Mi Ṭha Chu Le

Mi ṭha leh felte hi chu khawi hmunah pawh kan mamawh ṭheuh mai, hetih lai hian mi zawng zawng an fel lo, ṭha lo kan tihna a ni chuang lo. Pathian kan biaknaah te, hna kan thawhnaah te, ro kan relnaah te, han kaihruaitu tur tu emaw kan mamawh ṭhin. Chu'ng mite chu tlema thluak ṭha deuh, experience lo nei tawh emaw an ni ṭhin. Khawtlang hruaitu, ṭhalai hruaitu kan thlannaah te pawh hian kan inchuh ve nasa thei hle, chutiang khatiang chu tih ka tum a, chumi chu ka tlin chuan ka ti ang, ti tein vote kan zawng ṭhin. Henga thlan chhuahte hi a ṭhen chu fel lo ve tak tak, rin ang leh beisei ang ni ta lo te pawh an awm ve ṭhin. Inthlang ram kan ni miau a, a changa han thlan fuh loh ve te pawh kha a mak lutuk lem lo ve.

A chang chuan mi ṭha tak te pawh hi han thlang mah ila, ṭangkai vak ta lo, ho zui ve ta mai mai hi an awm bawk a. Nia, mi ṭha tak han hmuh hi chu a har, mi ram hruaitu ṭha tak tak chanchinte han chhiar chang hi chuan a rualawhthlak duh reng a ni.

Hun Kal Tawh Te – Hun hi chu a kal zel mai, hripui leng te pawh Pathian zarah thil kal tawh nihna lai a awm der tawh mai.Vawiina kan ram roreltu ni mekte pawh rei lo teah hun kal tawha mi, kan la ti leh mai dawn a ni. P.C. party-in ro a lo rel ṭhin tawh a, Congress party pawhin a lo rel ṭhin tawh a, chutiang zelin MNF party-te pawh. Kan ram dinhmun hrang hrang te han thlir kual la, hna an lo thawh ṭhat leh ṭhat loh chu kan hre thei awm e. Aizawl-ah chuan building ropui leh ṭha ve tak tak a awm fur a, lirthei pawh a chhuak thar apiang a tam viau zel. Mahse, hengte hi ṭhenkhat chuan a ba (Loan)-a lei leh sak an ni hawlh hlawm, an ti ve tlat. Zirna lamah hma kan sawn em em, mahse, Silchar kawng a pin chuan kan ṭam chu a ni deuh der zel mai si. Sawrkarna lo chang tawhtu zawng zawng khan eng nge an lo thawh ber ṭhin le aw? Mahni tan, inhaivur nan, eizawn nan mai mai em mi aw, an lo hman ṭhin. Inkalpawhna ṭhate pawh hi kan mamawh hle mai, heti hian kawng chhiat em em thu hi kan hre fo mai. Engpawhnise, kan ram dinhmun chu a ṭha lo, leiba ngah kan ni.

Tun Hi A Ni E – Kan hma lawkah inthlanpui a lo awm leh ta reng mai, inthlan hmasate kha chuan ngaihtuah chiang mang lovin vote-te kan thlak vel mai mai a, a rah chhuah an lang tak tak chu hrehawm kan tiin, phun leh àn vak vak bak chu tih theih kan nei tawh si lo a ni. Tuna opposition party lam te hi eng nge an an ang aw, mahse, kan hriat tawh hnuho tho kha an niin ka hria. Mizoramin sawrkar ṭha tak, ram hmangaihtu tak tak engtin nge a neih theih ang? Aw le, sawrkar ṭha tak, ram hmangaihtu neih theih hun chu tun hi a ni e. Nakkum lamah chuan hun ṭha a awm tawh lo, a nih nih a ni zo leh vek tawh ang. Chuvang chuan sawrkar ṭha nei thei tur chuan vawiinah tu nge i thlan dawn, vote dawn, nangma duhthlanna ngeiah a innghat ta. Ngaihtuahna fim tak kan hman a, kan tun hun (Vote thlak hun) kan hman ṭhat ṭheuh a va pawimawh em. Kan hman ṭhat loh chuan keimahni bawk a ni, a tuartu tur chu. Hun kal tawh aṭangin kan inen ang a, lo la thleng tur chu beiseina sang tak nen, kan tun hun hman danin a hril dawn a ni.

Engtin Nge Ni Ang – Engtin nge mi ṭha chu kan thlan chhuah theih ang? kan ṭhenawmte pawh chuti tak chuan kan hre chiang hlei thei hlawm lo chu a ni si a. Lo kal apiangin kan party a ṭha ber, mi dang party chu ṭha lo, min vote phawt chuan Zoram nuam, intodelh kan siam dawn, an rawn ti ṭheuh mai si. Nia, political party-te an tang nasa,then khat phei chuan eng eng emaw te min pe ang a, min tiam bawk dawn a ni. Party ṭha ber tur, mi ṭha thlan chhuah chu a huphurhawm, an ṭha hlawm vek mai si. Mi zawng zawng khan kan ṭha ber, ziktluak ber, keimahni lo chu tu mah an awm lo, an rawn ti dawn a ni. Aw le, party ṭha ber, mi ṭha thlang chhuak thei tur chuan keimahni pawh kan inhuam a ngai, sum leh therhlo, eng eng emaw kan hnar ngam a ngai, kan chàn ngam a ngai. Kan theih ang angin an policy leh manifesto-te kan zir chiang ve ang a, candidate hote pawh tute nge an nih hriat tum ve ila. A tawp berah chuan thutlukna ṭha leh dik kan neih theih nan Pathian hnenah i dil ṭhin ang u. Tichuan, tu pawh lo tling ta se, Pathian ruatah kan pawm thei dawn a ni.

Mizoram chu Kristian ram a ni na a, ram rethei tak a ni a, kristian ram kan ni na a, fahrah tamna ram, AIDS hluarna, Cancer tamna a ni. Ram hruaitu ṭha tak tak kan lo nei ṭhin tawh a, sawrkar ṭha tak tak pawh kan nei fo tawh a ni. Mahse, vawiin thlengin eiruk tamna, intodelh lo, ṭam mai thei, leiba ngah ram kan ni. A awm viau e, chanchinbu leh social media hrang hrangah te sawrkar duhkhawp lohna, phunnawina, sawiselna kan hmu chuai chuai ṭhin. Hetih chhung hian ram tana lo pen chhuak an awm ve ngei ang a, chung mite thlang chhuak tur chuan phunnawina tawp theih nan, mi ṭha chu le, i han ti teh ang. Mahni tan leh party tana vote thlak lovin, ram tan vote i'n thlak teh ang, Mi ṭha chu le, i han ti teh ang.

- Lalchhandama Colney, Ph - 9862982321