A hnuhnung hnung Phûngin seh! (Aizawl hi Ruling tan tlan chhuahsan a hun tawh em?)

Tunlai Mizoram Politics chu a va chi-ri ve le. MNF ber pawh an buai ta nuai nuai mai. Pu Robert Romawia Royte chu Aizawl East 2 aṭangin a tlanchhia a, a tlin theihna tura a beisei Hachhek Bial lamah a kal nal nal. Ṭhenkhat chuan kan lo nuihzat mai thei a, Pu RRRa hi pa fing hmasa mahni nunna tura tlan chhiat nachang hre hmasa, mi dangin bial an sawn hmaa a him tura rin lo bawh thiam a ni ta zawkin a lang. Pu Robert-a partner kumhlun Pu R Lalzirliana pawhin a bial hlun Ṭawi Bial a tlanchhiatsan ve leh ta bawk. Chhuah hi a him zawk chuan politician chu a chhuak mai tur a ni, bial hlun leh bial him kumhlun a awm tak tak lo, survival fight hi a finthlak a ni, politician nih chuan.

Pu R Lalzirliana lo tlanchhe ve leh zel hian thil awm dan a tibuaithlak zo tlat. Pu Zira hi Aizawla MLA chu ni se thil mak a ni lem lo a, Saitual Bialtu a nih laiin a tlanchhe ta duai duai hi chu a inhmeh lo. Pu Zira pa huaisen leh pa rorum kan tih ṭhin kha a ni si a, a rumzia pawh kan lo hre tawh. Tuna taka Pu Zira a huaisen tlang ngam ta loa a tlanchhe vang vang hi chu a mak hle a ni. A mak loh dan awm thei chu Pu RRRa a tlanchhe hmasa zawk a, ani advice hi a ni thei tlat. Tun hnaia Zonet lama Pu RRRa interview kha in lo en chuan 2018 a Congress aṭanga Pu Zira chhuak kha Pu Zira thutlukna ni loin Pu RRRa plan a lo ni zawk si a, tuna Pu Zira chhuak pawh hi Pu RRRa nen sawi dunin chhuah ve ve an rel a ni ve thei tlat a ni.

Tuna titi thar lam berah chuan Pu Zoramthanga hian a bial pahnihna atan Chalfilh ni loin Mamit a en dawn an ti. Mamit hi Er Pu H Lalzirliana bial a nia term khat chiah MLA a la ni chunga a bial an luah lan a nih chuan ṭha taka an thlem dam a ngai ang. Er Zira hi a ding dawn lo a nih chuan Pu Lalruatkima hi an khaw chhuah na lam a nih avangin a kal mai thei an tih laiin Chief Minister Pu Zorama zawk Mamit kal tura an sawi hi chu chân loh khân a ni. Mamit hrim hrim hi chu minority vote tamna a nih vang hian sum neih chuan thui tak chu thil a tih theih chiang a, hei hi an hre fuh a ni mai thei a ni. A lehlam aṭanga thlir chuan MNF in MLA an neih sa na bial a nih avangin Mamit hi Pu Zorama emaw Pu Ruatkima emaw kal mah se a mak lo, palian ve ve an nia MNF tan tlin theihna bial a ni. Mizo an neih ṭhat sa bakah anni pahnih kher hi chuan minority vote pawh an la nual thei ang.

Home Minister Pu Lalchamliana chawlh tur thu lo chhuak hi a mak lem lo. Pu Chama hi MNF ah chuan pa zahawm ber pakhat a ni a, Speaker ni chung khan politics hi chawlhsan ta se thangthar te pawhin an ngaihsan rawn a ni ang. MNF an sorkar leha hna pawimawh leh fak hlawh harna Home Minister an nih tir kher hi a pawi ta a ni. Covid-19 hri a lo leng kher kher nen Home Minister fak hlawh lem lo takah a chhuak ta a, a rinawmna leh duham loh zia hi a hre chiang chuan an fak zel thung a ni. Home Department a enkawl dan hi an fak lo a ni mai a, officer pakhat kutah thil a dah tam avangin administration a fel fai lo tih a ni a, amah hi a active tawk lo bawk tih a ni. Electoral politics atanga chawlh a tum hi a zahawm a, ṭhangthar kian a inti pawh hi tlanchhia aiin chawlh puang tak tak niin a lang. Chutihlaiin Hrangturzo bial a enkawl danah hian tling nawn leh tura rin a ni lem loa chawlh a puang ta pawh hi tlin inrin laia boruak ṭhat laia chawl chu a ni chuang lo, boruak hniam laiin a chawl dawn a ni.

