ROPUI

Mitin hian ropui kan tih zawng leh tih loh zawngte, kan teh dan zawngte pawh hi a inang lo deuh furin ka ring. Heng sum leh pai ngahte, kan chawrchhuahna leh kan sei lennate, kan finna leh remhriatnate, kan thiamna leh thil kan tih theih dan zawngte aṭanga kan teh dawn a nih chuan mi rethei; a sûr a sâ hnuaia eichawp dap, râp in leh daikil; mi kawmkára cheng, kekawr mawngpawp nena chhuat-dài-háng a ṭhu mai ṭhin; mi chanhái keini-te ang duang tan chuan he dinhmun ‘ropui’ hi luah ve tur chuan pialtlepa liluh tum ang vel a ni ngei ang!

Mihring mize chhungrilah hian mi dangte aia danglam; mi dangte aia chungnung zawk niha thuneihna kengkawhtu nihte, thuneihna lekkawha pumhmawmtu nih chaknate hi a inphum ru deuh vek ti ila kan sawi sual awm lo e. Kan thil neih leh kan mizia azirin a lanchhuah dan a inang lo mai ṭhin niin a lang.

Khawvela kan hmuh theih hausaknate, sum leh pai ngahte, mifingte leh mithiamte hi mi vantlangin kan ngaihsan, mi ropui tak nia kan ngaihte chu an ni ṭhin. Chu'ng mite chu kan chung en tlat ṭhin avangin an bula khawsak a, tlangnêl taka ṭhian ang maia han biak pawh kan inthlahrung hial ṭhin a nih hi!

Mi tam tak hian kan awm mai mai hi kan ṭhain kan fel ta viau angah kan inngai mai thei. Thuneihna kan neih tlem avanga ropui anga lang tate pawh kan ni mai thei asin!

Thuneihna sâng tak han chelh ta ila kan mizia a danglam viau thut thei! Mi biangbiak nuam em em ṭhinte pawh hi biak kan harsa viau thut mai thei! Miin thiltithei leh ropui viaua min ngaihlai hian kan lo khawhar ru viau ve thei bawk. Chu chuan milem nunin min nuntir thei a. Nun ruak tak nei siin ropui tak anga intarlan reng kan tum tlat thei a. Chubakah, mahni hlawkna tur ringawt ngaihtuah hian kan thuneihna leh ropuina hi chelek kan tum viau reng thei bawk.

Mi hausa a ni emaw, mi rethei a ni emaw; mi máwl a ni emaw, lehkhathiam sang tak a ni emaw; he ropui/ropuina hi chu thil dang daih a ni zawk asin!
Mi ropui tak tak chuan heng khawvela kan hmuh theih thil ropui nia kan ngaihte hi an mamawh viau hran lo. An landan leh nundan; an nunphungin an ropuina chu a rawn lanchhuahtir mai ṭhin. An thil neihah an ropuina a innghat lo a. Ropuina chu an nunin a ken tel tlat avangin mi hnuaihnung ber tan pawh mi tawrhhlelhawm an ni ngai lo. An nun chuan thiltihtheihna an nei chungin; tlawmna nun hial a ken tel tlat avangin mi tin ngainat leh inbun ruah ngamna an ni zawk ṭhin.

Thuneihna pumhlum neitu nih a, ropuina thlahlel a, dik lo taka an thuneihna hmang ṭhintu chu a ram mipui tan mi hnawksak tak an ni thei.

Mi ṭhenkhat- Adolf Hitler te, Mussolini te, Mubarak te, Saddam Hussain te leh mi dang chanchin hrang hrang aṭangin kan hre thei ang. Heti ang mi hian thuneihna pumhlum chu an neih avangin an thuneihna an hmang sual a. Paih thlak an nih chhan ber pawh thuneihna pumhlum an kawl a, mi chungchuang leh ropui bik angah an inngai a, chu chuan mi corrupt ah anmahni chu a siam vang a ni ṭhin.

Keini Mizote nunah hian ropuina hian engti ang takin nge tunah hian min kaihhruai ve tak dan nia i ngaih le? ‘Ram te, thiltihtheihnate, hausaknate, ropuinate, rorelnate hi chatuanin ka ta ni zel rawh se’ kan ti hial zawk ta mai niin i hria em ?

Mihring chuan a tun dinhmun aia sang hreta awm hi a tum ber a ni ṭhin. Chuvang chuan hmalam hun ropui leh ṭha zawk a neih theihnan a nun a hmang ṭhin a. A lungawina chu a aia tam hret neih belhah a ni.

Chuti anga a hmasawnna chuan thuneihna neitu dinhmuna ding tur thlengte pawhin a hruai kai thei ṭhin. Chu a thuneihna leh ropuina chu a hmansual chuan mi corrupt takah a chhuak thei. A nihna leh mawhphurhnain a ken; mipuite tana rawngbawltu nih tum lo leh, ram leh hnam tana hna ṭha thawk lo a, a chhungkua leh amah inhaivur nan chauha a thuneihna a hman chuan amah chu mi corrupt a lo ni ta ṭhin a. A ni lo zawnga a thuneihna a hman avangin ram leh hnamin a tlakchhiatpui ta ṭhin a ni. Chuti ang mi chu ropuiah i ngai thei ang em le?

Khawi hmun leh hunah pawha mi rinawm; mi dik leh taima taka awm tlat ṭhinte hi mi ropui dik tak chu an lo ni e. Heng mite hi an dik a, an rinawm a, an taimak tlat avangin he khawvel hi hlim leh thlamuang takin an hmang ṭhin. An thih hnuah pawh he khawvel hian ‘mi ropui’ tiin a chhinchhiah tlat tawh ṭhin.

Chu vangin, he khawvel hausakna sulrul leh tuiêkin a eichhiat leh mai tur sum leh paite, motor man tote, khawsak changkan leh changkan lohahte, in chhawng ropui tak neih leh neih lohahte hian ropuina chu a lo awm ber lo. Mi; a hausa emaw a rethei emaw, ropuina dik tak chu ‘kan nun’ ah hian a ni a lo awm daih ni! Ropuina dik tak chu kan pianpui ni lovin, kan thiltihah hian a lo lang chhuak ṭhin a ni zawk e.

- Vanlalzawma, Muallungthu