Kohhran leh corruption do

Hman deuh lawk khan KṬP branch pakhat inkhawma pulpit-a thusawitu kohhran upa thlalak leh mi ṭhenkhatin thusawitu thla an lâkpuina thlalakte mi ṭhenkhat WhatsApp status-ah ka hmu a, thusawitu chu veng dang daiha mi a ni a, mak ka ti deuh a. A hnua ka hriat leh danin, thusawitu chu Mizoram Synod hnuaia committee pêng pakhatah member a ni a, chu a nihna avanga chu KṬP branch inkhawma thu sawi chu niin an sawi. Mak ka tih chhan erawh chu, thusawitu chu sorkara officer lian ve tawh tak, sawrkara thawk mek zinga eirûkna/hlemhlêtna (corruption)-a fihlîm lo zinga mi nia ka ngaih vang a ni ta ber àwm e!

Kum 10 chuang kal ta khan veng dang kohhran upa pakhat, hun eng emaw ti laia hlemhlêtna chungchanga sawi kái ve chu kan biak inah a rawn inkhawm a, ṭawngṭai tura sàwm a nih angin a ṭawngṭai a, a ṭawngṭai laiin ka maimitchhíng duh lo! A ṭawngṭai laia maimitchhìn loh kha khatih lai khan corruption donaa ka tih theih tâwka ka ngaih vangte pawh a ni mahna; ka sual vang a ni mai thei bawk!

Mizorama kohhran hrang hrangte hian tun hma aṭangin corruption doin hma an lo la tawh ṭhin a ni mai thei a, chu'ngte chu eng ang taka awmze nei nge a nih ka hre lo nãin, eirûkna leh hlemhlêtnate erawh a reh lo chiang a, tun thlengin a hluar tial tial emaw tih mai tur a la ni ta zel. Chutiang chu a nih avang chuan, kohhranin corrution a do dan leh a donaa hma a lak dan thlâk a ngaite pawh a ni mai thei.

Synod leh corruption do

Hun kal tawha corrution do chungchang Synod Inkhawmpui agenda-a a luh tawh dan leh an rèl dante ka hre lo. Nikum 2022-a Synod Inkhawmpui vawi 99-na, Khatla kohhran biak ina neihah erawh chuan presbytery pariat ngawt aṭangin corruption doa hmalak rawtna a lut a nih kha–December 8, 2022 khan ngaihtuah a ni. Agenda thuhmun presbytery pariat lai aṭanga lût hi tun hmain a awm tawh ṭhin em ka hre lo a, presbytery pariat lai aṭanga corruption do rawtna Synod-a an thlen hian kohhrante'n corruption an veizia a tilang.

Synod Inkhawmpui 2022 chuan corruption do rawtna chu pawmin, hetiang hian thu an dah a, "Corruption do hi thil pawimawh tak a ni a, kohhranin kan kalpui mek dan aia chak leh ṭhain bawhzui se la, SEC (Synod Executive Committee)-in lo bawhzui rawh se," tiin.

Synod 2022 chuan ram hruaitute khalh ngîl tura chak zawka hma a lak rawtna an pawm bawk a, "Tun aia chaka hmalak ni se," tiin, SEC bawhzui turin an dah. 'Kan ram leh hnam siamṭhatna turin khawtlang leh ram hmasawnna hna thawktute'n rinawm leh dik taka hna an thawh theih nan Synod-in hma la rawh se,' tih rawtna pawh an pawm a, "Synod Social Front hmalak mekna a ni a, thil pawimawh tak a nih avangin tun aia nasa zawkin hmalak ni se," tiin thu an dah bawk.

Synod 2022 rorel en hian, Mizoram Presbyterian Kohhran hian corruption a vei a, a ngaimawh tak zet niin a lang a; a thlamuanthlak hle. Tun hma lama hma an lo lâk tawh dan ang ringawt ni lo, awmze nei tham taka hma an lak a, eirukna leh hlemhletna an do beisei ila; rorel an bawhzui dan leh corruption doa hma an lâkna mipuiin kan ngaichâng mek a ni.

