Mizo hmeichhia te leh rimawi
Tunlai khawvel hmasawnna leh changkan mek zelah hian rimawi lamah pawh hmasawnna hmuh tur a awm zel hi a lawmawm takzet a ni. He rimawi hian Mizo ṭhalaite-ah nasa takin hma a sawntir niin a hriat a, a lawmawm hle. Cable Tv lama rimawi huang en ṭhinte chuan kan Mizo nula ṭhenkhatten rimawi band dinin rimawi chi hrang hrang hmanga Pathian fakna hla te, lengzem hla te, leh hla lenglawng lam hlate an rem han hmuh hian, a bikin kan Mizo hmeichhia (nula) te hi rimawi lamah hma an lo sawn tawhzia leh an lo nep lohzia hei hian a ti lang chiang hle awm e.
Rimawi hmanruate Pathian biak inkhawmnaah te, leh khawtlang huap thil tih pawimawhah te hian mipate mawhphurhna ah dah mai lovin, kan Mizo hmeichhiate pawhin rimawi rem chungchangah theihna sang tak in nei tih hre reng chungin, he rimawi hmang hian Kohhran tan leh khawtlang tan theih tawpa ṭan la thar zel turin leh, rimawi lama hmasawn zel turin ka chah duh che u.
Kohhran hrang hranga ṭhalai hruaitute pawhin in ṭhalai Member hmeichhe zingah rimawi lama talent nei tak tak inphum rute hai chhuah kawngah ṭan in lak thar a, nu leh pate pawhin in fanu te zingah rimawi lama tui tak tak, hmasawn duh si, mah se hma lak dan tur hre si lo an awm ngei ang. Chu'ng te hnenah chuan an harsatnate hriatpuiin a theih chen chena hma lakpui zel a pawimawh takzet. Tin, Mizo zingah pawh rimawi hmanrua hmanga ni tina ei zawng te pawh an awm nual tawh niin a hriat a, heng mite hian Cable Tv lamah te leh chanchinbu lamah te rimawi hmanraw hmanga kan Mizo hmeichhiaten ei zawnna hna ṭangkai taka an hman theihna tur lam hawi hi ziah tama sawi tam ni ṭhin se la, hei hian kan Mizo hmeichhia rimawi lam tui tak takte hian nasa takin hmasawn nan leh ṭangkai takin an hmang ngei ngei ang.
Kohhran lam hruaitute leh khawtlang lam hruaitute ka ngen duh che u chu, kan Mizo hmeichhiaten rimawi hmanrua hi Pathian tan, Kohhran tan, khawtlang tan, leh ram tana taima taka rawng an bawl ve zel theih nan pawisa pawh seng huama nasa taka tan lakpui zel turin leh, Kohhran lama thil tih pawimawh a awm pawhin kan hmeichhiaten rimawi lamah mawhphurhna pawimawh an chan ve theih nan, chanvo pawimawh siamsak hi uar thar zel turin leh, khawtlang lamah pawh thil tih tur pawimawh a awm pawhin, rimawi lama mawhphurtu tur teah mipa tan chauh chanvo siamsak bik lovin, kan hmeichhia te pawh rimawi lama chanvo siamsak hi kan uar thar zel a pawimawh takzet e.
A tawp berah chuan Mizote hi mi thil tih sawisel peih tak leh mi rel ching tak kan ni awm e. Heng kan Mizo hmeichhiaten rimawi hmanrua chi hrang hrang hmanga hmasawnna leh changkanna an neih meknaah hian, duh khawp lohna lai leh sawiselna tur tam tak a awm ngei ang. Chu'ng te chu sawisel mai lovin tun aia nasa zawka kan hmeichhiaten rimawi hmanga rawng an bawl zel theih nan, rimawi lama thiamna sang tak tak neite khan kan hmeichhiate tan hian rimawi lamah nasa taka ṭan lakpui turin ka sawm che u.
- George L.Ralte