Aizawla MNF MLA neih te tan chuan boruak thlir hian chhuah hi thil awm tak a ni, dem tur an ni lo. Sorkar hnathawk term tluan deuhthawa hlawh la mumal thei lote hian pawisa awm lo hi an hlawh ah lang chhuak ṭhin mahse tute project lamah emaw chuan pawisa a awm tih an hmu a, sorkarah an lung a awi lo. Sorkar hnathawk hian MNF hi vote tlin nawn an chak dawn loh avangin sorkar hnathawk tamna Aizawla MNF ticket a din nawn hi chu a huphurhawm hle a ni. Tunah hian Aizawl tih hming pu zingah a laili ber East 2 aṭangin Pu RRRa a tlanchhe tawh, Development pawisa dah lut hnem, khawhar in leh damlo kan taima, ṭanpuina pawisa sem tam Minister meuh pawh a chhuak tlat a ni.

North 3 ah Pu Lalmuanpuia a la awma, Pu Muanpuia hi pa ṭha tak leh fel tak a ni chung hian sorkarah a thu si loa a bial tan a chhenfâkawm tawk loh piah lamah MNF boruak hniam nen chhuak thei chu ni se chhuah a duh a rinawm. Mahse bial duh thlang thei a ni lo ang, a la junior. West 2 lamah Pu Lalruatkima hi term hnih MLA ni tawh a ni a, a dinhmun ṭha viau a a lan laiin Chalfilh leh Mamit an sawi ri tlat a, a mak vak lo. Mihring hi inhne chin a awm ṭhin a, kum 10 a tlin tawh bakah kum 15 kal ta khan a lo in candidate tawha mi tam tak chuan an lo vote tawha a zawna vawi 4 em em vote nawn hi an chak tawh loh theih bakah MNF boruak avang hian chhuahna remchang hmu se chhuah a finthlak tawh. South 3 hi Aizawl rimnam Aizawl ni tak tak lo deuh awm khawmna bial a ni a, Prof Lalnunmawia tán chuan hmun dang aiin a vote hmuh hnem theihna ber tur bial a nih hmela insawn loh a fuh ang, insawn thei tur khawpin a la senior tawk lo bawk a, a insawn a rinawm lo.

East 1 bialtu Pu Zoramthanga tán East 1 hi a hlauhawm tawh a, Zemabawk Local Council inthlan kha hmanlai thil ni loin 2023 thil a hi. Mipuiin ZPM headquarter hruaitu 10 pawh tling lo chhuak avang hian MNF an ring thar thut dawn lo East 1 bialah hian, Pu Zorama tan meuh pawh ṭan mar a ngai ang. Pu Zorama tan bial tlanchhiat san hi a zahthlak bakah MNF tan a him lo, chuvangin Pu Zorama tan bial pahnihna neih ngei ngei a ṭha. Aizawl West 1 hi Pu Zothantluanga bial a nia, MNF MLA ṭha ber a nih loh avang hian tlin nawn a duh chuan a beih fe a ngai dawn. Bye Election hmanga dah luh a nih angin a election pangngai fight leh hmasak tur hi a tlin loh chuan a pawi dawn, bial dang zawng turin a la junior bawk si a, a nih ang anga a fight a ngai a ni.

Ruling kah ni se boruak thlir hian MNF tan chuan Aizawl hi a him vak lo tlat. A tlin theih loh lam ni loin tlin ngei duh tan chuan Aizawl pawn pan a finthlak a, Pu RRRa mipui mar dek thiam in a man chat. A hnuhnung hnung Phungin seh tih ang maiin tun ṭum inthlan kher kher hi chu boruak en hian MNF lam Aizawl aṭanga chhuak ve lo chu Phungin a seh duh hmel hle a ni.

- Lalmuanpuia