Kan nih mek dan

Kohhrana nihna leh chanvo pawimawh tak tak nei, ṭhenkhat chu kohhran upa hial ni thei zingah hian ruih theih thil, vaihlo zûk leh hmuama fihlim, mipat hmeichhiatna lama sawisep kai lo tam tak an awm a; hengah hi chu an felfai hle a ni. Mahse, chu'ng mite vêk zingah chuan eirûkna leh hlemhlêtnaa fihlim lo an awm nual ngeiin a rinawm.

Mi ṭhenkhat chuan kohhran leh khawtlanga inhman leh nihna pawimawh tak tak neih hi thil sual an tih (an eirûk) thup nan leh mi hmuha lan mawi nan an hmang ṭhin an ti a, mi eng emaw zatah chuan a dik ang. Chutiang mite chu han en mai hian an lang pawr ve fap lo a, an lang felfai thlarh a, zu in mite leh ruihhlo ti ṭhinte angin an lang ṭawp ve hek lo. Mahse, kan Pathian leh Isua Krista mithmuhah chuan zu leh ruihhlo ti ṭhinte aiin an tenawm zawk mah àwm asin. Mi tam tak tan an ngeiawm a, an huatthlala a, kohhran hmel tibâltu an ni bawk.

Kohhranah eirua rinhlelhte

Aizawla véng tinah hian sawrkara nihna sang thawkhat tak nei, sawrkar sum ei ru nia mipuiin rinhlelh rawn an awm deuh vek mai thei a, khawpui dangahte pawh an awm nual ang. Chutiang mi, mipui vantlang leh ṭhenawm khawvéngte'n an rinhlelh rawnte chuan an ei ru ngei tih dan ang taka finfiahna kan nei lo tlangpui thung. Chuti chung chuan, an in leh lo, bungrua leh khawsak dante kan hmu a, kan ringhlel a ni.

Ṭhenawm khawvéngte leh anmahni hretute'n eirua an rinhlelh rawn ṭhup hote hian an ei ru ngei a ni tih dan ang taka finfiahna awm lo mah se mipui thinlungah a chiang. Chutiang mite chu kohhran hian eng ang takin nge a ngaih a, an lakah eng ang ngaihtuahna nge a neih ang a, engtin nge hma a lak ang?

Engtin nge ni ang?

Synod 2022-a corruption do chungchang an rêlnaah palaite'n ṭhahnem an ngai hle a; tun hma lama Synod-in corruption a do tawh danin awmzia a neih tak tak loh thu leh corruption a la hluar zel thu te, thuchhuah siam, ngenna siam leh ṭawngṭai rual ang chi ringawt chu tun hma pawha tih tawh ṭhin, awmze nei si lo leh corruption kiam phah chiang si lo a nih thu te, hmalak tawh dang ang ringawt chu agenda pu lutte rilru leh tum nia a lan loh thu te, a tak taka chêt leh hmalak a ṭul thute an sawi niin ka hria.

Ṭawngṭaina hian thil a ti thei em em a, Kristiante chuan kan hmanraw neih thil ti thei ber pakhat a ni. Mahse, eirûk chíngte leh eiru thei dinhmuna awmte'n kohhran ṭawngṭai ringawt hi chu an tîm phah lo a ni ang–kan ramah corruption a hluar tial tial tlat. Chuvangin, kohhran hian ngaihtuahna thar, hmalak dan thar, corruption do dan thar a ngaituah a ngai a ni.

Mizoramah hian sawrkar sum eiru tih court-in a finfiah tawh tlem azáwng an awm a, tun hnaiah pawh an awm. Ṭhenkhat chu pawisa cháwi tur leh jail-a táng tura tihte an ni. Chu'ng mite chuan kohhranah eng mawhphurhna nge an neih ka hre thûk lo nãin, ṭhenkhat chuan chanvo pawimawh tak tak an nei niin an sawi. Court-in sum eiru a finfiahte lakah chuan kohhran hian eng 'action' nge a lak ka hre lo a, thil eng eng emaw tak a ni turah ka ngai ngawt a. Sawi tawh angin, court-in dan anga a finfiah si loh, corruption case pawh nei chuang lo, mahse, mipuiin eirua an rinhlelh rawn tam tak an awm bawk.

