Pelican crossing kan mamawh lo

Zo fate Jerusalem - Aizawl khawpuiah phai lam leh ram danga kan hmuh ṭhin, motor-te tlântir a, mihringte kaltirtu pelican crossing an tih mai, signal light chu dah a lo ni ve ta a, SIPMIU, Aizawl hmalaknaa dah niin an sawi. Khawpui dangahte chuan a ṭangkai hle ang tih a rinawm a, Aizawlah erawh chuan a ṭangkai lo mai ni loin, a hnawk zawk mah niin ka hmu.

Aizawl City Traffic SP hlui Pu Lalbiakzama khan Aizawl khawpuia traffic jam nasa lutuk hi a ngaimawh ṭhin khawp mai a, a tihziaawmna tur pawhin hmalak nghal mai theih chi leh hun duh rei chu (long term plan)-te a nei niin ka hria - TV vela an thusawi ka lo hmuh ve aṭangin. Ani sawi kha niin ka hria, ho têa lang si, pawimawh deuh chu - Aizawla tlangdung kawngpui (main road) bikah hian, a bikin lirthei tlan tam lai (peak hour)-ah second 5, second 10 lek pawh a hlu hle, tih a ni. Ka hmuh ve danah pawh, a dik hlein ka hria. Tin, traffic jam-ah motor tam tak an intlar a, chu'ngah chuan motor (car) pahnih/khat lek din belhna tura awl awm ringawt pawh a hlu hle.

Pelican crossing signal light-te hi khawpui dangah chuan a ṭangkai em em a, traffic movement viltu police-te hna pawh nasa takin a chhâwk ang tih a rin theih. Aizawlah erawh chuan a tak takin han hmang chiah ila, traffic jam tizualtu, lirthei tlân leh mihring kal tibuai zualtu, harsatna thlentu zawk a ni dawn, tihah hian zaah zain ka ṭang ngam.

Entirna han sawi ta ila: Raj Bhavan north gate aṭangin hmar lam panin car a tlân a, Venghlui lama kawi thla tur ni ta se. Hmar lam aṭanga chhim lam pana tlante karah, lirthei leh lirthei inkara second 5 lek tlaah pawh traffic police duty-te'n an hûi zeuh a, an kal mai a, hmar lam aṭanga chhim lama tlante tibuai tam lutuk loin a tih mai theih. Pelican crossing hman a nih erawh chuan, kawi turin han nghah det a ngaih chang a awm fo dawn a, nghah chhungin hnung lamah motor eng emaw zat a dang dawn a, chu chuan jam a siam belh thuai mai ṭhin. A kaihhnawih a thui thei hle bawk. Hei hi chu entirna pakhat chauh a ni; hetiang chi hi pelican crossing dahna zawng zawngah a ni ang.

Tin, traffic police-te duty chhâwk zângkhaitu tur a ni lo. Duty pakhatin signal light thlak turin a vil a ngai a, duty dangin a kut ngeiin lirthei a hûi tho a la ngai bawk a. Pelican crossing tam zawkah chuan red light-in a tihdin motor, a hma bera awm chu light awmna nen a/an inhnaih chilh tawh avangin signal light (green light) hmuh a har tawh bawk. A nih tur ang a ni lo nghal hrim hrim.

Sawi tur a tam, kan sawi seng lo. 'Aizawl traffic jam hi i ti-jam zual sauh ang u,' kan ti a nih ngawt loh chuan, pelican crossing hi hman loh a ṭha zawk e. Heti hian awm ve mai mai se, a siamna lamah, a siamtute'n sum eng emaw zat an hlêp ang a, hlâwkpui an awm ang a, chu chu a ṭha tawkah i ngai mai ang u. Miin an dah tawh a, hmang ve hrim hrim ang u, kan ti ṭâlh a nih pawhin, Pathianni velahte hmang ila a tâwk viau ang.