Nuai 100 kha a tam a nia aw!
NLUP dawn chaka kan phut suau suauna kha a la rei lo, tunah SEDP dawn chakin ka phu leh suau suau mek a, heng dawn theih pawisate hi dinchhuah-pui tham a ni em tih erawh kan ngaituah tel a ngai takzet.
Kan sawrkar hrawn lai hian a lan dan chuan Rs 25000 velin an sem dawn niin a lang, hei hi kum nga chhung lo nghak fan fantu tan chuan lawmna tur nge, inrunluihna mai tih pawh hriatthiam harsa tak a ni.
In ngaihtuah chiang ngai em? Hmanni lawk khan Mizoram Assembly Speaker Pu Lalrinliana Sailo chuan US lama a thusawinaah, kan deputy chief minister department chanah cheng nuai 100 ziah bo a nih thu a sawi a, a sawi lai ngei video pawh hmuh tur a awm, kan hmu vek tawhin a rinawm.
A nihna tak sawi chuan inthlan dawnah hian pawisa vanga buaina a tam ṭhin a, party hrang hrang buaina pawh a ni ṭhin a, mipui lam buaina pawh a ni. MNF party chuan SEDP dawng tur tan an party mi leh sa nih a ngaih thu an sawi lang fo a, hei hi eptu party lamin an helhin an sawisel nasa hle bawk.
Rs 25000 hi khel tham a ni a, kan khel tur pawh a ni. Chutihrualin, entu party lam pawhin Mizoram pawisa, Mizo mipuite pawisa cheng nuai 100 ngawt a bo nia chiang taka sawi hi tun aia nasa lehzual zawka an zawn a, a zawng theitu lam pawh nasa zawka an nawr a ngai niin a lang – a tam tham lulai em mai.
Tun hnai mai khan MNF senior vice president Pu Tawnluia chuan Mizo nationalist chu party dangin an sawi ve a rem loh thu a sawi a, anmahni party thupui leh an kalpui ber ni awm takin a sawi.
Tuna kan sawrkar hrawn lai hian hnam thinlung a pu em tih hrechiangtu chu mipui kan ni a, hnam dang sumdawng an zalen a, hnam dang contractor chu nasa taka vulh a ni a, hnam dangin kan buhfai ei tur min supply chur chur lai hian, Hnam Thinglung neitu an inti ngam zel a nih pawhin mipui lam chuan a teh dan tawk kan hre tlang mai awm e.
Mipuiten hei hi hria ang u – tunlai hian party pakhat chuan 'Ṭang Puihna' an zuar mek, he an thil zawrh hi ṭang thei tawh ngang lote tan a nih thu an la sawi ta deuh deuh. Hmanni lawk kha chhui kir ula, ṭang thei tawh thlawt loa min siamtute chu anmahni tho kha an ni!
Sum sem a thawk na hle, a dik bawk. Amaherawhchu, hei hi kan hriat tel a ngai. Inthlan hmasak dawn khan Congress chuan nasa takin NLUP an sem a, chiang lutuk tak maiin an tla tho – tuna MNF sum sem tum ai hian NLUP an sem kha a la tam zawk lehnghal.
Party hruaitute u hei hi ka ngen duh che u, Mipuite hi pawisa chu min pe thei – mahse kan thinlung erawh in lei tel thei tawh lo! Sum leh therhlo ngaihtuah lo, mahni awmhmun aṭanga ram kal dan lo thlir a, a dik leh dik lo thliar thiam ṭhalai kan tam tawh, keini hi danglamna siamtu tur chu kan ni.
NLUP leh SEDP ka sawisel avang hian ZMP emaw min lo ti ngawt lo ula, ka ni lem lo – sum sem hi ṭhatpui tur chu ni ila nasa takin hma kan sawn tawh ang, kan sem china an ṭhatpui lohzia ka hmuh aṭanga sawi mai ka ni. ZPM hi rintlak an ni em tih erawh kan la hre dawn, an rintlak loh chuan kan paih leh daih mai ang chu.
- Lala, Aizawl