Zoram Politics Inlumlet Thlirna

MNF leh Congress hian kum 2023 inthlanah hian tlin an tum a nih chuan ZPM ZPM ZPM ti reng lo hian MNF hnathawh ṭhat hi han tarlang tam zawk se vote an hui zawk ang. Congress pawh hian tlin nawn ve leh an tum chuan ZPM ringawt chai lo hian Congress hnathawh tawh leh an thawh zel tum dan sawi uar se miin an ngaina ang. ZPM pawh hi heng boruak karah hian lo ngawi hle hle se Grassroots Politics hi lo khel chhunzawm mawp mawp se Social Media boruak hi buaipui lo se an ṭhatpui zawk ang, ZPM hi insawifiah tura mi dang game play ah an lo buai hle tih a lang.

MNF hian Ruling Party an nih hi an hai em ni? tiin ngaihtuah a awla a Ruling ber hian mi dang beih an uar. MNF hian an beih tam ber an thlak thut a, ZPM hi an bei ta ngar ngar maia ZPM beih hmanga vote hmuh theih a ni lo, MNF hi chuan MNF hi zuar mai se a ṭha. MNF tan chuan, "Kan sorkar leh hunah Minister thil tithei bik kan nei tawh lo ang. Sum kan atchilh tawh lo ang. Minister zingah sorkar hnua hausa chak tak tak hi kan dah nawn lo ang. MNF kan sorkar chuan tlawm takin kan awm ang," tiin au se chu miin an ngaina ang. MNF au hla turah chuan," Mipuiin in nin em em hi kan hre tawh a, kan Party chhungah pawh kan lo sawi ve fo tawh a, Lunglei leh Zemabawka kan mualpho hnu khan kan in-X-Ray tawh a, mipui ninzual kan Politician hi kan hriaa kan thukru ṭhen tawh ang," ti ula mipui hian in MLA tam zawk hi vote nawn leh kan chak. MNF hminga inluling leh intilar mi 10 pawh tling lo, hausa tawntaw leh sum awmna um suau suau hi kan hne ngawih ngawih. ZPM in beih vang hian mipuiin an ngaina tawh dawn chuang lo che u, Social Media lama in ṭan lâk thar pawh hian nghawng a nei dawn lo, in politician langsar 5 vel in chawlhtir chuan in tling nawn ang. Heng mite hi in hre chiang nangmahni hian, heng mite hi in thuhruk loh chuan ZPM beih hmanga sorkar nawn tum hi Politics kalphung a ni lo. MNF tan chuan MNF siam ṭhat tum hi a tawk zawk a ni.

MNF internal politics hi mi sawi ang em ema chhia a ni lo, MNF MLA zinga ZPM hruaitu hlui chaw eikhawm ṭhin hian Leadership an fight ṭan tih hi thil awihawm loh tak inpuhna mai mai a ni. MNF tan internal crisis a awm loah a ngaih theiha buaina lian tham awm thei Dr R Lalthangliana chu hup beh ni tawhin a lang tawh lo hrim hrim a, tuna MNF buaina zawk chu an MLA 27 zinga mi 6-8 vêl sum atchilh hmingchhia (a nihna rawt rawt an portfolio sawi lo mai ang) hi dah ṭha ngam se MNF hi an sorkar ang, ZPM beih beih hi a ṭul lo Ruling zawk tan tih loh tur zawk a ni.

Congress piangthar hian ṭhat tum luatah hmana mi chhe veka chhuah an tuma hmana mi awm khawm kha an la ni si a, chutah tak chuan Leader neih ṭhat pawimawh na an aupui hian Pu Lal Thanhawla kha Leader chhe takah indirect tak hian an chhuah hreh map lo. Congress insiam ṭhatna au chhuah a tawk laiin ZPM beih hi an kalpui na mah mah a, ZPM bei loin MNF bei zawk se Congress thar awm dan pawh chu mipui hrilh zawk se. Congress hian Pu KS Thanga sawi cheng nuai 25 Pu Lalsawtan a PSO nen an va lak pawh kha an sawi fiah a ngai a, ZPM beih ai chuan he thu hi sawi fiah se vote an hui hnem phah ang.

ZPM-in hnam dang pasal nei Candidate an nei dawn em tiin Pi Vanlalawmpuii chuan nawmsak duh avanga hnam dang pasal nei tiin mahni hmeichhiatpui a sawi chhe duh a, chu Congress tho chuan Lunglei lamah hnam dang pasal nei hmeichhe dang dintir an tum leh a nih si chuan, mahni hnathawh tum sawi aia mi dang beih pawizia chu inthlan hmain an hmu ta a ni.

Congress thil pawimawh apianga Pu Zodintluanga tel ta lo hi a chhan hria kan awm em? Hengte hi Party dang hian an sawi chhuak lem loa, ZPM aṭanga bang mi langsar vak lo lo interview duh tawk vel Politician thar Congress lamin an nei a, ZPM beih hmanga in tih nun leh hian vote a keng tel lo. Street campaign leh social media ṭan lâk pawh Congress mi bawk ngaithla tura kal khawm in Congress leh Congress an in lok sak diat diat a, hei hi chu insiam ṭhatna a ni lo. Mizoramin tute nge an nih tih kan hriat tawh GS rual leh Organiser rual leb Party Worker rual awmkhawm zingah Politics eizawnna atana hman zel tum an awm chhung chu thawh leh a harsa ang. Pu Zodintluanga te unau leh Pu John Rotluangliana dah bo tumna lian tak hi buaipui se, ZPM hi buaipui lo se an hlawk zawk ang.

Party hlun, party lian ṭhang leh mi hausa tam ber awmna party an nih avang hian ZPM beih politics bansan hian Congress insiam ṭhat dan hi zuar se, an chhung buaina hi chingfel hmasa se an hlawkpui ang. Kum 2028-ah chance an neih theih na tur chuan tuna ZPM bei lo hian Congress siam ṭhatna hi sawi uar se, mipuiin an la ngaina thei ang.

ZPM hian bial tinah campaign beihpui an thlak mek an tih hi eng angin nge an kal hriat a chakawm, Mizo rilru ah chuan Vai style Street Campaign ri bung bung aiin mihring tak chibai leh luhchilh chat chat hi an tih loh chuan boruak an neih hi a tak awm lo boruak a ni ang. Vai rama Political Rally ang hi chu boruak siamna mai mai a ni, ina len chilh kawtthler kal chilh politics hi an ngaih pawimawh a ngai. ZPM hian Social Media vek hi an vei leh lutuka buaipui chuk chuk hian vote a len pawh ka ring lo. Tun hma pawhin media ah chuan an chak ṭhina a taka mipui chibai an ngaihthah avangin an tla thum leh tho tho, party lar hian vote a keng tel loa a vote tu tur te kal chilh a pawimawh. Congress hian boruak an khel lutuka Bhawan Politics khel on Grassroots an kal pel mek a, tute emaw lut thar hmanga in ham puar an tuma hei hi tun hmaa ZNP lo chet sualna kha a ni, MNF bawk hian hei hi an kalpui thiam a SEDP nuai 3 thleng nawi hmangin tunlai hian mipui an chibai chat chat a, MNF leh ZPM hian final an khel anga Social Media politics leh tute emaw boruak siam hmanga insiam ṭhat tum Congress hi chu Lunglei Municipal Council leh Zemabawk ang khan pathumna fal tak ni thei dinhmunah an ding meka insiam ṭhat hun an la nei.

- Lalremruata