Mistiri-te bungraw thar - Woofer!?
Khawvêl hi a’n changkãng tawh khawp a; tûnlai mitiri leh anmahni puitu, a sap ṭawng taka ‘helper’ kan tih ṭâlh te pawh hian, an bungrua - ara, thirkhen, randa, chheni, tuboh leh thil dang dang bâkah, YouTube-a hla leh pasalṭha thawnthu ngaihthlâkna tùr woofer hi a tel tawh an ti! Tak tak ni maw? Han chîk ve mah teh, hna thawhnaa woofer keng ngai lo mitiri hi eng zât tak awm ang maw? Ka welder hmel hriat pakhat paw’n a hna thawhnaah zu keng hrãm tho zêl a!
Mitiri pakhat pawh fiamthuin an ti a lãwm: a hna thawk a bàn tlai deuh ṭumin an nu’n a chhan a zâwt a; ‘Kan pasalṭha thawnthu ngaihthlâk a laklawh lutuk a!’ a ti a; a bàn hmà deuh leh, ‘Kan pasalṭha thawnthu ngaihthlâk a tàwp hma deuh a!’ a ti e, an ti. Fiamthu mah ni se, ngaihtuahna erawh a hruai thui phian.
Hnathawhna hmuna an bungrua ang ziazánga woofer kenga an ngaithla ṭhin hi, chutia sawisêla han dem chiam pawh ka ni hran lo; an hna tibuai miah loa cement chawh pah te, lung rem pahtea zai han ngaihthlâk te chu nuam ve deuh tùr pawh a nia… Mahse, ninawma chu, an hna thawhna bul hnaia khawsate min ngaihthlâk kêptír vek tum àwm ang ziazánga ring mangkhènga an ngaithla kher ṭhin hi a ni!
Dik tak chuan an hnathawhna bul, an ṭhenawma awmte hian YouTube-a hla leh thawnthu chhiar ngaihthlâkna tùr speaker emaw woofer emawte chu kan nei ve deuh vek a. Kan hla duhte pawh kan in-play chawp ve thei reng a. Mistiri leh an thawhpuiten ṭhenawmte inngaihthlâk kêptír ang záwnga woofer an chelek fo mai hi chu, a bengchhengin a ninawm duh khawp mai! Krismas laia Boney-M leh kumhlui thlah dáwn tlaia Siampuii Sailo zai ‘play’ ang hrima hnathawhna hmuna an ‘concert’ chiam ṭhin hi chu; chíng tawh lo se a duhawm ngawt mai.
Lallianmawia Pachuau te, CFL-a te, Siamthangi Hauhnar te, Ngtv te, Smokie te, CCR te leh mi dang dangte hi zai thiam kan ti ve tho a, an zai pawh ngaihnawm kan ti ve tho. Mahse, chhùna nau mut hun lai taka ring taka an zai kher erawh hi chu, ngaihnawm lam aiin huatthla-la lamah a kal duh daih zâwk!
Sawi tawh angin, hna thawh pah leh thil tih paha rimawi han ngaihthlâkte hi chu thil nuam ve deuh mai a nia. Kei ngei pawh hian lehkha ziah paha rimawi ngaihthlâk hi ka chíng a; ‘mood’ te pawh a siam ve a, nuam ka ti viau. Mahse, ṭhenawmte ka play kêp kher ngai lo! Chhùna nau mut hun laia ngaihthlâk phêt kan duh a nih paw’n beng vuah (earphone) ka hmang mai a. Mi dang tibuai záwnga hlim tum leh khawhar inhnem tumte hi thil ṭûl lo tak a ni. Mistiri leh an thawhpuite pawh hian chíng chhunzawm lo se a duhawm hle mai.
–Zirsangkima