Kan CM hian a thawhpui Manipur CM hi be satliah lo se
He thlalak hi ngun taka kan en chuan BJP leh an thawhpui Hmar chhak state Chief Minister inhmuhkhawmna a ni. NEDA tiin BJP-in Hmar Chhaka an thawhpuite hi bawm khatah an khungkhawm vek a, MNF hi chumi zinga mi chu a ni a, Manipur hi BJP kalna a nih angin Manipur Chief Minister Biren Singh pawh kan hmu. Chief Minister zingah hian Pu Zoramthanga hi a senior a ni a, Hmarchhak state dang Chief Minister te pawhin an zah hle tih pawh MNF ngeiin an sawi ṭhin a, chuvangin Manipur buainaah hian palai hna thawk thei tur ber chu Pu Zoramthanga hi a ni tlat a ni.
Manipur tual chhung buaina hi Mizoram Chief Minister inrawlh ngei a ṭul chhan chu Mizo ngeiin kan tawrh vang a ni a, Meitei-hoin an thah leh in an halsak hi Mizo an ni. Mizo hi a hranpain a awm lo a, Sailo, Ralte, Kuki, Paite, Hmar, Gangte, Chhangte etc awmkhawmna hi Mizo tih a ni a. Biren Singh-a te hnam hian Pu Zoramthanga te hnam an that a, an biak in an halsak a, biak in Kraws tarna chu Meitei flag an tar hnan a, Hmar tlangval lu an la hial tih kan hmu. Pu Zoramthanga hian Biren Singh hi phone-in be mai mai lo se, a ṭul chuan zin chilh ve rap rap se, tun ang hi chuan NEDA lama an thawhhona hi buaina chin fel dan remchangah a hmang lo a, Zo Hnahthlak zawng zawngin kan ngaichang ṭhup a nih hi. Pu Zoramthanga hian remna thlen tumin palai hna thawk se, chumi piah lamah Biren Singh hi a chèt duh dan en hian a vau zawng pawha tih deuh hlek chu a ṭha ang.
Pu Zoramthanga tan hmelhriat loh va biak pawh ni lo mai loin, NEDA lama a thawhpui a nih angin a be ngei tur a ni. Zo Hnahthlak raltlan lo dawnsawn a pawimawh ang hian raltlan thlen chhan a zung nena phawi ro a ngai a, Biren Singh hi hmaichhana biak a ngai a ni. Pu Zoramthanga hian Mizorama raltlan a buaipui chhan hi Manipur a ni tih a hre chiang a, chu thil thlenga a mawhphurtu kan tih kan mawhpuh ber chu Biren Singh a nih si chuan zin chilh law law a ṭha khawp mai.
Manipur-a buaina hi kan en vang vang chuan Kristian leh Kristian lo buaina ti pawhin kan dah thei ang a, NEDA CM pahnih hi inbia se, buaina hi thui tâk chinfel theih a nih a rinawm a, Kristiante harsatna tawh mek hi a namai lo si a, Manipur-a Kristian biak in suasam leh hal chhiat a nih dan pawh hi kan lungawi loh thu hi hrilh a ngai a, buaina tawp ṭha tih thu sawi piah lamah he lam pawh hi kan sawi ngam a ngai; Mizo Kristiante hian.Chuvangin kan Chief Minister hian Manipur BJP Chief Minister hi a hrilh ngei ngei tur zawk a ni.
Pawl reng reng chuan din chhan a nei ṭhin a, thil tum thuhmun an nei ṭhin a, NEDA pawh hian din chhan a nei ngei ang a. Chu NEDA hnuaia mi thil tum thuhmun neia awm ṭhin, Pu Zoramthanga tan mi dang daih pawh ni lo; a ṭhianpa Biren Singh biak hi thil harsa a ni dawn si lo.
- R. Lalmuankima