Mizote kan zim, mzp an ni zual em?

Vanglaini Chanchinbu 2 & 3 July Issue-ah Hnam dang Pasala nei Mizo Hmeichhia MLA nih tumte MZP in an dodal dal dawn, tih thupui a lo awm kuau mai a, thil eng eng emaw min ngaihtuahtir ta a ni. MZP te thil thlir dan hi awm tihpui kan awm nual ang, dikna chin pawh a awm bawk awm e. Mahni hnampui awm renga hnam dang pasal neih hi ngai thiam lo tan chuan thil àwm tak a ni reng a ni. Kan Mizo hmeichhia hnam dang pasala neite hi chi hnihin a thlir theih awm e. Ṭhenkhat, tute emaw khawkhain kan hriat lem loh hnam dang pasal nei an awm a, tifuh an awm a, tifuh chiah lem lo pawh an awm ang.

Chutih laiin Nula changkang hnam dang pasal nei, an pasalte pawh mi pangai chin leh ṭhenkhatte phei chu vantlang chunglam mi te an awm bawk. Tunlaia kan hriat lar deuhte chu Pi Nightmare -i (ti mai ang, min lo ngaithiam se la) leh Pi Alinery Lalngilneii Lianhlawngte hi an ni. Mizoten kan pawm tlan vek nia lang chu; Anni pahnih hi Mizo te leh kan ram hmangaihtu an ni tih hi a ni awm e, tunlai tak phei chuan mahni hnampui pasal a nei, anni anga ram tana thil ṭha tih duh leh tum hriat tur kan nei meuhin a lang lo. Chutih laia chanchinbu meuh a MZP ṭhahnemngaihna thupui lo lang hi mak ti tan chuan a mak lam deuh chu a ni.

Mizote hi kan inen chian a ṭul viau em le, kan ram chhung khawi khuaah emaw Hindu Temple lo awm dawn se la kan duh lo hle ang. Chutih laiin, kan hlabua mi, "India ramah Lal Isua thlen in a vang, Thisen chu entir rawh," tih hla tuipuitu kan ni hlawm ve bawk si.

Lanna tlang dang aṭanga thlirin, Mizote hi hnam dang ngai thei lo (Racist) pawl tak kan niin a lang. Kan Mizo nute ngei, hnam dang pasala nei chung chung pawh a, mahni ram leh hnam hmangaih chauh ni lo, kan ṭhatna leh hmasawnna tur ngaihtuah em emtu rilru na taka siamte hi ngaihtuah chian chuan a ṭha lem lo, a Mizo lo va, a Kristian lo bawk.

A rei tawh viau, Serampore-a BD kan zirlaiin Barakpore Army Contonment-ah Mizo nu Sipai (Major) pasal nei a awm a, an pa a fel bawk a, kan tlawh fo ṭhin, ka hriat ual loh chuan an nu khan a pasal kha Kristian-ah a siam a ni. 2018 khan Switzerland leh Rome ah te ka zin ve a, Switzerland khawpui ah Bilkhawthlir nu German pa Vantlang chunglam, pasal nei a lo awm a, chaw eiah te min sawm a, kan lawm hle. An pa pawh kha a felin a zahawm hle, India mi kan nih avangin Dal eitir min duh si a, Zurich khawpuiah Dal (Dailuah) a lo zawng char char a, a tawpa tawpah Punjabi dawr a hmu fuh mial a lo ni a, India pawisaa chhut chuan vawi khat Dal ei man kha a sang hle a ni. Chutah, "Kan ram in hmu ve tur a ni," a ti a, a motor ṭha berin German ramah min va tlan luhpui hram hram lehnghal.

India rama lehkhathiam ber pawl hnam kan nihnate ngaihtuahin kan awm dan leh ngaih theih loh te hi a nep deuh em le? Kan India ramte ngei pawh hi thlir ila, kan Prime Minister chhuan tak Indira Gandhi(L) kha hnam dang pasal nei a ni a, kan ram ṭhenawm Pakistan PM hlui Pi Benazir Bhuto leh Myanmar hotunu Pi Suu Ki ngei te pawh hnam dang pasal nei an ni. MZP te ṭhahnemngaihna rilru hi thlirna tlang dang pakhat aṭang chuan a zim deuh mah mah lo maw?

- Rev. Lalbiaksanga Chinzah