Bial Inchuh ka hriat ve chinte III

Ka article ziah pahnih titi khawchang mai mai leh zeldin titi nena ka sawi pawlh chu rin aiin ngaihven a hlawh tih ka lo hria a, Youtuber pawhin an lo chhiar tih ka hriatin kei teh lul hi min tiphur sawt a, Bial Inchuh tih thupui ang bawmin a pathumna tur ka rawn puak chhuak leh ta a ni. Tun ṭum chu ZPM lam piah lamah Ruling Party leh Congress kan sawi tel rual hian BJP pawh kan sawi rik a ngai ta a ni.

Zêldin thu leh titi a nih avang hian rin bur tur a ni lo va, chutih rual erawh chuan kan phuahchawp liau liau a nih loh avang hian thutak pawh a pai tel a ni.

MNF:-

MNF hian an palian pahnih an chawlhtir dawn an ti. Anmahni chuan an kum a tam avanga chawl tur angin an insawi tawh a, mahse an tlin zawh an beisei lo ve ve tih a ni a, Deputy Chief Minister Pu Tawnluia leh Home Minister Pu Lalchamliana hi chawl tura an sawi chu a ni. Pu Tawnluia hi kum 80 tling tawh mai tur a ni a, Pu Chama hi kum 75 a ni chho dawn hnai tawh a, an chawlhtir hi a mawi tawh hrim hrim a, a phena thil awm chu tling turin election an fight thei tawh lo a, an chak tawk tawh lo a ni. Tuichang Bialah Pu Tawnluia aiah Pu Lalpianfela Chawngthu dah tumna a awm rual hian, Pu Lalrinliana Sailo hian a la beisei zel a, mahse Speaker hi chu MNF hian an duh tawh lo va, USA-a a thusawi avanga chawlhtir an duh; thuruk a puan an hlauh avanga an ban ngam si loh, la MNF ve mai mai niin an sawi. Pu Chama hi chu kum 4 leh a chanve chhunga a performance en khan tling zo lo tura ngaih zinga mi a ni a, MNF Minister-ah chuan pa clean ber leh duham lo ber a ni chungin, a bial a enkawl dan leh a portfolio a enkawl danah a ti ṭha tawk lo tih chu an sawi dan a ni.

Chalfilh Bialah Pu Lalrintluanga Sailo chuan ama thuin Candidate a lo puang pawp, tiin Facebook lamah ka lo hmu a, tak tak a nih chuan a mak hle a ni. A mak chhan chu Pu J Lalchhanhima, Dr Sangzuala leh Pu Mafaka te inchuh bial a ni a, Pu Rinliana Sailo hming chu a ri tawh lo, MNF MLA pakhat hi chu a chhuah ngei rin a ni. Pu Rinliana sawi tàkah chuan MNF hian Dr Beichhua an ban ngam laia Pu Rinliana an ban ngam loh chhan hi; Tuichang bial vang an tih chu.

Pu Robert Romawia a tlanchhe tawh a, mahni in aṭanga vil phak reng aṭanga tlan chhiat chhan hi Chhinga Veng lamin sawi tur an hria tih a ni a, hriat a chakawm khawp mai. Aizawl East II RRR chhuahsan hi Pu R Lalzirliana leh Pi Lalawmpuii hian an invil thuah niin an sawi a, Aizawl West I lamah Pu Tawnluia a kal dawn tih kha chu Pu Zothantluanga hian tu mah ken a tum lo an tih avangin boruak chhiat ai chuan, Pu Tawnluia hian chawlh law law a duh tih a ni. Aizawl North II-ah MNF hian dah tur an la final thei lo va, Hrangturzo lama Pu Chama aia dah tur pawh an la zawng kual ve mek tih a ni a, Politics insiksawi karah Pu Zoramthanga hi Aizawl East I lamah hian a phur thar hle tih a ni a, Kolasib District Bial 3 hi MNF hian an chân vek thei niin sawi a awm bawk a, bial inchuh lohna an neih chuan chu Aizawl South I niin ding tur an inhnawn a, Aizawl South II chu mi 3 velin an inchuh mek a, an mi sawmten an hnar tàk zel avangin Dr Ramzauva hian a chan rinna a lian hle.

CONGRESS:-

Pu Lalsawta hova insiam ṭhat tum Congress hian boruak sang taka vawrh an tum a, an boruak hniam zualpui chu a reh fel ṭan lai hian boruak erawh an vawrh zo lo. A Congress nina ning hrim hrim hi an lo tam em tawh avang hian Sorkar hnathawk MNF ning hian Congress an la hawi lova, ZPM zawk hian an vanneihpui dawn a la ang. Heti rual hian Party lian leh sorkarna chelh rei tawh an nihna laiah, Mizorama Politics hmanga eizawng ngah ber party hian Politics avanga hausa pawh an ngah ber a, heng mite huhang leh sum hian thil a la tih theih chhung chu Congress hi an te ngai lo vang.

Pu Lalnunmawia Chuaungo an lakluh hmaa an boruak kha an lakluh hnu hian an phak lo ta zawk niin a lang a, Politician nih chiah hi chuan mi hi an hniam sut duh. Journalist Pu Vana hi journalist ṭha tak a nih laiin intellectual circle lamah hian ZPM lama tute emaw ang tho hian, ngaihsan a hlawh lo mai ni loin Pu Speaker tia koh turin an it lem lo va, Aizawl pawnah vote zawng se a chance a sanna a nih hmel. A bak Congress zawm thar an sawite hi chu boruak siam phàk lem lo, tute nge an nih inzawh chawp ngai an nih ang hian Vanapa Hall lama Aizawl Khawpui Worker inkokhawm ti si a, Lunglei thleng thleng an inko chung pawh khan a boruak a sak chu a ni.

