Thingbuk bulah awm rawh

Sualnain mihring a luhchilh hma khan, thingbuk leh mihringte chu inlaichinna thûk tak neiin Siamtu'n a lo din a. Chumi avanga Eden huan ropuizia leh a mawizia te, mihring tana a hlutzia te chu vawiin ni thleng hian mihring finnain a ngaihtuah chhuak zo lo va.Thingbuk leh mihringte chu inchhawrtawn turin, inhlat lo taka awm dun turin siamtu chuan a lo duante kan ni.

Mihringte himna atana thlakhlelhawm ber chu ramngaw hring dup awmna hmunte chu a ni. Chutah chuan mihring te mamawh bakah nungchate mamawh a awm kim a ni. I taksa a lo chak loh a, i nun a lo nguai em em hunah, i tukverh hawng la, ralkhata hnim hring, thingbuk leh ramngawte chu thlir la. Engtia lo awm nge an nih a, eng nge an ṭangkaina tihte chu ngaihtuah la. Rei lo te hnuah chuan i taksa chu mihringte thil siam hmanga tihdam theih loh a nih hmain, Lalpa chuan a thilsiamte hmangin tihdam che a duh a ni tih i hre chhuak ngei ang.

A tirah kan piputen thlang an rawn tlak khan phaizawl zau pui puite chu ramngaw thing leh mau a tam loh avangin chenna tlakah an ngai lo va. Chu'ngte chu rawn kal pel zelin, thlang lama thing leh mau tamna ngaw dur pui pui awmna tlangramte chu an thlir a, chu'ngte chuan an lung a tileng zawk a. Chu'ng hmunah te chuan awmhmun an bengbel ta zawk a. Anmahni pawh hna thawk hah reng chung siin an hmel a ṭha a, an hriselin an chak em em a ni. Mi chakte, hmelṭha te, mi ṭuan rangte leh huaisen chanchinte sawi tur an ngah em em a nih kha.

Thingbukte chu mihringte tan ngawi rengin an ding a, ngawi rengin mihringten kan mamawh kan hip luh tur - Oxygen an siam mawlh mawlh a, kan hriat loh hlanin an boruak siamchhuahte chu kan lo hip lut leh a, chuvangin thingbukte chu kan nunna chhanhimtute an ni.

Thingkung damchhung chu kum za tam tak pawh a ni thei ṭhin. Thingbuk pakhat damchhungin mihringte tana boruak hip tur a siamchhuah hi suma lei tur ni ta se, kan damchhunga kan sum thawhchhuah hian a lei seng dawn lo a ni. Chuvangin, thing kittu chuan a thing kih aiawh turin pakhat tal a phun belh zel a ṭul a ni. Kan chenna a dip dal tih avanga kan kih leh rikngawt ṭhin hi inngaihtuah chian a ṭul a ni.

Kan chenna in bulah thingkung pakhat ṭheuh dintir ila, Eden huanah mihringte enkawltu turin Siamtu'n thing a lo dah ang khan, kan bulah Doctor min enkawltu ngawi rengin kan dintir reng tihna a lo ni ang.

- H.Neihchungnunga, Durtlang North