Nuai 100 ziah bo
Pu Lalrinliana Sailo in cheng nuai 100 ziah bo a sawi kha hetiang hi Lokayukta angte hian Suo Moto case a siam thei em le? A nih loh leh Anti Corruption Bureau kan neih ve hian Suo Moto case a siam ngam em? Chiang tak maia on record ngeia State khat Assembly Speaker in cheng nuai 100 ziah bo Corruption chungchang a sawi hi YMA leh MZP teh reng pawh hian an en liam mai mai thei a nih chuan ei ruk hai chhuah chu a la hla hle.
Tuna mi case hi chu eiruk hai chhuah ngai ni tawh lo, Assembly Speaker-in min hai chhuahsak sa tawh a ni. Speaker hian a Department changtu pawh a sawi lang. Pu Tawnluia, Deputy Chief Minister chan Department a nih chuan, PHE a nih loh chuan UD&PA a nih duh hmel khawp mai. Corruption hua inti Pawl hrang hrang pawhin hei hi an chhui zui tur chi a ni. Youtube hmanga thu dik leh dik mang lo puang ṭhinte pawhin hei chu Speaker sawi a ni a, an duh tawkin an chhui zui thei ang, cheng nuai 100 ziah bo hi Nuai 3 tiama Cheng 25000 lek sem thei sorkar hnuaia thil boah chuan a tam a nia, i ngawi mai mai lo ang u.
Hei hi kan chhui chian dan tur pakhat chu MNF MLA ve ve inpuhna a ni a, Pu Rinliana hi Chalfilh Bial MLA a ni a, Pu Tawnluia hi Tuichang Bial MLA a ni bawk a, MNF ve ve an ni. Pu Rinliana hian Pu Tawnluia hi a eiru tiin a puh lo a, a Department hnuaiah eirukna a awm tih a sawi. Pu Tawnluia pawh hian a eiruk loh chuan a Department hnuaia cheng nuai 100 ziak botu hi chhui se, nuai 100 ziah bo hi hrem ngai lo hrem se a ṭha ang. Inthlan kum a ni si a, nuai 100 bo pawh ngaihsak duh lo Sorkar chu thlan nawn leh a chakawm tawh loh.
Kolasib MJA thil chhui chhuah Highway Compensation lam pawh hi a hre chiang chuan rawn ziak se, corruption lian deuh deuh hi kan en liam mai mai chhung chu hnam huaisen leh dikna duh kan ni ngai lo ang. ZPM pawh hian Kalphung Thar hi an sorkar hma hian ṭan se, huaisen takin chhui ngam se, tun aṭanga an huaisen ngam loh chuan eng tikah nge huaisen an tum dawn le? Nuai 100 bo hi chu chhui zui ngei ngei tur, CYMA leh MZP hi phut chhuak ang u.
- Lalramchuana, Bawngkawn