Sumsuih to Tuirial kawng RCC hi
Sumsuih khaw mipui tam berte feh kawng RCC tura tih a nih khan khaw mipuite an lawm ngei mai. Hisap leh hmathlir tam tak neiin feh kawngah na na na chuan hahdam takin an kal ve tawh ang a, hna thawh nan hun tam zawk neiin hma lam hun éng tak an neih ve ngei an beisei a. Mahse chu kawng zût hna chu an han thawk ta a. Khawtlang mipuite beisei anga an hna a ṭhat loh leh a muan em avangin khawtlang hruaituten an enpui mai chu duh tawk loin, Monitoring Committee an indin ta hial a. Chu committee chuan theih ang tawk tawka vilin hmanraw ṭha hmang tur te, tui pe ṭha turtein an nawr ve reng a. A contractor lam hian an pawisa vak hlei lo a!
Monitoring Committee leh NGO-te press release-a a lan danin kum 2020-a thawh ṭan a, kum khat chhunga zawh tura tih chu kum 2023 chawhma lamah pawh zawh a la ni lo a! Covid avanga hna a muang hret kha chu mi zawng zawngin an hrethiam vek a. Mahse hna harsa ni miah lo kawng awmsaa cement chhûn chauh heti taka an thawk muang hi chu thil mak tak a ni a. Hetih chhung hian hna thawktuten kawng an block fo avangin thlai thar tam tak chu phurh chhuah lohin a ṭawih ral tawh nghe nghe a ni awm e.
He kawng hi cheng nuai 426 vel senna tura ruahman niin Km 12 zût tur a ni a. Tun thleng hi chuan Km 7 vel zut tawh niin, hmun tam takah chuan a khawk leh tawh a. Khaw mipuiten nghakhlel tak leh beiseina sang taka an lo thlir mek chu an ṭahpui ta a ni ber e!
He hna hi Restricted tender-a pek niin Phako builders-ten hna neitu hming an pu a. Mi ṭhenkhat sawi dan leh rin dan chuan Phako builders hi Kamrula ang deuhin a hming tumtu mai an ni a. A thawktu tak tak chu mi dang daih an ni. A hna han thawh chhoh vel danah pawh hian a thawktute leh sorkar hnathawk tu tute emaw hi chu an inthurual ngei nia rin a ni. A nih loh vek pawhin a vil vengtu sorkar hnathawkte chu chung lam aṭanga thunun an nih rin a ni. He hna atana sum lo kal hi mipui sum, mipui vanga lo kal, mipuiin thuneihna an pekten an ruahman, mipui vang leh mipuite tana thawh a ni a. Bialtu MLA-in inthlan campaign laia a intiamna a ni a. Heti tak maia a intiamna um zui chhetu lakah hian bialtu MLA tan pawh thinrim hle awm tak a ni.
Contractor leh thuneituten thingtlang lam mite hmakhua ngai miah lo mai pawh ni lo a, an hamṭhatna tur lo kal ve chhun pawh heti mai maia an sawp duh hi a thinrimthlakin a lungchhiatthlak khawp mai. Anmahni pocket-ah chuan sum chu a lut nual ngeiin a rinawm. Hei hi kan ram darthlalang pakhat a ni a. Kum 2020 hnuah pawh hetiang mai maia kan ram a la kal mek hi siam ṭhat a van ngai tehlul em!
- Ramhmangaiha