Sawi nia sawi leh sawia inpuhna
Hun eng emaw ti kal ta aṭanga politician ṭhenkhat, a bikin rorel lai party-a mite'n an sawi fo chu, 'Kohhran kan unit' tih leh 'Mizorama sawrkar tawhte'n thil ṭha tih an nei lo' tihte a ni a; hetiang hian ZPM party mite'n an sawi angin an puh niin a lang.
A hmasa zawk, 'Kohhran kan unit' tih hi party hruaitute leh worker ṭhenkhatin ZPM chungchanga an sawi fo a ni a; ZPM hruaitute emaw, an party mite'n emaw 'Kohhrante hi kan unit a ni' tia sawiah party dang, a bik takin rorel lai party MNF hoin an puhna niin a lang. ZPM hruaitute zingah hian 'Kohhran kan unit' tia sawitu hi tu nge maw ni reng reng le? Tuin nge sawi a, engtikin nge a sawi a, khawi hmunah nge a sawi tih hriat a châkawm khawp mai. A hre chiangte'n han sawi chiang thei se a va tha dawn em.
'Mizorama sawrkar tawhte'n thil ṭha tih an nei lo' tia sawitu pawh hi hriat a châkawm. Mizoram hi chhe lailet dêr anga sawia inpuhna pawh a awm. Hengte hi tuin nge sawi a, engtikin nge a sawi a, khawi hmunah nge a sawi? He zawhna hi min chhâng thei awm se ka lawm ngawt ang; mi dang pawh an lawm ang.
Kan rama political party ho press release-te hi chhiar vek lo mah ila ka chhiar tam ve viau a, chanchinbu ka chhiar ṭha thawkhat viau a, TV chanchin thar ka ngaithla regular ve viau bawk. Chungah chuan ZPM hotute emaw, hotu ni pha chiah lo, mi pawimawh ni pha chin ni ve si zingah "Kohhrante hi kan unit an ni," tih emaw, "Mizorama sawrkarna chelh tawhte'n thil ṭha tih an nei lo," tih ang zawnga an sawi hi ka la chhiar/ngaithla ve miah lo.
Hei vang hian ZPM party hotute hi thil âwm lo lutuk sawiah leh an sawi loh pui sawiah an puhna mai mai em ni chaw aw, ka tih phah a. ZPM hotute'n an lo sawi tak tak a nih chuan sawi âwm loh tak leh thil mawi lo tak an sawi kan ti thei ang a. An sawi tak tak lo a, an sawi angin party dangte'n an puhna mai mai a nih pawhin thil ṭha lo tak a ni bawk ang.
Chuvangin, heng thil pahnihte hi ZPM hotute'n an lo sawi ngei a nih chuan, a sawitu, a/an sawi hun leh a/an sawina hmunte hria chuan sawi chian law law a ṭha khawp mai.
- Zoramchhana