Infiamna leh Chanchin Ṭha

Alvin L. Reid, Southeastern Baptist Theological Seminary, Wake Forest, North Carolina-a Chanchin Ṭha hril lama zirtirtu hna thawk chuan, "Kum Zabi pakhatna velah kha chuanin Rom khawpui kalkawng khan Chanchin Ṭha hi an keng ber a, vawiinah erawh chuan infiamna hian Chanchin Ṭha thehdarh hna hi a keng ber tawh," tiin a sawi a, a pawmawm hle. Infiamna hian tunlai khawvelah hmun laili ber a chang a; infiamna hmanga Chanchin Ṭha hril pawimawhzia hi kan thiam tawk tlem te hmangin kan sawi ang.

Infiamna khawvel

Khawvela hnam tin chi tin hian infiamna hi kan ngaihlu tawlh tawlh a; ram ropui leh thiltithei, Sorkar chak tehna hmanraw pawimawh ber pakhatah kan hmang tawh a ni tih kan hre vek awm e. Khawvela ennawm ropui bera kan ngaih pawh eng dang ni loin, infiamna huang chhunga mi 'FIFA World Cup' a ni tih kan hre ṭheuh a. Infiamna ngaina lo leh en ngai miah lo pawhin FIFA World Cup hi chu kan en deuh vek a nih hi. Chuvangin vawiin hi Infiamna khawvel a ni a, chanchinthar luahtu ber pawh infiamna hi a ni.

Mizote leh Infiamna

India rama Mizo te kan hmingṭhatna leh hmingthanna ber chu infiamna hi a ni tih kan hre vek a. Tun hma deuh aṭangin vawiin thlengin India leh khawvel hriatah Mizoram leh Mizote hi khawvelin min hre chho mek a, a lawmawm takzet. Thal kah aṭanga bul ṭanin, Jeremy Lalrinnunga'n bung thar min kaipuiin rit min chawisak a, Lalremsiami chuan Hockey hmangin khawvelah min pho chhuak a, Tennis lamah pawh Lalrinpuia kan nei a. Football lamah phei chuan sawisen loh khawpin Mizote'n hma kan sawn a; Malsawmtluanga, Jeje Lalpekhlua, Lalrindika Ralte, Lallianzuala Chhangte leh mi dangte kan nei a, kan nei zel bawk ang a; Pathian malsawmna ropui tak a ni. Boxing lamah pawh kan duai lo a, NT Lalbiakkima chuan hnam dang kan hnek tlu thei tih min hmuhtir a, Cricket leh Basketball lamah te pawh hian hma kan la sawn zelin a rinawm bawk. Kan sawi zo vek seng lo a, kan tarlang kim vek seng awm lo e.

Infiamna hmanga Chanchin Ṭha hril

Khawvel huapa infiamna lama mi langsar zingah Kristian an nihna pho langa khawvel mit hmuha Lal Isua neitu an nihna tarlangtu kan hmu nasa a. A bikin Football lamah Brazil hoin Kristian an nihna an tarlang nasa a. Mizote en tam ber English Premier League-ah pawh kan hmu fo a; tuna English Premier League player ni mek zingah Chelsea defender Thiago Silva te, Arsenal striker Gabriel Jesus te, Mancherster United midfielder Casemiro te hi chutianga langsar te chu an ni mek a. Mi dang tam tak pawh an awm a, kan sawi lang seng vek awm lo e. Hetiang hian infiammite hian Infiamna huang chhung chi hrang hrangah Kristian an nihna hi an pholang nasain, Chanchin Ṭha hril hna hi an thawk tel pah nasa hle a. Alvin Reid sawi ang khian Chanchin Ṭha hril hna hi infiamna hian a keng nasa hle tih hi a dikin a tunlai em em a, a la ni zel dawn bawk a ni.

Mizo infiammite leh Chanchin Ṭha hril

Mizote pawhin Pathian malsawmna kan dawng a, infiamna khawvelah hma kan sawnin khawvel hriatah kan inpho chhuak zel a. Hemi kawngah hian kan theih chen chenah Lal Isua neitu, Kristian kan nihna hi pho chhuak zel ila a duhawm hle ang. Kan nun vawngtu leh innghahna atan pawh Pathian thu hi kan infiammite hian hmang tlat zel se la. Chu chuan tisa leh thlarauah hriselna leh hmasawnna a pe ang a, sang takah an thlen phah zel bawk ang. Ruihhlo, nulat tlangvalna leh sum leh pai thianghlim lo laka an fihlim a, an hmingṭhat zelna tur atan pawh Pathian thu hi lo hmang tlat se la. Infiamna huang chhung leh pawnah an nun hi Chanchin Ṭha nena inmawi leh inmil lo ni zel se; an nun hmanga Chanchin Ṭha puang darhtu lo ni zel teh se.

Mi tu pawh Pathiana innghat tlat leh ring tlat, a nuna Pathian thu lal ber chu a chhe thei tak tak lo a. Chuvangin kan infiammi hlu tak tak te pawhin Chanchin Ṭha hriltu palai an ni tih inhre reng chungin hmalam lo pan zel turin duhsakna sang ber kan hlan e.

- Rinfela Zadeng