Aizawl West 1 lamah Dr Lallianchhunga hian din a tum hmel si a, Congress Veteran leh Pu Zodintluanga te ṭhian Pu Albert-a chu a hawng dawn a nih hmel a, Pu Vana pawh hian he bial tho hi a tir kha chuan a beisei niin an sawi a ni. Dampa lama din tum Pu John Rotluangliana hian Pu Sawta permission a hmuh theih loh avangin ZPM ticket chang lo sàwm luha dintir tumna a awm tih hi ,a tak a nih chuan Pu John-a hian Pu KS Thanga a zui chhuah ve a rinawm. Pu Zodintluanga nau Pu Mavala hi seat pek loh tur zinga mi niin an sawi a, Pu Sawta Delhi zin hlan khera khera Pu Zodintluanga hoa Pu John-a te Martar Thlanmual tlawh program siam khan, Bial Inchuh aiin Congress boruak a tichiang tiin kan ṭhianpa chuan a sawi hial a ni.

Dr RK Lallianthanga kha Congress-in Lunglei South MLA Candidate atan an puang tawh a, a kal kual hnuah a huphurh vangin a inhnuk dawk tih a ni a, Bial Inchuh lam ni lo bial tlanchhiatsan hi sawi a hlawh vak lo a ni. Aizawl North II-ah Candidate an la hmuh loh avangin Pu Rohluna Ex Minister ding turin an ti dawn a, Lengteng Bial a chhuahsan dawn niin a lang. Tunah hi chuan Aizawl North II bakah Aizawl West II, Aizawl East I, Aizawl East II ah candidate tur an la nei lo va, Tuirial Bial pawh an la zawng mek toh hi titi kan hriat phak ve chu a ni.

ZPM:-

Tunlai Mizoram Politics boruak chu ZPM a ni tawp mai. MNF-in an tih ṭhat sawi hman lovin ZPM an bei mawlh mawlh a, Politics-ah chuan a pawimawh a ni. MNF hian an tih ṭhat ang ang hi sawi sawi mah se, engmah tih ka nei ve lo, ZPM an len zel chuan MNF tán sorkar nawnna chance an nei tlem tial tial a, ZPM hi an neuh ngei ngei a ngai. Congress hi chu an dam khaw chhuahna tur an sual chhuah a ngai a, an fight loh chuan North East State dang angin Congress hi an ral daih dawn a, chuvangin Congress tan MNF being aiin ZPM beih hi a ṭangkai zawk a, an bei hi a mak lo. ZPM lah hi anmahni leh anmahni an lo inbei tawk chho viau a, tlem chuan an inching fel ṭan ta chu niin a lang ta.

ZPM hi Aizawl East I bial an inchuh nasa hle tih tlang hriat a ni a, Bial Viltu Pu PL Liandinga kha Bial Viltu an puan hnuah dam lohnain a tlakbuak avangin bial pawh a fang hman ta lo va, a thlaktu Pu Lal thansanga (Pu Chatea) ni si lo; he Bial beisei hi ZPM-ah mi pathum – Treasurer Pu C Lalṭanpuia, Pu Lalsanglura Ralte bakah hian hming dang pawh a ri chhuak. Pu Ṭanpuia hi chuan a ṭhianpa Pu Chatea a kian fel a, a campaign-pui hial an ti a, Pu Sanglura erawh ZPM zui zel a tum tawh lo niin an sawi. East I buaina hi chu a fel thawkhat a tih theih rualin a pawimawh ber zawk East I ah ZPM an tling zo dawn em? tih lam chu keini bial pawn mite chuan kan hrethiam phak ta hauh lo.

Mamit Bial hi Pu Remruatpuia chuan rei tak a lo beisei tawh a, Pu Zorempuia an pèk tàkah chuan Pu Remruatpuia hi ZPM aṭanga chhuak hial tura sawi a ni. Dampa bial pawh hi ZNP ticket hmanga ding tawh Pu Lalhmingthanga Sailo hian ZPM hminga din a tum em em lai hian Pu Vanlalsailova an dah ta si a, a ZPM zui zel dawn lo tih a awm. ZPM chu Bial Viltu an ruat hma si a, a chang lo lungawi lo an phun sap sap a, a ṭhen chuan ZPM an chhuahsan dawn ta.

He ZPM bial inchuh buaina hi a vanglai a pel chho ṭan a, inchinfel chhoh an thiam chuan an boruak pawh a káng leh thei ang, an insiam fel thiam loh chuan an zuai zel thei. ZPM vanneihna chu Headquarters lam va ngaihsak miah lo, ZPM pawh ni tak tak lo, ZPM supporter ṭhahnem tak an nei hi a ni a, Candidate lungawi lo buai hian Party a nghawng ṭhin a, ZPM voter tam zawk hi ZPM member inpe ni lo an nih avang hian ZPM Bial Inchuh buai avanga ZPM aṭanga chhuak sup sup tur an awm lova, Bial chang lo chhuakte hian an ṭhian hnai leh chhungte bak chu an chhuahpui lo niin a lang.

- Lalawmpuia