Minister 3 tlanchhe ta phawt
Sorkar a la chak ṭhat chuan Minister te hian bàn chu sawi loh, a hma aia phurin nghet takin an awm ṭhin a. MNF Minister zingah seat tlan chhiatsan chiang ta 2 an awm a, pakhat a chawl dâwn bawk a, pathum chuan an bial an chhuahsan dawn ta. Hetia insiksawi hian MNF hi phurna a pe sawt dawn lo. Minister chin an bial aṭanga an chhuah suau suau hi chuan party chak vang leh dinhmun ṭhat vang a ni lo tih a chiang si a, kum 4 chuang lai ro a rel chhunga boruak hi a mak hle a ni.
Pu Robert Romawia Royte chuan ṭumah a hlauh loh thu a sawi hnu lawkah, Aizawl East 2 bial a tlanchhiatsan. He bial aṭang hian Hachhek Bial a pan chhan hi Hachhek tih hmasawn tumna lam aiin, tlin theihna tur hmun a zawng tih phat rual a ni lo. Hachhek hi Bru vote tamna a ni a, hei hi a kal chhan dik tak a nih leh nih loh finfiah theih a ni lo chung hian, mi tam tak chuan Bru vote hi a kal chhan an ti teh tlat a. Bru hmangaih vang a nih hmel si loh avangin a chhuah chhan hi chu Aizawlah MNF dinhmun a ṭhat loh vang a ni ngei ang.
Pakhat dang hi chu Minister Pu R Lalzirliana a ni a, Saitual Bial (Ṭawi Bial) aṭangin a chhuak dawn a, a kalna tur chu kei chuan ka la hre lo. Pu Zira hi Congress aṭanga a chhuah hlim pawha MNF lama lut thut a; MNF pawh tlinpui leh thei khawpa pa chak a ni a, chu pa meuh pawh chuan a bial him chu a chhuahsan dawn ta. A bial hi a hmangaih tawh loh vang ni loin, tlin theihna a zawn vang a nih hmel a, tling leh thei dawn se chu mahni bial hriat chiansa chhuahsan nul nul thu a awm lo.
Home Minister Pu Lalchamliana hi a chawl dawn tih news lamah ka lo hre ve a, chawl tur atan chuan a la valai ka ti. Upat vang hrim hrima chawlh tur chu ni ta se Pu Tawnluia, Pu Zoramthanga te pawh an upat zawk hmel si a, MNF Candidate tura an sawi Er K Sawmvela te pawh hi a naupang lo. Pu Chama hian tlin inring se chu a chawlh ka ring lem lo a, MNF Minister 3 Bial chhuahsan tur a awm avang hian MNF hi kum 2018 inthlan dawna an phùr ang kha chuan an phúr tawh lo tih a chiang.
Kum 5 an sorkar chhunga an tih ṭhat a tam rualin, an khawsak dan leh sum an atchilh dan avang hian mi tam takin an hnawl niin a lang. Hetiang kan sawi lai hian MNF hian MLA ṭha tak tak a nei a, an inawpkhawm dan a dik lo laklawh a, Minister thú bìk an awm te hi an tuar a tih theih ang. Minister 3-in an bial an chhuahsan hi a mak hle a ni.
- Jeremy Lalrinawma