin hmuh theih tur ni ta se ni khatah pawh interview a thui em em a, hmuh hleihtheih a ni si lo va, engtin emaw tal Pu Zoramthanga hriat tura ngaihdan sawi hi mipui hian an duh ve tawh a, chutiang tur chuan kawng pawh a inhawng thui tawh hle a, Social Media kal tlangin Pu Zoramthanga chet dan hi kan duh thu kan sawi thei a, kan duh loh thu nen kan sawisel thei bawk a. Ma'rawhchu, Pu Zoramthanga hian a Instagram comment a off tlat a, kan duh ang pawhin kan fak thei lo va, kan duh loh thu pawh kan thlen thei lo.
Chief Minister ve meuh si chuan mipui a hmachhawn ngam tur a ni. Aizawl East I-ah a la awm duh a nih chuan mipuiin an ngaihdan an sawi ve hi phal rawh se. Pu Zoramthanga hian mipui ban phaka a awm theih dan chu Instagram lamah hian mipui ngaihdan tal hi hre ngam se, amah an duh loh pawhin insiam ṭhatna atan a hmang thei tur a ni. Chief Minister ni ve sia mahni mipuite thusawi theihna off hi ka hriat awm chhun a ni.
Pu Zoramthanga hi kan bei a ni lo, Pu Zoramthanga account viltute hian Social Media kalphung hi an hre lo. Thil tarlanna satliah a ni lo, Social Media miin an duh chhan chu an tel ve theih vang a ni. Pu Zoramthanga account-ah chuan tel ve theih lohin mipui an hnar. Mipui vote a la dil leh duk duk dawn si a, Pu Zorama hriat miah loh hian a Social Media account enkawltute hian mipui hi an hnar mek a ni. Aizawl East-I mipui, a bikin ṭhalaite hian an ngaihdan sawi ve dawn ta se, Pu Zorama account enkawltute hian an phalsak si lo. Account lama comment section off-tute hian kum 2023 inthlanah Pu Zoramthanga leh MNF an tla a nih chuan a mawh an phur tel dawn chiang a ni.
Mipui thu leh hla ngaihsak duh lo Chief Minister kan ramin kan nei mek. Mipui tel ve theihna remchang Social Media-in a siamsak chu Mizoram Chief Minister chuan ṭha a ti ve lo va, mipui chu a 'Off' mek a, mipuiin EVM lamah Chief Minister hi an Off ve hlauh a nih chuan Pu Zoramthanga Social Media enkawltute hian a mawh la ngam rawh se. Kan Chief Minister a ni ve a, thu sawi duh kan neihte pawh kan sawi thei lo, heti a nih chuan Aizawl East-I ṭhalai vote chu a chân ang, MNF dang pawhin an tawrh phah rinna ka nei.
- Lalmuanpuia