Zirlaite tan Zirlai Pawl
Tunlai titi chu–Mizoram Legislative Assembly Secretariat hna lak chungchang a ni a, social media luah khattu lian ber pawh a ni hial ang, ei leh bar zawnna mai bakah ṭhalai hna zawngte hmakhua na taka nghawng thei a nih avangin Mizo ṭhalaite chuan kan veiin kan sawi zui tur pawh a ni reng a ni.
Chanchinbu leh chanchinthar danga kan hmuh dan chuan, Mizoram Legislative Assembly Secretariat hna lak chungchangah hian thil fel lo ni ngei tura ngaihbel theih thil a awm niin a lang a, he thil siam ṭha duhtu ṭhalai pawh an tam hle.
Zirlai Pawl hrang hrang– Mizo Zirlai Pawl (MZP), Mizo Students Union (MSU), Hnampual Zirlai Pawl leh College SU hruaitute inhmukhawm chuan, Mizoram Legislative Assembly Secretariat hna laka chhungkhat laina induhsak bikna a awm nia an hriat avangin, hna lak hi cancel turin an ngen a, an ngenna a hlawhtlin mai loh avangin Assembly House kawtah an pungkhawm hial a nih kha.
Punkhawmna hunah hian Resolution pathum an pass a:- Mizoram Legislative Assembly Secretariat hna lak hi cancel ni rawh se; Mizoram Legislative Assembly Secretariat recruitment rules thar hnuaiah hna lak thar ni rawh se tih leh, Mizoram Legislative Assembly Secretariat hna lak hi cancel a nih hma chuan hmalakna hi chhunzawm zel a ni ang, tih te an ni.
Hna hmutute nihna leh an chi leh kuangte tarlan a nih dan chuan Assembly Speaker laina hnaivai takte an ni deuh vek hlawk a, exam na lama an thiam fàl bik em avanga hna hmu an nih chuan an thikawm loh a, demna tur pawh a awm hran lo – mahse, a ruala thàwk leh khata an tling ṭhup erawhin ngaihtuahna a ti thui hle thung.
Mi rinawm tak pakhatina thu min hrilh dan chuan, hna exam an neih dawn hian Mizoram Journalist Association (MJA) chu thuhretu atan an sawm a, mahse he an sawmna hi MJA chuan an pawm lo – MJA an sawm chhanah; exam question hi tu m'a khawih loh a nihzia leh a him ngei a ni tih entir an tum a ni.
Hna lakah hian dân lo leh thil fel lo a awm a nih loh chuan endiktu leh thuhretuah pawn lam mi sàwm hran kher a ngaiin a rinawm loh. Hna latu lamin ṭan chhan atan leh hmai phih nana hman an tumna laka MJA lamin inthiarfihlim nachang an lo hria hi an fakawm hle.
Engpawhchu lo ni se, thuneitu lamin hna lak chungchang hi en nawn leh ngei se la, thil dik lo leh fel lo a awm a nih chuan langtlang takin tar chhuak ngam ngei se, tih hi Mizo mipuiten kan duh dan a ni.
Zirlai Pawlte hian ram leh hnam hnuk khawih thil tam tak an lo buaipui tawh ṭhin a, mihring ve bawk an nih avangin chèt fuh loh chang pawh an nei ve e. Tun ṭumah erawh an tih tur dik tak an ti a, zirlai leh hna zawng mekte tan kawng dik an sialsak a ni.
Chuvangin, kan Zirlai Pawlte pawh resolution an siam ang ngei hian an hmalakna hi a hlawhtlinna an hmuh hma chuan tawpsan lo se, an tha tichaka lo thlawp chu mipui, a bik takin ṭhalaite mawhphurhna a ni ve thung ang.
Dik lo taka rorelna a taka kan do ngam a, huaisen taka thil dik lo leh ṭha lo kan do ngam tak tak hunah, Mizoram hian kawng dik a zawh dawn – chuvangin tun hun chauh ni lo, nakin hun zelah Sorkar hna lakna dik leh langtlang a awm theih nan tun ṭuma thil thlengah hian 'Dikna' lang chhuak mawlh rawh se.
- Lalthansanga, Saitual