Hetiang hian ti ta ila...

* Eiru tih court-in dan anga a finfiah tawhte hi chu (court-in eiru tia a finfiah tawh chu court sang zawkah a kal a nih pawhin) kohhran hian thunun se a ṭha lo maw? Mipat hmeichhiatna suala tlute a thunun ṭhin ang hian.

* Corruption case nei, court-in a la finfiah si lohte leh corruption case pawh nei lo, mipui, ṭhenawm khawvéngte'n eirua an rinhlelh rawn ang chite hi kohhran leh a hnuaia péng hrang hrangah rawngbawlna chanvo/nihna leh mawhphurhna pek loh phawt mai a ṭha ang em? Fimkhur a, uluk taka ngaihtuah erawh a ngai ang.

* Tualchhung kohhranah fimkhur leh duhtui a ṭul rualin, kohhran hmunpui lam pawh fimkhur a ngai. Eirua mi rinhlelh rawn sawrkar officer (rinhlelh chauh pawh ni lo, rilrua chiang), kohhran upa ni site hi hmunpui lama committee member atan ruat loh ni bawk se.

Nghawng a nei ang em?

A chunga kan sawi ang hian tih ni ta se, kohhran hi a ṭha sawt ang nge, a ṭha lo zawk ang, ka hrethiam bik lo; a taka kan la tawn loh avangin. Kohhran rawngbawltute zingah sawisep kái an kiam phah ngei ang a, mi ṭhenkhatin kohhran an sawiselna an ngaihnepna pawh a kiam phah thei ang. Chutih rualin, mi ṭhenkhat chuan kohhran an dem phah thei tho bawk.

Kohhran thawhlawm a tlêm phah a ni thei a, lo tlêm phah deuh pawh ni se, kohhran tana harsatna thlen khawpin a tlahniam kher lo ang. Thawhlawm a tlahniam deuh a nih pawhin, kan ramah corruption a tlem phahna leh dik taka kan ram a kal phahna tur a nih chuan a hlâwk viau kan ti thei dawn lo'm ni?

A tawp nan

Sual huat hi a ṭha a, Bible-in min zirtir dan a ni a, Pathian kan ṭih dan tur a ni (Thuf. 8:13). Sual chi hrang hrang a awm a, Pathian tana tenawm vek a ni. Mizorama kohhran (a bikin Presbyterian Kohhran)-te hian sual chi hrang hrang tite zingah inngaihna suala tlu, mipat hmeichhiatna hmang khawlote hi an thunun ber a, thil sual dang tite an thunun khát viauin a lang. Inngaihna suala tlute chauh ni loin, Pathian duh loh thil sual dang ti, a bikin dan ang taka finfiah tawhte pawh thunun ṭhin ila, kohhran, ram leh mipui ṭhatna zawk a nih thei.

A nihna takah chuan, Pathian duh loh zawng thil sual tite zingah, inngaihna suala tlute hi chu anmahni tan a pawi a, mi dang, mipui tana thil pawi tak thlentu an ni lêm lo. Sawrkar/mipui sum eiru, hmasawnna hna thawhna tur sum tam tak tak mahni tana chheprelhte erawh anmahni tan chauh ni loin, ram leh mipui tan a pawi em em–ram leh mipui hmasawnna leh ṭhanna dâltu, mipui retheina thlentu an ni; kohhran tan pawh a pawi.

Kan rama kohhran lian ber Presbyterian Kohhran chuan presbytery pariat lai aṭanga rawtna lut angin corruption do an rêl a. A tak taka corruption an do hun kan nghâk ṭhup a, mipuiin beiseina sang tak kan nei a ni. Kohhran dangte pawhin tun aia nasa zawk leh awmze nei zawk turin corruption doin hma la thei se a va ṭha dawn em.

Mizoramah chuan kohhran hi huháng nei ber an ni a, kohhran hmalakna kaltlangin kan ramah eirûkna leh hlemhlêtnate hi a bo hmak loh pawhin a kiam theih ngei a beiseiawm. Kohhrante hmalakna kan thlir rawn mek a, mipui pawhin theihtawpa kan thlàwp a ṭha ang.

- K. Zothanpara