DUHSAK ZAWNG LEH DUHSAK LO ZAWNG
Pathian min siam danah mi tin hian mahni tana chhia leh ṭha hre thei turin min duan vek a. Khawi hmunah pawh duhsak zawng leh mil zawng kan nei vek ṭhin a, a hun leh hmun azirin kan tilangin kan tilang vak ngai lo thung. Pathian min siam dan ngaihtuahin thil thleng ve tur hrim hrim anga ngaih theih ni mah se la, duhsakna dawng pha lo tan erawh a fair lo a, duhsakna ṭha lo mi a nih ngat phei chuan a duhsaktu leh a dawngtu tan thil zahthlak a ni.
Tunhnaia Mizoram chhunga hna hrang hrang lâknaah pawh hian, duhsakna dawng pha chin leh dawng pha lo chin an awm niin ṭhalaite ṭawngkam aṭangin kan hre ta zauh zauh a. Hemi chungchangah hian finfiahna a awm thei chiah lo nain, boruak hi chu a awm deuh niin a hriat a. A bikin heng group D hna lâk dan kalphung tihdanglam a nih hnuah phei chuan tháwm a nasa lehzual a, siam danglam a nih hma pawh khan sawi neuh neuh erawh a lo awm fo tawh ṭhin. A tawp thlenpui ngam an awm loh vang nge chhui zui emaw, ngaihven zui erawh a awm chuang lo. Nimahsela, ṭhalaite zingah RTI hman ṭangkai dan inzirtirna a tam deuh tâk vang nge, tun hnuah erawh ṭhalaite thikthu a chhe chho ṭan viau a. Dik lo deuh nia an hriat chu RTI kaltlangin a kaihhnawih department te an zawtfiah zung zung thei tawh a, a remchang phian mai.
Chuti chung chuan department/board ṭhenkhat hna lâk danah sawisel neuh neuh a la awm fo mai a, entirnan : group 'A' leh 'B' hna lâknaa "Mizo ṭawng middle sikul thleng tal an thiam tur a ni," tihte leh a dang dang pawh a ni ang. Ṭhalaiten an duhdan an sawi fo ṭhin chu, Mizo Language Proficiency ah hian ṭawng thiam bakah test/exam paltlangte chauh pawm ni thei se tih a ni. Tuna kan kalphungah erawh test/exam hi buatsaih a ni chiah lovin ka hria a, an lo buatsaih a nih chuan duhthusam a ni.
Tunhnai maia Mizoram Lagislative Assembly Secretariat hnuaia Assistant (1 post), Translator (1 post), Upper Division Clerk (UDC) (1 post) leh Lower Division Clerk (LDC) (5 post) lâkna tura advertisement tihchhuah advertisement no.3 of 2023 lâk dan kalphungah khan dik lo a awm nia hriat a ni. A hrechiangte sawi dan phei chuan Assistant leh Upper Division Clerk (UDC) post hnawhkhat tura an thlante kha Commisioner fapa leh Assembly Speaker monu tih a ni. He thil hi a tak tak a nih ngat chuan chhui chian a, an marksheet-te public-a pho chhuah ngei a ṭhain ka hria. Chutiang an ti thei lo a nih chuan ṭhalaite hi an lungawi mai mai a rinawm loh.
Hna lâk dan siamrem a nih hnu, MPSC leh MSSSB ṭhen a nih hnu hian post tam tak hnawhkhahna tur advertisement tihchhuah a ni ve tawh a, an rintlak tâwk viau pawn a hriat. Tuna kan sawi mêk erawh MPSC & MSSSB hnuaia mi ni lo, department hnuaia lâk ṭhinte hi an ni, heng department hnuaia hna lâkhoah hian induhsak a awl bîk a ni ngei ang, sawi neuh neuh hi a awm deuh reng mai a, kan inenfiah deuh chu a ngai ang.
Mizoram chhunga tunhnaia hna lâk dan hrang hrang tarlang zuai ila:
✓ 2015–2019
1. A' : 197
2. B' : 593
3. MCS Combined : 51
4. Primary Teacher : 162
5. Middle Teacher : 165
6. H/S Teacher : 108
7. H.S.S Teacher : 42
8. Prof/Asst.Prof : 23
9. MCS : 42
10. Asst.Prof (RUSA) : 62
✓ 2020–2023
1. Group 'A' and 'B'
* MPSC–187
* MSSSB–312
2. Group 'C' (contract nen)
* 700+
Group 'A' & 'B' bikah tun hnai kum 4 chhungin post 1944+ hnawhkhahna tur advertisement tihchhuah a ni a. Chawhrualin kumtin, 486+ vel an la ziah ang a ni a, heng bakah hian Group C&D post a awm ve reng bawk a, kum 2020-2023 inkarah ringawt pawh 700+ chuang lâk a ni a, chawhrualin kum tin 234+ vel lâk ziah ang a ni. Heng hnaruakte dil tur hian kum tin bachelor graduate thar 3500–4000+ leh post graduate 1000+ chuang an awm belh ve reng bawk a. Kum tina hnaruak awm zat leh graduate thar zat ngaihtuah hian post 1 ringawt pawh 100+ chuang daihten an inchuh ṭhin tihna a ni a. Hetiang kara high authority lamin mahni chhungte emaw hmelhriat hnaivai an lo duhsak ṭhin hi, duhsaktu tur nei ve lo tan chuan en liam har tak tur a ni.
Kan ram innghahna tur ṭhalai lehkhathiam tak tak te hmakhua tichhe thei zawnga duhsakna inhlan ṭhinte hnena ka sawi duh chu, an thil tih ṭhin hi ram hmelma lian tak a nih avangin bansan se tih hi ka duh ber a ni. Kan ṭhalaite hi tun hma ang kha an ni tawh lo, dik lo nia an hriat chu ngawihsan mai mai tumna rilru kha an nei tawh lo. Dikna a awm theihnan engkim an huam tawh a, a hunah an inthurual viau tawh a ni a.
~ Eleazer Tetea Hmar