Parvatui nun zilh ngai lo

Khuangchera hmingthan lai ber an sawi ṭhin chu Parvatui khuaa a awm lai hi a ni awm e. Val upa, tlangvalte kilkawitu a ni a, an khuaa tlangval sual deuh, naupang velh mai ching, nula chhaih nawmnah leh ṭawng thlahdah lutuk ang chite kha ṭha takin a zilhhau ṭhin a. Parvatui tlangvalte chuan Khuangchera kha an ngaina hle a, sakei hual ni khuate hian Khuangchera bulah chuan an huai sawt ṭhin a ni awm e. He Parvatui khawtlang nun hi Khuangchera hian a siam ṭha hle a ni awm a, tu mah kha hauh ngaiin an khawsa ta ngai lo, mi dang tana hnawkin an nung lo a, thiam leh ṭha sa ang vek khan Parvatui mihringte kha an lo awm tak avangin 'parvatui nun zilh ngai lo' tih thu hial a lo chhuah phah ta a ni.

Tun dinhmunah Parvatui khua hi la awm mah se, Khuangchera huna Parvatui nun zilh ngai lo kan tih erawh Parvatui-ah chauh ni lo, Mizoram khawi hmunah mah hian hmuh tur a awm kher tawh lo ang a, beisei chi-ah pawh kan ngai tawh awm lo e. Mihring nunhonaa nunphung ṭha leh dik, nungchang mawi, rilru ropui kan tih hi kan bosal hret hret zel niin a lang a, hei hi mimal, chhungkua, khawtlang leh ram ang pawha kan inngaihtuah ṭheuh a ngaihna lai a ni.

Tu fa zilh tur mah hian chanvo ka nei lo a, tu pa hrilh tur mahin theihna ka nei lo, mahse, mihring nunhonaah hian inzilh leh inhrilh ngai miah lo pawha mi pangngai chinin kan hriat ngei ngei tura ngaih thil tam tak kan hre ta lo fo mai hi chu kan zirna nge, kan chhungkua nge, kan khawtlang nge, ram rorel dan hi dem tur hriat a har tawh khawp mai. Dan kalh ni kher lo mah se mihring pakhatin mihring dang ngaihtuah tel lek loa 'ka nun' tih tháwka thawa kan duh dan taka kan nun ṭheuhna chu ngaihtuah pawhin a hrehawm, chu chu kan tawng mek thung si. Parvatui nun zilh ngai lo ang maiin mihring a ṭhat thluam theih kher loh ang, heng thil tlem te chauh tal erawh hi chu a thei chuan i ti hram teh ang u.

- Kawng kal chung leh lirtheia chuang chunga mei zuk hi ek thlauh ang char char kan ni. Kan hnunga mite tan a hnawkzia hi kan lo la ngaihtuah ngai lo a nih pawhin ngaihtuah tawh ang u. Inhrilh leh inzilh ngai loa kan sim hlauh theih thil a ni. Kan mei zuk khu kan kalsan duah duah kha thawhah nei, exer la, rimchhia ti hrim hrim tan pawha hnawksak tak tling, Mizo khawtlang nun mil lo, mi dang ngaihsakna tel lo lutuk nunphung a ni awm a sin. Khuangchera kha lo tho leh se 'Vala, i hnunga mite hian i mei khu kha kan hip ve duh kher lo a nia," a ti mai lo'ng maw?

- Pathiannia kan inkhawm bana kan khawsak dan en hi chuan khawvel hi kan ta emaw tih mai turin kan khawsa ta hlawm ṭhin. Inkhawm bangin lirthei an hlau lo ber an tih fiamthu ang deuh takin, kawngpui awh zau thei ang bera kalho kher hi chu kan sim a ngai. Mi dangte tana malsawmna thlentu chanchin ngaithla zoa hawte nunah hian lirthei khalhtute tana harsatna thlentu nun kan neih si chuan, Chung lam khian hlawhchham a inti ngawt ta ve ang. Khuangchera kha lo tho leh se kawng sir deuhah kal rawh u a tih ka ring ṭhin.

- 'Vantlang kawng tihnawk chuan van ni an sal ngai e' an ti ṭhin. Lirthei neih hi kan hmasawnnain a chhawm a ni, leia neih tel tur ni lo mah se kan tih tel ngai chu, a sil hi a ni. A silna hmun kan pan hman lo, rem ngang lo a nih ngawt loh chuan kawngpui tihuh duah duaha lirthei sil hi kan kal san a hun. Kawngpui nál chu a hmangtu, kea kal emaw lirthei vék tana a him lohna hi mi dang tana kan hnawksakna anchhia nen a inhlat lo a nia. Khuangchera kha chuan kawngpui i tihhuh chin hi chu kal a hlauhawm a nih hi, a ti mai thei.

Mi dang tana hnawk zawnga kan khawsak hian kan thih phah hauh lo ang, mi dang tana malsawmna nih erawh chu Mizona, piantharna, tlawmngaihna, hmingṭhatna a ni thung si. Mi dangte tana hnawksak loa nun hi thil har a ni lo a, mi dangte ngaihtuah ve chunga nun hi nun ropui kan tih fote nun dan pawh a lo ni.

-Lalrinfela, ITI veng