Mizoram politics boruak lêng vêl

Tun kum tawp lama Mizoram kan inthlang tur chu ka hriat ve phak chinah ṭum dang zawng aiin boruak a 'hot' hma em maw ni chu aw, ka ti rilru a. Mi dang hmuh dan ni ve tak maw? Mipui nawlpuiin social media kan hman nasat tak vang pawh a ni thei e.

Tun hnaiah party dangte buai viau anga puhna thâwm te, inlawm luh thâwmte hriat leh chhiar tur a tam hle mai a. Keini ang duang tan chuana dik leh dik loh hriat a har duh hle. A dik a awm rualin, dik lo pawh tam tak a awm ka lo ring ve ngawt.

Kum 5 kal ta maia mipuiin duh lo em ema kan paih tak Congress party hi tunlai chu vung taka kal ang leh miin an bawh leh ta viau angin an inlantir thiam riau mai a. Mizoram Chief Secretary hlui Pu Lalnunmawia Chuaungo leh TV lama kan hmuh lar Pu Vana te an luh vangte pawh a ni ang e.

Anni pahnih han sawi takah chuan, Pu Lalnunmawia Chuaungo hi Congress party a zawm tak tak hma, Chief Information Commissioner aṭangin a bâng dawn tih sawi a nih aṭang khan Congress party-ah Vice President a ni dawn tih sawi a tam hle mai a. Mahse, tun thleng chuan a la ni ta lo a ni. Hun lo la kal zel turah eng nihna nge a chan dawn kan la hre thuai turah ngai ila. Intihre chiang tak takte titia sawi awm chu, Pu Nunmawia Chuaungo hian a tirah chuan ZPM a âwn a, ZPM an sawrkar chuan Deputy Chief Minister nih a phût a, ZPM hotute'n an remtih si loh avangin Congress-ah a lut ta a ni, Congress-ah pawh dinhmun sang tak a phût ngei ang, tih a ni a. Dik tak maw?

LPS Pu Vana pawh hi hun eng emaw ti chhung chu Facebook group vela a thu ziahte leh a thil buaipuite enin, a va ZPM mah mah ve aw, ka lo tih ve ṭhin kha a ni a. Mahse, Congress party-ah a lut ta daih a! A chhan awm phak tawk te tein ka lo ngaihtuah ve a, ZPM-ah candidate a chang pha dawn si lo a, Congress-ah a chan theih beiseiin a lut ta a nihte ka ring rum rum a. He ka rin dan hi mi tam tak rin dan a ni ve thovin ka hria.

Mihringte hi kan dam khawchhuahna tur te, kan dinchhuah dan turte ngaihtuaha zawng vek kan ni a. Mi pahnih ka sawite thutlukna hi a dik lohna ka hre lo a, a duh ber party an zawm a ni mai. Zalenna an nei miau a ni.

Engpawhnise, tute pawh Mizoram hruai tuma MLA nih tum te, chung mite lo ṭawiawmtu leh ṭanpuitu zawng zawngte leh party mi leh sate zawng zawng hian mahni sahmîm tihpuarna tur ni lovin, kan ram hmasawnna tur dah pawimawh ber se, Pathian lawm tlakin an politics nun pawh hmang se tih hi ka chah ve a ni e.

- Zoramchhana