MHIP Day ah chawl tawh lo ang u

July 6, MHIP Day hi Mizoram sorkar chuan holiday-ah a puang a, ka lo hriat thawi ve dan chuan MHIP President leh sorkar hruaitu lian tak nupa an nih ṭumin, MHIP Day hi holiday-ah an puang ta thut tih a ni. Hmeichhe pual ni bîk pawh ni lo, hmeichhe pawl pakhat ni bîk a ni a, a state puma chawlh hi chu thil fel lo tak a ni tih hi ka ngaihdan dik tak; tlang taka ka sawi theih chu a ni.

MHIP Day hi chu hmeichhe tán bîk hian restricted holiday ni mai mai se, a ram puma chawlh sup sup hi chu a hmasawn lo zia khawp mai. Kan sorkar hruaitute lah hian vote chân hlauin he holiday hi an tibo ngam tawh dawn si lo. Kan kal dan hi han thlir vang vang ta la maw, Mizoram hian MHIP Day a hman danah hian ram pum chawlh chhan tur pawh a ni lo a nia.

Mizoram ni ve tho Chawngte lamahte leh Lai leh Mara Autonomous District Council hnuaiah chuan MHIP hi a ding ve mumal lo, chawlh hi a ṭul lem lo. Mi tin huap pawl pawh ni lo; hmeichhe pual bîk a nih bakah hmun ṭhenkhata a pawl pawh an awm loh avang hian leh, MUP Day kan chawl lo ang hian chawlh hi thil ṭul lo a ni. MHIP tán bîk chawlh phalsak ni se a tawk a ni.

Chawlh chak em em hnam kan nih chuan hma kan sawn dawn lo. Ni khat lek chawlh a nih hian a sum zawnga sorkarin a hloh tam zia hi kan hre thiam phak lo ang. Mistiri hian khawpuiah chuan Rs 1000 vêl a hlawh tawh a, Mistiri 10000 hi châwl rual ta se, a ruaitu lam hian hlawh pek ngai tho ta se, Rs 10000000 an pek a ngai dawn a, a uiawm hle a ni. Sorkar hnathawk ni khat hlawh hi a tam dan chu tam tak a ni a, alo thlawna chawlh hi sim a ngai. Chief Minister ni leh tur chu tu pawh ni se, lo huaisen ngam tawh rawh se.

- Lallianzuala